في الشهر ده، بيحصل إنجاز يعتبر جميل ومريح ليكي بعد شهرين من الولادة وهو إن إيقاع الحياة ابتدى ينتظم شوية وطفلك ابتدى يمشي على إيقاع النوم اللي انتي راسماه له. هتلاقي طبعًا التغيرات اللي هنقول لك عليها ظهرت بوضوح عليه في الشهر ده.
-
المهارات الحركية:
طفلك في الشهر ده شبه متحكم بالكامل في حركة رأسه ورقبته، حتى لما تشيليه، هتلاحظى إن معدل ميل رأسه تقريبًا اختفي. في الشهر ده، عضلات الجزء العلوي من جسمه بقت قوية بشكل كافي إنه يقدر يتحكم في حركة الرأس بحيث إنه لو نام على بطنه يقدر يحرك رأسه يمين وشمال بسهولة من غير صعوبات. أما الجزء السفلي من جسمه هتلاقي إن عضلاته بقت أقوى بحيث إنه يقدر يضرب برجله بقوة وإنه كمان يقدر يمسك لعبته بشكل أفضل، مش بكامل التحكم طبعًا لكن بقوة أكبر من الشهر التاني.
-
النوم:
الجهاز العصبي للطفل في الشهر ده بيكون اتطور بشكل كبير، وفي نفس الوقت معدته بتكون أكبر بحيث إن ده بيسمح بكمية لبن أكبر وبالتالي إمكانية الوصول لعدد ساعات نوم من 6 لـ 7 ساعات متواصلة.
شيء جميل هتحتاجي تعمليه مع طفلك في الفترة دي. لو بالليل لاقيتيه بيعيط، استني لمدة 30 ثانية لأنه احتمال كبير يرجع ينام تاني من نفسه. لو لاقيتي إن عياطه طوّل، هتقومي تتعاملي مع احتياجه سواء الرضاعة أو تغيير الحفاضة. بس مهم جدًا تعملي كده والدنيا مضلمة. ما تولعيش النور وتعملي جو من النشاط حواليه. لأن الضلمة هتحسسه إننا بالليل وده وقت النوم وتخليه يفضل في موود النوم، وتوصّل لدماغه إن الضلمة للنوم والنور للنشاط والصحيان. هتلاقي بالشكل ده إنه في النهار معدل ساعات النوم بيتراوح ما بين ساعة ونص لساعتين.
-
الحواس:
في الشهر ده، هتلاقي حاسة السمع والبصر اتحسنوا جدًا وقدرته على الرؤية بقت جيدة جدًا. هتلاقي إنه بيبتسم ليكي دايمًا لما يشوف وشك وبيستمتع إنه يشوف ملامحه في المرايا. وكمان هيكون عنده شغف بوشوش الناس أكتر من ألعابه.
-
التواصل:
في الشهر ده، بيكون بداية شعورك انتي وكل أفراد أسرتك بالانبساط بوجود الوافد الجديد ده. هتحسّي بجمال شخصيته وإنه بيتجاوب معاكم وبيضحك معاكم أحيانًا بصوت كمان. هتلاقي إن العياط قل جدًا. مش بيتعدى في مجموعه ساعة. لأنه وسائل تواصله اتطورت وتعددت فهو مش محتاج يعيط زي الأول. هتلاقيه بقى يصدر أصوات كأنه بيناديكي، مطلوب منك إنك تتجاوبي معاه وتقعدي تحكي معاه كل اللي بتعملوه مع بعض طول اليوم حتى لو هتحكي له بتطبخي إزاي أو بتنضفي إزاي. وسمّي كل الأشياء حواليكم باسمها الحقيقي لأنه في الفترة دي بيخزّن كل اللي بتقوليه كلمة كلمة وده حقيقي له نتيجة هتبهرك جدًا.
-
اللعب:
وقت اللعب ده خليه مش وقت لانبساط طفلك بس. إنما ليكي انتي كمان. الوقت ده هو الوقت اللي بتسترخي فيه وبتريحي دماغك باللعب مع طفلك. هو دلوقتي قادر على مسك ألعابه أكتر وأفضل، تقدري تحركي اللعب كأنه مسرح عرايس وتقدري تغيري صوتك وملامح وشك وهتلاقي استجابة جميلة منه. نوّعي من أنواع الألعاب اللي عنده علشان يبتدي يكوّن حصيلة من فهم اختلاف أنواع الأسطح حواليه.
نصيحة أخيرة.. ما تسمعيش أبدا لأي نصيحة من نصايح الناس الكبيرة في السن إنك مفروض تدخّلى الأكل الصلب في العمر ده في برنامج تغذيته بحجة إن ده هيشبعه ويخليه ينام أكتر. دي نصيحة كارثية بكل معنى الكلمة وبتسبب تدمير لجهاز مناعة طفلك وبتضر جدًا جهازه الهضمي. ربنا خلق للطفل إنه يتغذي على لبن الأم فقط خلال الست شهور الأولى من عمره. ده أفضل له ولصحته وده اللي بينصح بيه كل الأطباء.
التعليق باستخدام حساب فيس بوك