دخلنا الشهر التاني من عمر طفلك. هتلاقي الوضع دلوقتي اتحسن كتير عن بداية الشهر الأول. استعدتي صحتك بشكل كبير، اتعرفتي عليه أكتر، بقى عندك قدرة تميزي صوت عياطه ده زعل ولا جوع ولا معاد تغيير ولا دلع ولا مغص. وكمان عندك قدرة أعلى على السيطرة، هتلاقي إن فيه تطور كبير وسريع بيحصل هنرصده معاكي في النقاط دي:
-
المهارات الحركية:
في الشهر ده، هتلاحظى إن قدرته على التحكم في عضلاته بقت أكبر، بحيث إنه لو نام على بطنه، بقى عنده قدرة على رفع راسه والتحكم في عضلات الرقبة، وكمان هتلاقي إنه بقى يحب يمص صوابع إيده، مافيش مشاكل خالص من الحركة دي لأنها بتهدّيه جدًا، بس خليكي حريصة إن إيده تكون دايمًا نضيفة.
-
النوم:
في الشهر التاني، هتلاقي إن طفلك لسه بينام بمعدل من 15 لـ 16 ساعة لكنهم برضه متقطعين. لسه ما جاش الوقت اللي هتقدري فيه إنك تحصلي على ليلة نوم هادية خصوصًا لو بترضعي طبيعي لأنك هتلاقي نفسك بتصحي بالليل كل ساعتين علشان ترضّعي طفلك. بس في الشهر ده، قدامك فرصة حلوة إنك تعوّدي طفلك إنه ينام لوحده. لما تحسي إنه نعسان، حطيه على سرير خالي تمامًا من مخدات أو لعب وغطيه وخليه نايم على ظهره، شوية بشوية هيتعود إنه ينام لوحده. خليه دايمًا نايم على ظهره علشان تجنب خطر الاختناق.
-
الحواس:
في الشهر ده، هتلاقي نفسك لسه محتاجة تقربي منه علشان يشوفك بوضوح. حاسة النظر عنده لسه في مرحلة النضوج. بس هتلاحظي إنه بقى يتابع تحركاتك بعينيه حتى لو ما كانتش واضحة الرؤية عنده بس هو عارفك. وهتلاقي إن بقى عايز يستجيب ليكي بالأصوات اللي احنا بنسميها ملاغية وبدايات ابتسام.
-
التواصل:
في الشهر ده، ابتدي اتكلمي معاه كلام كتير، هتلاقي إنه بيحب يسمع صوتك وإنه فعليًا بيخزن كل الكلام اللي انتي بتقوليه علشان كلامك ده هتكون اللبنة الأولى اللي هو هيستخدمها في كلامه. اصبري علشان هيبهرك بكلامه.
-
اللعب:
في الشهر ده، هو طبعًا لسه غير قادر على اللعب بألعابه لكن هو عنده قدرة إنه يضرب اللعبة بإيده أو رجله أو إنه يمسك اللعبة كويس لو انتي حطيتيها في إيده وقفلتي صوابعه عليها. نصيحة أخيرة: سيبي لطفلك حرية تحريك إيده ورجله لأنه كده بيقوّي نفسه، ما تقيديش حريته في كرسي ولا عربية حتى لو كان ده أريح ليكي.
التعليق باستخدام حساب فيس بوك