محتويات المقال
الشهر الرابع هو الشهر الرسمي للضحك والشقاوة وكل التجارب الجميلة مع طفلك. تعالي نشوف بقى التطور وصل لحد فين:
-
المهارات الحركية:
العضلات بقت أقوى من أي وقت فات، هتلاحظي إنه قادر على رفع راسه وقفصه الصدري معتمد على دراعاته لما ينام على بطنه مع فرد رجله. كأنه واخد وضع الطيران. هتلاقي إنه بطّل خالص إنه يقفل كف إيده جامد على أي حاجة بيمسكها. دلوقتي يقدر يقفل ويفتح كف إيده بسهولة وكمان يحرك دراعه. يقدر يفرد رجله من عند ركبته بسهولة أكبر. هتلاقي إنك لو حاولتي تحطي طفلك في وضع الجلوس إنه هيرفع راسه ورقبته بتركيز شديد علشان يتحكم في جسمه. لو حسيتي إن طفلك في الفترة دي كسول شوية وهو نايم على السرير من حيث حركة الراس، حاولي تجذبي نظره إنك تلاعبي خده وتناديه وتكلميه لحد ما يحرك رأسه ناحيتك.
-
النوم:
الطفل في الفترة دي طالما أخدت كفايته من الرضاعة يقدر لعدد ساعات نوم متواصلة من 6 لـ7، ومجموعة قيلولات خلال اليوم بحيث يوصل عدد ساعات نومه من 14 لـ 16 ساعة في اليوم.
-
الحواس:
في الشهر ده هيبتدي نوع جديد من التواصل عن طريق إنه يتعرف على العالم الخارجي من خلال فمه، هتلاقيه حرفيًا أي حاجة توصل لإيده بيحطها في بوئه، ودي فرصة إنك تبتدي تعرضيه لأشكال مختلفة من الأسطح بهدف تطوير حسه الإدراكي. زي مثلًا قماش ناعم، كتاب، لعبة قطنية، أو بلاستيكية دول هيوفوا الغرض.
-
التواصل:
في السنة الأولى من حياة طفلك، استمتعي فيها بضحكه وملاغيته، هو بيكون في منتهى السعادة وهو سامع صوته، علشان كده هتلاقيه بيكررها من باب اللعب و التسلية. هتلاقي طفلك بيحب جدًا يبص على وشك وينفعل جدًا مع تغير ملامحك. وكمان هو تلاقيه بيتفاعل معاكي وملامحه بتتغير من ضحك لاندهاش وأحيانًا انزعاج. ولو بدأتي تقري له أو تغني له، هتلاقيه بيتفاعل معاكي جدًا مع تغير نبرات صوتك.
-
اللعب:
هتتفاجئي إن لعبة طفلك المفضلة هي إيده، ده حقيقي! هو بيكون مستمتع جدًا وهو بيتأملها، بيحركها، بيلمس بيها باقي جسمه، بيتعرّف من خلالها على تنوع ملمس الأسطح المختلفة.
وكلمة أخيرة، كل المعدلات اللي بنقولها لك دي معدلات عامة. كل طفل بيختلف عن التاني بطبيعة الحال. مفيش أي داعي أبدًا إنك تقلقي أو تخافي. ونصيحة أخيرة، كل ما لعبتي مع طفلك أكتر وكلمتيه وغنيتي له، هتلاقي تفاعل أكبر منه معاكي وتطور في حواسه واستجابته.
التعليق باستخدام حساب فيس بوك