محتويات المقال
في الشهر ده، مهارات طفلك في استخدام إيده بقت أفضل من أي وقت فات. بقى ينبسط جدًا لما يلعب وحد يغني له، وبيغضب ويزعل جدًا لو اختفيتي من قدامه. هتلاحظي في الشهر ده بداية القريفة اللي بتيجي مع التسنين اللي عادة بتبدأ مع الشهر ده. وهتلاحظي إن اللعاب زاد عنده أكتر من قبل كده.
-
المهارات الحركية
في الشهر ده، الطفل بيعرف دلوقتي يمسك الكوباية بتاعته ويشرب منها لوحده. بيحب جدًا التصقيف بإيده وكمان خبط الحاجات ببعضها وبقوة كمان. بيعرف يقعد لوحده من غير مساعدة منك وبيكون متحكم في قاعدته جدًا. يعرف يتقلب وهو صاحي وهو نايم. وبيعرف يتدحرج شوية بالشكل اللي بيمهده يبتدي يتعلم الزحف.
-
النوم
في الفترة دي، بيظهر عليه إنه يقلق جدًا لما انتي تبعدي عنه خاصة في وقت النوم. ولو صحي بالليل، بيسعى لجذب انتباهك له عشان تصحي معاه. هتلاقي نفسك مضطرة تشيليه من سريره وتخليه ينام جنبك لحد ما فترة القلق دي تعدي وبعدها تقدري تعوديه على النوم على سريره بشكل مستقل.
-
الحواس
حواس الطفل لسه في المرحلة دي غير مدركة لقيمة الأشياء. علشان كده لو انتي خايفة على حاجة، شيليها من إيده زي الموبايل لأنه بكل بساطة ممكن يرميه لأنه فعلًا مش عارف قيمته. هتلاقي في الفترة دي إنه يعرف يمسك منك البسكوت وياكلها بنفسه ويمسك قطع الفاكهة بإيده ويتناولها. وهتبتدي دايرة أكله تتسع وهيستطعم أصناف وأصناف تانية لأ. بس في نفس الوقت، لسه لبن الأم هو مصدر غذائه الرئيسي.
-
التواصل
التواصل هنا بينك وبينه أقوى من أي وقت فات، غيابك عن نظره بيعتبر مصدر تهديد وخوف ليه وخصوصًا في وجود ناس غريبة عليه. هتلاقي إنه بيكون مبسوط جدًا لو انتي لعبتي معاه لعبة إنك تستخبي وتظهري فجأة، هيضحك وينبسط قوي.
-
اللعب
الطفل في الفترة دي بيحب جدًا لعبة إنه ياخد الحاجات ويخبيها، وما تتوقعيش إنه هيفتكر خباها فين. وهيكون حفظ شكل ألعابه، فهتحتاجي كل فترة إنك تجددي له في شكل ألعابه علشان ما يحسش بالملل ويبطل يلعب. هتلاقي إن فيه لعبة قطنية عنده بيحبها أكتر ومرتبط بيها وبياخدها معاه في كل حتة. اللعبة دي بتشكّل له عنصر أمان وحماية. ما تحاوليش تنزعيها منه لأنها هتأثر عليه.
حاولي توقفي طفلك على ركبتك وانتي شايلاه من تحت دراعه وأقعدي ارفعيه ونزليه. هتلاقيه بيحب اللعبة دي جدًا وبيضحك معاكي فيها. ولها فايدة كبيرة في تقوية عضلات رجله تمهيدًا لتعلمه المشي.
التعليق باستخدام حساب فيس بوك