محتويات المقال
هنبتدي معاكم الشهر ده سلسلة مقالات بترصد مراحل نمو الطفل الرضيع شهر بشهر خلال عامه الأول، بحيث تقدري تتابعي وتعرفي إذا كان نموه صحي وماشي بشكل سليم ولا فيه حاجة تستلزم تدخل خارجي. في المقال ده، هنكلمك عن مراحل نمو الطفل الرضيع في الشهر الأول. تطور الطفل بيكون على كذا جانب وهنبدأ أولها بـ:
نمو الرضيع الشهر الأول
بعد الولادة، أكتر حاجة هتلاحظيها إن وزن طفلك بيقل في أيامه الأولى. مافيش داعي لأي قلق، لأن في الوقت ده جسمه بيكون بيتخلص من السوائل الزيادة واللي غالبا بتكون 10% من وزنه. بس بعد كده، هتلاقي إن وزنه بيزيد بين 420 إلى 850 جرام خلال الشهر ده. عمومًا طبيب طفلك هيكون مسجل وزنه علشان يتابعه كل شهر علشان يتأكد إن نموه ماشي بالشكل الصحيح.
حركة الرضيع الشهر الأول
رغم إن طفلك في المرحلة دي جهازه العصبي لسه في مرحلة النضج، إلا إنك هتندهشي من ردات فعله والأمور اللي قادر على عملها زي مص صوابعه، قدرته على التقاط الحلمة بمساعدتك علشان يرضع، قدرته على القبض بقوة على صوابعك لو حطتيها في إيده وكمان قدرته على فرد دراعه ورجله وضمهم، ولو حاولتي تحطي رجله على رجلك هتلاقيه بيحرّكها كأنه بياخد خطوات، وبرضه قدرته إنه يحرّك راسه وهو نايم. بس في المرحلة دي، عضلات رقبته بتكون ضعيفة مش بيقدر يرفع راسه. عشان كده لما تيجي تشيلي طفلك، لازم تحطي إيدك تحت راسه لدعم رقبته.
نوم الطفل الرضيع الشهر الأول
في الشهر الأول، عدد ساعات نوم مولودك بتوصل لـ16 ساعة لكن متقطعة وغير منتظمة. وده اللي هيحسسك إنه صاحي 24 ساعة وإنك في حالة تعب ومنهكة جدًا من قلة النوم. عمومًا مافيش أي داعي للقلق لأن ده طبيعي جدًا. هو بيكون لسه ما تأقلمش على دورة النوم الطبيعية. عمومًا أفضل نصيحة ليكي إنك تحاولى تعملي كل نشاطاتك معاه خلال النهار، وإن في فترة الليل يكون الجو حواليه مضلم وهادي جدًا. ده هيوصل له رسالة مع الوقت إن النهار للعب والليل للنوم.
الحواس:
في بداية ولادتهم، الأطفال بيكون عندهم قصر نظر شديد لدرجة إنه مش بيشوف بوضوح غير على بعد 20 أو 30 سم فقط. علشان كده، هو بيشوفك كويس خلال الرضاعة وبيفضّل الفرجة عليكي عن الفرجة على ألعابه. وبسبب قصر النظر ده، يفضّل تكون ألعابه ألوانها متباينة زي الأبيض والأسود، ده بيكون أوضح له.
هتلاحظي إنه لو حاول يركز على حاجة، بيظهر في عينه حَوَل وده طبيعي لحد الشهر الرابع. لو استمر أكتر من كده، هتحتاجي ترجعي لطبيبك. في الفترة دي برضه هيكون عنده قدرة على تمييز صوتك وصوت باباه وده بسبب سماعه لكم وهو في بطنك. بس لو الاستجابة كانت ضعيفة لحد أخر الشهر الأول، هتحتاجي إنك ترجعي لطبيبك.
تغذية الرضيع الشهر الأول:
حاسة التذوق عند طفلك لسه في طريقها للنضوج، لكن حاسة الشم بتكون متطورة وناضجة وبيقدر يميز ريحتك وريحة لبنك كمان. توقعي في الفترة دي إن في حالة رضاعة طفلك بشكل طبيعي، هيرضع من 8 لـ 12 مرة. ولو هيرضع صناعي، هيبقى من 6 لـ 8 مرات في اليوم. فيه أمهات بتفضّل تلتزم بالرضاعة كل ساعتين أو تلاتة. وفيه أمهات تانية بيفضّلوا إنهم يرضعوا أطفالهم كل ما يطلبوا. وده اللي بيفضّله الأطباء خلال الست شهور الأولى من عمر طفلك لدعم صحته ونقوية مناعته باقي حياته.
هتعرفي بسهولة إذا كان طفلك جعان ولا لأ لما تلاقيه بيحرك راسه يمين وشمال لما تلمسي خده، بحثًا عن ثديك أو زجاجة الرضاعة. طفلك لما يشبع، ده بيساعده على إنه ينام بعمق ولفترة أطول. علشان كده، كوني صبورة لو طفلك نام في بداية الرضاعة. حاولى تلعبي في أنفه وأذنه علشان يصحى ويكمل رضاعة. هتعرفي إذا كان طفلك بياخد تغذية كافية لما تلاقي في أخر الشهر الأول إن طبيبك بيقول لك إن وزنه زاد. وفيه طريقة أسهل وهي إنك تلاقي عدد مرات تغييرك للحفاض بتوصل لـ 6 مرات أو أكتر. لو أقل، ده علامة إنه مش بيتغذى بشكل كافي.
التواصل مع الرضيع الشهر الأول
في الشهر الأول من عمر طفلك، هتلاقي إن وسيلة التواصل بتاعته هي العياط. هتلاقيه بيعيط بمعدل تلات ساعات في اليوم، متفرقين طبعًا مش متواصلين. وطفلك غالبًا مش بيعيط لأنه حزين، إنما لأنه بيقول لك: أنا جعان، محتاج أغير الحفاضة، عايز حد يهتم بيا. لكن لو حسيتي إن معدل العياط أكتر من اللازم، لازم تستشيري طبيبك.
طرق اللعب مع البيبي الرضيع
الأطفال بيعشقوا التلامس الجسدي ودي وسيلتهم للإحساس بالأمان. علشان كده مافيش مانع تشيليه وتلاعبيه شوية، تدلكي جسمه بزيت أطفال. تحريك رجله كأنها على عجلة بيساعده مع الوقت إن عضلاته تكون أقوى ومستعدة للزحف والمشي. غني له، والبسي عروسة في إيدك وحركيها يمين وشمال، ومع الوقت هتلاقيه بيتابعهم، إمسكي شفاطة شاليمو وانفخي على أجزاء متفرقة من جسمه عشان يبتدي يعرف إن له أجزاء تانية في جسمه.
التعليق باستخدام حساب فيس بوك