من المهم خلال متابعتك لنمو طفلك في عامه الأول، تحطي شوية قواعد بسيطة في الاعتبار علشان تكوني مستعدة ومتفهمة. لكل طفل نمط نمو مختلف ومميز عن أي طفل آخر. بس في نفس الوقت، فيه علامات عامة شبه متفق على ظهورها. ومش لازم تظهر كلها وفي نفس الوقت. الغياب المبالغ فيه هبتطلب استشارة طبية. الطفل المبتسر نموه أبطئ من الطفل المولود في ميعاده علشان هو بيكمل نموه اللي كان مفروض يتم في الرحم في العالم الخارجي. الظروف المحيطة بالطفل وتفاعلك معاه بيفرق جدًا في تطوره وظهور علامات تقدمه. بعد ما كل ده يتحط في اعتبارك، تعالي نعرف مظاهر تطور طفلك في شهره التامن.
-
المهارات الحركية
في الشهر ده، طفلك بيتعرض للوقوع كتير لأنه دخل مرحلة الحبو والتدحرج استعدادًا لتعلم المشي. هتلاقيه قادر يتسند على عفش البيت ويمسك فيه بإيديه الإتنين والوقوف لمدة دقايق وهو ماسك بإيده الإتنين. انتي دورك لما تشوفيه كده إنك تسندي ظهره بإيدك لحمايته من الوقوع، وعلشان تحسسيه بالأمان، وتدعمي عملية تدريبه وتطوره الحركي والجسدي. استمتعي بالمرحلة دي وما توصّليش لطفلك أي قلق أو خوف وهو بيقوم بالتصرف ده. عليكي برضه في نفس الوقت إنك تأمني البيئة المحيطة بطفلك في البيت إنك تبعدي أي قطعة أثاث غير مستقرة أو قابلة للكسر لحماية طفلك من أي حادث لا قدر الله.
-
الحواس
يستمر استمتاع طفلك بالأصوات المختلفة والغناء معاه وإنه يسمع أغانيه اللي بيحبها وهتلاقي إنه اتعلم كلمة مهمة وفاهمها كويس اللي هي كلمة “لا”.
-
التواصل
قدرة التواصل عند طفلك مستمرة في التطور والتقدم خلال الشهر. هتلاقيه قادر يعبر عن مشاعره سواءً كانت بالإيجاب أو السلب. وبينفعل مع طفل تاني لو شافه بيعيط. وهتلاقي إنه بيحب يصقف بإيده جدًا، ويلوّح بإيده تعبيرًا عن رغبته في الخروج: “ياللا باي”.
-
اللعب
أكتر لعبة هيحبها هي لعبة إنك تخبي عنه حاجة وتظهريها فجأة. زي إنك تخبي لعبته نحت غطاء السرير وتظهريها بشكل مفاجئ. هتلاقيه انبسط وتفاعل جدًا معاكي.
عمومًا الشهر ده فترة مناسبة إنك تدربي طفلك إنك تغيبي عن عينه لفترة بتطول بالتدريج ولما ترجعي تحضنيه حضن طويل وقوي علشان تعبري له عن فرحتك إنك شوفتيه. الفكرة إنك بتمهديه لفترة دخول الحضانه إنه ما يخافش لما تسيبيه هناك، بجانب طبعًا دخوله لمرحلة إنه ينام لوحده في غرفة منفصلة عنك.
التعليق باستخدام حساب فيس بوك