زمان صديقة قالت لي إنها تم تشخيصها بـ مرض التصلب المتعدد MS. ما كنتش وقتها فاهمة قوي لكن كنت بشوف قد إيه هي بتكافح عشان تقدر تعمل مجهود بسيط وتعيش حياتها بشكل صحي وطبيعي. وقتها كانت بتقول لي إن ماحدش بيتكلم كفاية عن المرض ده، عن أعراضه أو أسباب التصلب المتعدد وطرق علاجه وإنه الناس محتاجة تفهمه أكتر عشان يتعاملوا مع مرضى التصلب المتعدد بشكل أفضل ومن هنا بدأت أهتم بيه أكتر.
إيه هو مرض التصلب المتعدد الـ MS؟
حسب موقع مايو كلينك الطبي، التصلب المتعدد مرض مناعي. ببساطة الجهاز المناعي بيهاجم مادة اسمها المايلين، اللي بيغطي ألياف الأعصاب. حاجة كده زي المادة العازلة اللي بتغطي سلوك الكهرباء، لما ده بيحصل الأعصاب بتكون مكشوفة. وبالتالي بيسبب مشاكل في الاتصال بين الدماغ وباقي الجسم، ومن هنا بتبدأ الحركة يبان فيها مشكلة ممكن تبان بسيطة أو شديدة، حسب درجة المرض، وتطوره. اللي ممكن يسبب تلف دائم للأعصاب، واللي برضو بتختلف من شخص للتاني، بعض المصابين بالتصلب المتعدد بدرجة شديدة ممكن يفقدوا القدرة على المشي لوحدهم أو نهائيًا. وبعض المصابين بيظهر عليهم أعراض معينة ويفضلوا فترة طويلة جدًا بدون أي أعراض جديدة.
أسباب التصلب المتعدد
مفيش سبب معين بيخلي التصلب المتعدد يحصل لشخص معين. هو واحد من أمراض المناعة الذاتية، ودي نوعية أمراض جهاز المناعة بيهاجم فيها الجسم بدل ما يهاجم الأمراض. فيه عوامل وراثية وعوامل بيئية، يعني مفيش شيء ممكن يتعمل، دي بتكون إرادة ربنا والأكيد إن كل مشكلة ولها حل.
أعراض التصلب المتعدد
خلينا نتفق إن الأعراض مش واحدة ومش متشابهة، وبتختلف من شخص للتاني، حسب درجة المرض ودرجة الإصابة ومكانها في الجسم. لكن عمومًا الإصابة بتأثر على الحركة، والأعراض اللي هنذكرها هنا مش دائمة، يعني في وقت هيكون فيه تعب، وبعد شوية الأعراض هتتحسن. تعدي فترات سكون وهدوء تطول أو تقصر وبعدها تحصل انتكاسة وبعدين تحسن وهكذا، الأعراض اللي نقصدها هي:
- تنميل أو شعور بالضعف في طرف معين، بيحصل في جنب واحد فقط، كل مرة، أو في الرجلين أو في جذع الجسم.
- إحساس بالكهربا مع حركة معينة في الرقبة خاصة لما الرقبة تميل لقدام.
- المشية ما تكونش متناسقة، بيحصل زي رعشة وعدم اتزان.
- مشاكل في الرؤية، فقدان جزئي أو كلي للرؤية في عين واحدة، مع ألم أثناء حركة العين.
- رؤية مزدوجة.
- رؤية ضبابية.
- تداخل الكلام.
- الدوخة.
- وخز أو ألم في أجزاء الجسم.
- مشكلات في الوظيفة الجنسية ووظائف الأمعاء والمثانة.
علاج التصلب المتعدد
مفيش علاج معين ممكن يتاخد فالمشكلة تخف، لكن الخبر الكويس إنه في علاجات بتسرع الشفاء من نوبات التعب، وبتخلي الأعراض أخف وأكتر احتمالًا وهو ده المطلوب. لكن كمان فيه حاجات محتاجين نعرفها عشان نقدر نتعامل زي إن المرض بيظهر غالبًا في الفترة من 20 لـ 40 سنة، وإن السيدات أكثر إصابة بيه، كمان التاريخ العائلي بيكون سبب، والناس اللي بشرتهم بيضا بيكونوا عرضة أكبر، قلة التعرض للشمس والتدخين من الحاجات اللي بتزود عوامل الخطر.
ازاي نتعامل مع التصلب المتعدد
- الوعي بإنه في النهاية مجرد مرض وله علاج هيخفف الأعراض اللي مش دائمة، يعني بتظهر وتختفي فمفيش شيء دائم.
- الانضمام لمجموعات الدعم وبالفعل في مجموعات إلكترونية، وجمعيات في مصر والدول العربية لرعاية مرضى التصلب المتعدد هدفها تخلي حياتهم أسهل.
- الالتزام بالعلاج عشان الأعراض تكون أقل.
- البعد عن الضغوط النفسية وتجنب الانفعالات والعصبية.
- التعرض بصورة أكبر لآشعة الشمس في الأوقات الآمنة.
- الاهتمام بالتمارين الرياضية لتقوية العضلات الضعيفة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك