حالة من الرعب الشديد منتشرة حاليًا بسبب الأنباء المتداولة عن مرض الفطر الأسود، خاصةً بين الأمهات كلام عن إنه مرض قاتل، لو أصاب مكان لازم يتم استئصال المكان فورًا، واللي بيصاب بيه مش ممكن يعيش، لكن يا ترى الكلام ده حقيقي؟ وإيه هو مرض الفطر الأسود اللي قيل إنه أصاب الفنان الراحل سمير غانم بعد تعافيه من فيروس كورونا وكان سبب وفاته؟ وإيه أعراض الفطر الأسود؟ طيب إيه علاقة الفطر الأسود بكورونا وهل الفطر الأسود في مصر فعلًا؟! طيب معدي ولا لأ؟ كل الأسئلة دي وأكتر جمعنا إجاباتها في المقال ده.
إيه هو مرض الفطر الأسود
مرض الفطر الأسود بيسموه “الفطر العفني” أو “فطر الغشاء المخاطي” عبارة عن عدوى نادرة جدا بتكون موجودة عادة في التربة والسماد الطبيعي والنباتات والفواكه والخضار المتحلل والخشب الفاسد، من الأسباب الأساسية للفطر الأسود، والمرض ده بيؤثر على الجيوب الأنفية والمخ والرئتين.
الفطر الأسود وعلاقته بالكورونا
أي شخص ممكن يصاب بالفطر الأسود مش بس مرضى كورونا، الفكرة كلها، لذلك من أكتر الفئات المعرضة ليه هم الناس المصابين بمرض السكر أو الإيدز أو السرطان أو أمراض نقص المناعة الشديدة أو المسببة لنقص المناعة زي كورونا مثلًا.
تم الربط بين الفطر الأسود وكورونا بعد إعلان الهند رصد انتشار متسارع للمرض ضمن المتعافين من كورونا، ووصل عدد الحالات 8800 حالة، لكن التفسير الطبي للظاهرة إن فيروس كورونا بينهك أنظمة الجسم المناعية وبيخليه ضعيف مش قادر يدافع عن نفسه وبالتالي أبسط عدوى ممكن تحصل ومنها الفطر الأسود، كما في ربط طبي بين بعض الأدوية المستخدمة لعلاج كوفيد زي الكوتيزون ومركبات الستيرويد، لكن الأكيد إنه مش مرض معدي.
أعراض مرض الفطر الأسود
حسب المكان اللي ظهر فيه الفطر في جسم الإنسان بتبدأ الأعراض لكن عمومًا في أعراض ثابتة زي:
- ارتفاع درجة حرارة الجسم.
- الحكة وألم الصدر.
- ضيق التنفس.
- انتفاخ في أحد جانبي الوجه.
- الصداع.
- احتقان الجيوب الأنفية.
- ألم في البطن.
- القيء والغثيان.
- الإسهال.
- نزف في الجهاز الهضمي.
- دم مرافق للبراز.
- ظهور بثرة سوداء على جسر الأنف أو داخل الفم.
- تقرح الجلد أو احمراره أو انتفاخه.
- تحول الجلد إلى اللون الأسود.
علاج الفطر الأسود
الخلايا التالفة ما بيبقاش ممكن علاجها لذلك بيتم استئصالها مع علاج دوائي أو تدخل جراحي أو الاتنين، وعادة بيتم استخدام مضادات فطريات مع أدوية بتساعد على التحكم في مستويات السكر في الدم.
طرق الوقاية من الفطر الأسود
النظافة ثم النظافة ورفع مناعة الجسم من خلال الأكل الصحي وممارسة الرياضة، دي أول خطوة:
- بنتكلم عن حاجات بسيطة تتعلق بالنظافة الشخصية زي الاستحمام بعد الرجوع من الشغل أو ممارسة الرياضة أو التجمعات.
- ارتداء قناع على الوجع في الأماكن الملوثة زي مواقع البناء.
- الأكل الصحي والالتزام بالوقاية من كورونا.
- متابعة مرض السكر باهتمام وخاصة في حالة الجروح.
المصدر:
ويب طب
التعليق باستخدام حساب فيس بوك