مؤخرًا بقينا نلاحظ إن أغلبنا كأمهات بنشتكي من تشتت ولادنا وقلة تركيزهم، وده طبعًا زاد كمان مع قعدة البيت والدراسة الأونلاين، وزيادة وقت الشاشات. وكل ما الطفل يكبر، توقعاتنا منه تكبر، لكن للأسف، قلة التركيز والنسيان الكتير والتشتت ده بيضرب كل التوقعات في مقتل. في المقال ده، هنقول لك على خمس طرق تساعدي بيهم طفلك على التركيز وتذكر المعلومات بشكل أسهل.
طرق حفظ المعلومات
- الجو العام للمذاكرة
ترتيب وتظبيط الجو الخاص بالمذاكرة يكون في مكان مخصوص ومنظم وهادي، يعني الطفل ما يقعدش في أي مكان أو ينام على السرير أو يقف في المطبخ، ونكون متخيلين إنه هيركز في اللي بيقراه.
- فهم المعلومة
أوقات مع ضغط الوقت والمذاكرة، بنطلب من ولادنا يحفظوا علطول عشان نخلص، من غير ما نتأكد إنهم فاهمين. وده غالبًا هيوقّع منهم نص المعلومات اللي حفظوها مهما حاولوا وكرروا في الحفظ. فمهم إننا نتأكد إنهم فاهمين المعلومات اللي متقدمة لهم كويس جدًا.
- خليهم يشرحوا لك
نخلّيهم يشرحوا لنا الدرس أو الموضوع اللي بيذاكروه، ده هيساعد عقلهم على استرجاع المعلومات عن طريق شرحها مرة تانية من غير ما يتحط تحت ضغط الحفظ أو التسميع.
- النوم والتغذية السليمة
من أهم العوامل اللي بتأثر على قوة ذاكرة الطفل، مهم إن الطفل ينام عدد ساعات كافي، ويكون نوم متصل غير متقطع وهادي. وكمان ممكن ندعمه ببعض الأغذية اللي فيها عناصر بتعزز قوة الذاكرة، زي الأوميجا 3 اللي دراسات كتير أثبتت تأثيره الهايل على تنشيط قدرات الأطفال والكبار الذهنية، وده موجود بكثرة في الأسماك وخاصة “السلمون”. وكمان المكسرات زي اللوز وعين الجمل والخضار والبيض من الأغذية اللي بتساعد على التركيز.
- تقسيم المعلومة
لما الطفل يكون عنده مشكلة مع حفظ جزء معين، قسموا المعلومة لمعلومات صغيرة عشان تحسسه بالإنجاز وإنه هدف بسيط عليه فيتشجع ويقدر يدخل في اللي بعده.
- نغنّي المذاكرة
شجّعوهم على تأليف أغاني أو كلمات متناسقة مع بعض يفتكروا بيها الجزء اللي محتاجين يفهموه، لإن العقل قادر إنه يفتكر الجمل والكلمات اللي بسجع أكتر بكتير من الكلام العادي.
وطبعًا أهم حاجة ما ننساش الأطفال الحركية في المذاكرة، وإنهم بيقدروا يركزوا أكتر وهم بيتحركوا، فمهم نفهم طبيعة ولادنا ونتعامل على أساسها.
مصادر:
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك