كتير مننا سمعوا عن مسك الطهارة، سواء بماركة زي “مسك الطهارة عبد الصمد القرشي” أو من غير ماركة زي المسك الأسود أو مسك الطهارة الأسود أو حتى كريم مسك الطهارة. والفكرة فيه إنه بيعمل ريحة كويسة وبيشيل آثار ريحة الدورة الشهرية أو الجماع لو اتوضع بعد الاستحمام بعد أيهما. لكن الحقيقة اللي اكتشتفته بعد بحث طويل جدًا في الموضوع إن مسك الطهارة مضر جدًا لو اتوضع بطريقة غلط. عشان كده.
هاكتب لك في المقال ده أضرار مسك الطهارة وطريقة استخدامه الوحيدة اللي مش هتسبب لك مشاكل.
كل مواقع الصحة من مايو كلينيك لـMedical News لـHealthline بتؤكد إن منطقة العضو التناسلي عند الست بتكون حساسة جدًا وإن حتى الصابون اللي فيه روايح والشاور جل ممنوع استخدامهم لأنهم بيسببوا التهابات في المنطقة دي. وإنك علشان تحافظي على نضافة المنطقة دي، ممكن ببساطة تستخدمي الميا وتستخدمي صوابعك علشان تخللي الميا ما بين ثنايا الشفرين أو تستخدمي فوطة طرية مش خشنة ومبلولة بميا عشان تتأكدي إن كل جزء من الثنايا نضيف ومفيش إفرازات متراكمة في أي مكان عشان ممكن ده يسبب روايح غير محببة. وممكن زيادة في التنضيف، تستخدمي صابون جلسرين (صابون شفاف ومالوش ريحة). وإذا كان حتى الصابون ممنوع عشان الريحة، فلكي أن تتخيلي بقى المسك يبقى إيه.
أما عن طريقة الاستخدام اللي قلت لك في الأول إني هاقول لك عليها، فهي إنك تستخدميه كعطر لجسمك عمومًا، مش المنطقة الحساسة. ولو قلقانة عشان الاحتكاك في الجزء ده من الجسم بيكوّن عرق، فممكن تستخدمي مسحة من المسك بإيدك على مكان التقاء الفخد من فوق بالمنطقة الحساسة، ممكن كمان تستخدميه على آخر منطقة في البطن (تحت السرة بمسافة – مكان جرح القيصرية). ولو وزنك أزيد شوية، ممكن تستخدمي المسك في منطقة الفخد من جوا عشان تضمني إن حتى مع الاحتكاك والحر والعرق، مش هيكون فيه ريحة كريهة. نتمنى لك صحة هايلة وعشان تعرفي أكتر عن الالتهابات المهبلية وإزاي تتعاملي معاها، اقري المقال ده.
التعليق باستخدام حساب فيس بوك