محتويات المقال
مع قرب شهر رمضان، بنفكر في إيه كأمهات مصرية؟ طبعًا أسعار الياميش، أيام العزومات، الوقفة طول النهار في المطبخ، أعلم ولادي الصيام ولا أستنى السنة الجاية، ملايين الأفكار، لكن أهمهم هي يا ترى هاتابع مسلسلات وبرامج رمضان على التليفزيون ولا على الإنترنت؟ فكرة مهمة وصعبة ومحتاجة وقت وتفكير عشان اتخاذ قرار مهم وخطير وحساس زي ده. وعشان يبقى عندك وقت تقلقي فيه على كل المصاريف والعزومات وتعليم الصيام، قررنا نشارك معاكي قائمة مسلسلات رمضان 2020 (1441 هجريًا) عشان تحسمي الجدل من دلوقتي وتقرري انتي هتتابعي أنهي مسلسلات عشان تفضي بقى للحاجات التانية. حاولنا نجمع جميع مسلسلات رمضان 2020 ومستنيينك تشاركينا في التعليقات بأنهي مسلسلات هتتابعيها.
فالنتينو – مسلسل عادل إمام رمضان 2020
مسلسل الزعيم عادل إمام المؤجل من رمضان 2019، هو مسلسل فالنتينو اللي بيدور حوالين “فالنتينو” أو نور عبد المجيد، صاحب مدارس إنترناشونال هو وزوجته اللي بتدور بينهم مشاكل. المسلسل إخراج رامي إمام. مسلسل فالنتينو يعتبر المسلسل الأول اللي خلصان تمامًا وفي انتظار العرض.
مسلسل عادل إمام – مسلسلات رمضان 2020
سلطانة المعز
سلطانة المعز هو مسلسل عن بنت اسمها سلطانة وفي منطقة المعز، وبتقوم بدور سلطانة الفنانة غادة عبد الرازق. قصة المسلسل إن سلطانة اللي في المعز بتورث من أبوها محلات كبدة والمسلسل بيدور في إطار شعبي. العمل من تأليف إياد إبراهيم، وإخراج محمد بكير،
مسلسل غادة عبد الرازق رمضان 2020
فرصة تانية
ياسمين صبري هتشارك رمضان ده بمسلسل فرصة ثانية. المسلسل بيدور في إطار اجتماعي رومانسي وبيناقش فكرة “الفرصة التانية” في حياتنا، وإزاي نستغلها بشكل صح، وبيعرض الأزمات اللي بنمر بها كبشر. المسلسل من تأليف مصطفى جمال هاشم، وإخراج مرقص عادل.
مسلسلات رمضان 2020
بـ100 وش
مسلسل بـ100 وش اللي كان اسمه النصابين وكان مفروض يتعرض في رمضان 2019، هيتعرض في 2020 باسمه الجديد وبطولة نيللي كريم (اللي وحشتنا في 2019) وآسر ياسين. المسلسل من إخراج كاملة أبو ذكري.
مسلسل نيلي كريم وأسر ياسين – مسلسلات رمضان 2020
النهاية
الفنان يوسف الشريف بعد غيابه عن موسم رمضان 2019، بيشارك في موسم 2020 بمسلسل النهاية اللي بيناقش فكرة التكنولوجيا وتطورها السريع المخيف، عن طريق شخصية مهندس تقني بيحاول بشتى الطرق إنه يوقف التطور ده. المسلسل من تأليف عمرو سمير عاطف، وﺇﺧﺮاﺝ ياسر سامي.
مسلسل يوسف الشريف رمضان 2020
القاهرة كابول
مسلسل بوليسي تشويقي واضح من الكاست بتاعه إن اللي هيبدأه هيستنى باقي حلقاته على نار. المسلسل بطولة خالد الصاوي وفتحي عبد الوهاب وطارق لطفي، وفي البطولة النسائية حنان مطاوع. المسلسل تأليف عبد الرحيم كمال وإخراج حسام علي.
ونحب تاني ليه
مسلسل رومانسي زي ما باين على عنوانه، من بطولة ياسمين عبد العزيز وكريم فهمي. المسلسل من تأليف عمرو محمود ياسين وإخراج مصطفى فكري.
مسلسلات رمضان 2020
نساء من ذهب
“وقد يجمع الله الشتيتين بعد ما يظنان كل الظن ألا تلاقيا”.. المسلسل الموعود .. اللي كلنا في انتظاره من سنين .. مسلسل نساء من ذهب، بطولة مشتركة بين نادية الجندي ونبيلة عبيد. المسلسل من إخراج وائل إحسان.
خيط حرير
مي عز الدين هتغير خالص السنة دي عن السنة اللي فاتت اللي كانت مشاركة فيها بمسلسل كوميدي، وهتكون في مسلسل اجتماعي رومانسي اسمه “خيط حرير”. المسلسل من تأليف محمد سليمان عبد المالك وإخراج إبراهيم فخر.
مسلسل مي عز رمضان 2020
تيمون وبومبا
البطولة المشتركة بين الثنائي الكوميدي الناجح أحمد فهمي وأكرم حسني راجعة تاني رمضان ده في شكل حلقات منفصلة متصلة بعنوان “تيمون وبومبا” من تأليف أيمن وتار وإخراج أحمد الجندي. حزروا فزروا، معاهم مين؟ أيوة، بيومي فؤاد!
اتنين في الصندوق
اشمعنى الصندوق؟ عشان حمدي الميرغني وأوس أوس – أبطال العمل – طالعين عمال نضافة، والمسلسل بيدور حول الصعوبات والمشاكل اللي بتواجه عمال النضافة في إطار كوميدي. المسلسل من تأليف لؤي السيد وإخراج محمد مصطفى.
الفتوة
الفنان ياسر جلال هو بطل مسلسل الفتوة اللي بتدور أحداثه حول صراع الخير والشر، وأحداثه بتتنوع بين الأكشن والرومانسي وبتدور قبل 100 سنة في حي الجمالية. المسلسل من تأليف هاني سرحان وإخراج حسين الصاوي.
مسلسل ياسر جلال رمضان 2020
هجمة مرتدة – مسلسل أحمد عز رمضان 2020
هجمة مرتدة هو الاسم المؤقت – المبدأي للمسلسل ولسه ما قرروش الاسم النهائي. المسلسل هيكون بطولة أحمد عز وهند صبري وغيرهم من النجوم والنجمات. أحداث المسلسل المعروفة لحد دلوقتي هي إنه هيكون من ملفات المخابرات المصرية الحديثة. المسلسل من تأليف باهر دويدار (اللي بيشارك في رمضان بأكتر من سيناريو) وإخراج أحمد علاء.
مسلسل أحمد عز رمضان 2020
الشركة الألمانية لمكافحة الخوارق
المسلسل الواضح جدًا إنه هيكون كوميدي من عنوانه ومن أبطاله محمد سلام ومحمد عبد الرحمن. يقال إن المسلسل هيكون بس 15 حلقة. وهيشارك في بطولته مجموعة من نجوم الكوميديا. المسلسل إخراج إسلام خيري وتأليف مجموعة من المؤلفين.
تقاطع طرق – مسلسل منى ذكي رمضان 2020
تقاطع طرق من المسلسلات اللي لسه بادئة تصوير وعشان كده لسه مش عارفين بالظبط قصة المسلسل. كل اللي نعرفه إنه بيدور في إطار اجتماعي تشويقي. المسلسل من بطولة منى زكي ومحمد ممدوح ومحمد فراج وسيد رجب. المسلسل من تأليف وإخراج تامر محسن.
مسلسل منى ذكي رمضان 2020
وصل أمانة
بعد تعاونهم في مسرح مصر، علي ربيع ومصطفى خاطر هم نجوم البطولة المشتركة في مسلسل “وصل أمانة” اللي كتبه فاروق هاشم ومصطفى عمر وبيخرجه معتز التوني. مش محتاجين نقول إن المسلسل كوميدي.
لعبة النسيان
لعبة النسيان مقتبس من سياق مسلسل إيطالي وهو دراما اجتماعية من بطولة دينا الشربيني. قصة المسلسل ست من طبقة متوسطة بتتغير حياتها بعد فقدانها الذاكرة وصراعها بيكون بين حياتها الجديدة ومحاولتها إنها تفتكر الماضي. المسلسل من تأليف تامر حبيب ومن إخراج هاني خليفة.
مسلسلات رمضان 2020
البرنس – مسلسل محمد رمضان 2020
محمد رمضان هو بطل مسلسل البرنس في رمضان 2020. قصة المسلسل هي شخص يتيم (البرنس – محمد رمضان) بعد موت أبوه وأمه بيدخل في صراع مع أخواته. المسلسل بطولة محمد رمضان وصفاء الطوخي وأحمد داش ومجموعة كبيرة جدًا من النجوم، ومن تأليف وإخراج محمد سامي.
مسلسل محمد رمضان 2020
دهب عيرة
الفنانة بسرا هتشارك رمضان ده ببطولة مسلسل دهب عيرة اللي بيناقش فكرة التفكك الأسري والإدمان. والمسلسل من تأليف أحمد عادل وإخراج سامح عبد العزيز.
مسلسل يسرا رمضان 2020
الاختيار
مسلسل الاختيار بطولة أمير كرارة اللي اتعودنا نشوفه في دور الظابط في آخر أعماله. وفي المسلسل هيجسد دور الشهيد أحمد صابر المنسي قائد الكتيبة 103 صاعقة اللي استشهد في كمين “مربع البرث” بمدينة رفح 2017. هيشاركه البطولة آسر ياسين ومجموعة أخرى من الفنانين والفنانات والمسلسل تأليف باهر دويدار، وإخراج بيتر ميمي.
مسلسلات رمضان 2020
ليالينا
مسلسل ليالينا من بطولة غادة عادل وإياد نصار وصابرين وخالد الصاوي. قصة المسلسل بتدور حوالين عيلتين في التمانينيات، الأولى من طبقة أرستقراطية في حي الزمالك والتانية من طبقة أقل وساكنين في بولاق. بياخدنا المسلسل في صراع بين العيلتين. المسلسل من تأليف أحمد عبد الفتاح وإخراج أحمد صالح.
مسلسلات رمضان 2020
أسود فاتح
هيفاء وهبي وشريف سلامة وصبري فواز بيصوروا حاليًا مسلسل أسود فاتح في لبنان. قصة المسلسل بتدور حول سيدة أعمال عندها شركة أزياء وبتكتشف خيانة زوجها لها وده بيقلب حياتها تمامًا. المسلسل تأليف أمين جمال وإخراج كريم العدل.
مسلسل هيفاء وهبي رمضان 2020
ولاد إمبابة
قصة المسلسل لسه مش معروفة قوي لكن المسلسل بيدور في أجواء حي شعبي وبيضم عدد كبير جدًا من الفنانين زي سمير غانم وفريدة سيف النصر وأحمد شيبة وسعد الصغير وأوكا وأورتيجا. من تأليف أيمن بكرى، وإخراج حاتم صلاح الدين.
التعليق باستخدام حساب فيس بوك