بعد يوم طويل من الجري ورا الأطفال، وتحضير اللانش بوكس والطبخ للغدا، وكل التفاصيل المرهقة والمتعبة في حياة كل الأمهات، بيجي الوقت الخاص للأم بعد ما أولادها يناموا أخيرًا، أول حاجة بتيجي في بالها إنها تتفرج على حاجة تسليها وتبسطها في الوقت ده، وتغير لها جو بعيد عن كل الضغوط، كل ده طبيعي وبنعمله كلنا، بس الغريب بالنسبة لي إني لاحظت إن في الوقت ده من كل ليلة ألاقي الأمهات كاتبين على السوشال ميديا كوميكس وميمز عن مسلسل لؤلؤ، ومستمرين على الحال ده مع كل حلقة.
علشان كده سألت الأمهات على جروب راحة بالي، ليه بتتفرجوا على مسلسل لؤلؤ؟ وفوجئت بعدد الأمهات اللي بيتابعوا المسلسل، بس الأهم من العدد، هو أسباب متابعتهم له، والحقيقة إنها كانت أغرب أسباب شفتها في حياتي تخلي الواحد يتفرج علي مسلسل.
شوفوا معايا الأسباب الغريبة اللي بتخلي الأمهات تتابع مسلسل لؤلؤ:
- نوع من أنواع جلد الذات: وده من أغرب الأسباب، ومع كده أمهات كتير اشتركوا فيه.
- فراغ: هو الفراغ وحش صحيح، وبيخلي الواحد يعمل حاجات ميتخيلهاش، بس مش لدرجة يتابع مسلسل كامل هو مش طايقه.
- حب دعم الزوج (المخرج) لزوجته (مي عمر): من كتر ما الأمهات يا عيني مستنيين الدعم من أزواجهم، فبيصبروا نفسهم إن أهو في أزواج والله بتدعم زوجاتها، حتى وهما موهبتهم فقيرة جدًا.
- متابعة الأزياء والشنط والجزم: وده دافع معروف وقديم بيخلي الستات تتفرج على الأعمال الفنية، حتى لو مش هيقتنوا نفس الماركات، بس متابعة بلا هدف.
- أهو ده اللي بيجي قدامنا: وإحنا بنسلي وقتنا على الموبايل تحت البطانية قبل ما ننام، الفيسبوك بيقترح علينا المسلسل والله من غير ما نطلب منه، وإحنا مش بنحب نكسفه.
- بننبهر بالجرافيكس: وخصوصًا إنه مصروف عليه رقم ضخم، حوالي 3 جنيه ونص كده.
جرافيكس مسلسل لؤلؤ
- حب غير مبرر للمسلسل: في أمهات قالوا إنهم بيحبوا المسلسل فعلا، بس بيضحكوا ومستغربين جدًا من نفسهم ومن الحب الغريب ده.
- بس أجمل الأسباب اللي تقالت على الإطلاق: علشان أنا “مهزأة”، وكتير من الأمهات ردوا عليها وقالوا وإحنا كمان:
ودلوقتي قوليلنا لو انتي بتتابعي مسلسل لؤلؤ، بتتابعيه ليه؟
التعليق باستخدام حساب فيس بوك