مسلسلات رمضان 2021 كلها بدأت، وعدى منها حلقات تقدر تخلينا نشوف هنتابع إيه منهم؟ .. وطبعاُ من المسلسلات اللي ترند اليومين دول هو مسلسل ” لعبة نيوتن” بطولة منى ذكي، الفكرة اللي بيقدمها المسلسل هي الولادة في أمريكا، واللي كتير من الأمهات بيسألوا: هي ليه منى ذكي عملت كده في نفسها؟ ما تقعد وتولد في مصر زي بقية خلق الله، وده اللي هنتكلم عليه في المقال ده، قولنا نسلي ونتناقش مع أمهات مصر اللي قاعدين على أعصابهم، ومستنيين منى ذكي تقوم بالسلامة وعلى خير، بعد كل اللي بيحصلها في أمريكا.
مفيش حد في الدنيا بيحب يكون حد أحسن منه، غير الأب والأم، لإنهم بيعملوا المستحيل عشان ولادهم يطلعوا أحسن منهم، مع إن الجملة دي شكلها كليشيه قوي، لكنها حقيقة، أحسن في التعليم والحالة المادية، والتربية، وفهم الدين، وحتى في الجنسية.
طيب كل الحاجات نقدر كأهل نبذل فيها على قد ما نقدر، بس الجنسية دي هنعملها ازاي؟ لو الأب والأم مصريين، هيخلفوا ولد سويسري؟
لا..هيخلفوا ولد أمريكي، آه والله زمبؤلك كده، ده في نسبة كبيرة من السياحة في أمريكا، اسمها “سياحة الولادة” يعني الناس هدفها الوحيد الولادة في أمريكا ودي بتكون عن طريق إن الحامل بتدخل أمريكا قبل موعد الولادة، وتولد في مستشفى هناك، وترجع هي وطفلها والباسبور الأمريكي، بالسهولة دي؟
مسلسل لعبة نيوتن – الولادة في أمريكا
فكرة وتجربة الولادة في أمريكا قديمة، من قبل ظهور مسلسل لعبة نيوتن، ومن قبل مرمطة مدام منى ذكي في الحلم الأمريكي، صحيح الموضوع كان روتيني قبل كده، وكان أهم حاجة مطلوبة من الحامل إنها تجيب موافقة دكتورها على السفر، ويكون معاها تكاليف الولادة سواء طبيعية أو قيصرية، وتكاليف الإقامة بعد الولادة، وأهلا بيكي في الـ States يا مدام.
لكن بعد تولي ترامب الحكم، قال إن كده أمريكا هي البلد الوحيدة في العالم اللي بتدي الإنسان الجنسية، لمجرد إنه اتولد على أرضها، وبدأ يقنن ويقلل موضوع الجنسية بمجرد الولادة في أمريكا ده، بس كان في سيدات حوامل بيتحايلو على القانون بكذا طريقة:
منها إنها تدخل أمريكا بطريقة شرعية، بس ما تقولش انها حامل ولا إنها ناوية تولد في أمريكا، بس يكون معاها فلوس الولادة.
ومنها إنها كمان تدخل بطريقة شرعية، بس مش معاها فلوس الولادة، فتستنى لما الطلق يجيلها وتجري على أي طوارئ يولدوها مجانًا، هي صحيح بتكون وفرت الفلوس، بس عرضت حياتها وحياة جنينها للخطر، لإنها ممكن تحتاج قيصرية أو متابعة في المستشفى من قبل الولادة، بالإضافة إنها هيحصل لها مشاكل قانونية وهي طالعة من أي مطار في أمريكا، لإنها داخلة لوحدها وطالعة بطفل.
مسلسل لعبة نيوتن – الولادة في أمريكا
ليه الناس بتفكر في الولادة في أمريكا؟
- أول سبب رئيسي هو الجنسية للطفل، ومعروف إن الجنسية الأمريكية لأي شخص بتساهم في مستقبل متميز له في أي مكان في العالم.
- تاني سبب هو الرعاية الصحية المتميزة، سواء قبل أو أثناء أو بعد الولادة.
- ثالثًا البريستيج 🙂
- وفي حالات ممكن تكون الأم مزدوجة الجنسية، يعني مصرية معاها الجنسية الأمريكية فعلا بس مقيمة في مصر أو بلد عربي، وعاوزه تولد في أمريكا، بلدها وهي حرة تولد زي ما هي عاوزه.
ليه الناس مش بتفكر في الولادة في أمريكا؟
- السبب الرئيسي مادي، لإن تكاليف الولادة والإقامة مرتفعة جدًا.
- العدل بين الإخوات، سواء في طفل كبير ما أخدش الجنسية، أو احتمال مجيء طفل أصغر مش هنقدر ماديًا أو لأي أسباب تانية إننا نوفرله فرصة الجنسية الأمريكية زي أخوه.
- الانتماء، في ناس بتعارض فكرة ازدواج الجنسية، وخصوصًا للأطفال، ومالها مصر والجنسية المصرية يعني، وهكذا.
- خطر السفر على حالة الأم، وخصوصًا إذا مكانش معاها مرافق، وهتتكفل هي لنفسها بكل حاجة.
- في أهل بيكون معاهم جنسيات أجنبية تانية، والأولاد بيقدروا يكتسبوها بمجرد الوادة وبدون سفر ولا تكاليف.
- الخوف من تجارب معارف جربوا الولادة في أمريكا، ولقوا سلبيات كتير، زي منى زكي مثلا.
- عدم معرفة إن أمريكا فيها الخيار ده أصلًا.
- عاوزه أولد جنب أمي، وده سبب بيجنن الأزواج وخصوصًا لو معاهم مقدرة مادية إنه يسفر مراته تولد في امريكا.
وفي الآخر مفيش حد صح وحد غلط، وكل واحد يقدر يحسب ظروفه وإمكانياته ويقرر المناسب له، وبدون اختلاف مع الآخرين.
مسلسل لعبة نيوتن – الولادة في أمريكا
ودلوقتي قوليلنا، لو الرئيس “بايدن” سمح تاني بسياحة الولادة، ممكن تروحي تولدي هناك؟ وإيه اللي هيشجعك وإيه اللي هيخوفك؟ مع العلم إن كل اللي حاصل في مسلسل لعبة نيوتن مبالغ فيه، ومش ده اللي هيحصل لكل أم هتنوي تولد في أمريكا، إلا لو معملتش حسابها على كل التفاصيل من قبل السفر.
مع تمنياتنا ليكي بطفل سليم معافى، أيًا كانت جنسيته
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك