انتشرت أخبار على السوشال ميديا عن مسلسل اسمه موضوع عائلي دمه خفيف.. والحقيقة من كتر ما بقى تريند، كان لازم اشترك في شاهد vip عشان كان عندي فضول أعرف إيه المسلسل الجامد ده اللي كل الناس بتحكي عنه. ومن أول حلقة وقعت في حب المسلسل وأحداثه السلسة البسيطة اللي كلها كوميديا على تشويق. والمسلسل بالرغم من إنه مصنف كوميدي، لكن في شوية دروس حياتية وسط الأحداث دي بتعبر عننا في حاجات كتير.. تعالي نحكيلك أكتر عن المسلسل وأحداثه في الموضوع ده.
مسلسل موضوع عائلي
المسلسل بتدور أحداثه حول الشيف إبراهيم اللي بيتفاجىء إن عنده بنت ما كانش يعرف عنها أي حاجة. وجدها بلغ ابراهيم إن له بنت وهو في آخر أيامه عشان يخلي باله منها ومن أموالها.. ومع الأحداث وظهور باقي الشخصيات بنلاقي إنه تتكلم عن نقط مهمة وهي:
مش كل قريب حبيب
مسلسل موضوع عائلي
خال سارة اللي قام بدوره الفنان محمد شاهين كان بيحاول بشتى الطرق إنه ياخد حقها في ميراث والده، سواء بالاقناع أو بالحيلة. والمفروض إنه خالها وزي ما دايمًا بنقول الخال والد بس هو كان أبعد ما يكون عن صفة الوالد. في حياتنا أشخاص دايمًا بنفتكرهم حبايبنا وأصحابنا عشان مجرد بس صلة القرابة أو الزمالة لكنهم في الحقيقة مش كده خالص.. خلي تعاملك دايمًا بحذر ومش كل تفاصيلك مباح إنك تحكيها حتى للقريب.
5 دروس حياتية نتعلمهم من مسلسل ربع قيراط
من الحب ما قتل
بعض الأفعال اللي بتتعمل بتبقى بهدف الحب، لكن أحيانًا الحب ده بيبقى مؤذي.. جد سارة كان فاكر عشان يحميها لازم يخبي على باباها لكنه في الحقيقة بعدها عن والدها وحرمها من إحساس الاب.. نفس الكلام لما أجبر بنته إنها تسافر وتسيب جوزها ومنعها من السفر بالإجبار بحجة إنه بيحميها منه لكنه في الحقيقة أذاها أضعاف لدرجة إنها ماتت مقهورة.
اللي بيسامح بيرتاح
إبراهيم لما راح يحاول يصالح بنته، قال لها تسامح جدها وخالها والظروف اللي أجبروا عليها عشان اللي بيسامح بيرتاح.. الحقيقة إن اللي بيسامح مش بيرتاح وبس اللي بيسامح بيشيل من قلبه كل ضغينة وكره تخلي الحزن والتفكير في الموقف يزيد.
فيلم دي كابريو الجديد don’t look up يشبهنا في إيه
انسي وابعدي
إبراهيم كان بيوصي بنته سارة إنها لو مش قادرة تسامح تنسى وتبعد، وهو ده الحل الصح في حالة وجع القلب من الأذى.. مش قادرة تسامحي، انسي وابعدي. الحياة لازم تمشي ومش هتقف عند الموقف اللي حصل.. اللي حصل حصل خلاص ولو طاقتك خلصت ومش قادرة تسامحي، ابعدي خالص عشان تقدري تعيشي.
خلّي بالك من زيزى : سلوك الطفل دايمًا وراه سبب
احمر لك فرخة؟
ودي من أهم حكم الأمهات المصرية المتوحدة مع وصفاتها وتريكاتها في علاج أي حزن، انيميا، تعب وإرهاق وغيرهم كتير.. الأم المصرية الأصيلة اللي تلاقي وش بنتها / ابنها مخطوف وتقول له أقشرلك برتقانة ولا احمر لك فرخة .. مشهد كوميدي رائع عمرنا ما هننساه من الممثلة العظيمة سماء وهي بتحاول تطبطب على بنت أخوها بالفرخة المتحمرة. والحقيقة إنها بتمثل 90% من الأمهات المصرية اللي قلبها أبيض ونيتها كلها خير وهي بتحاول تراضي ولاده بأي طريقة ممكنة عشان الزعل والهم يروح.
التعليق باستخدام حساب فيس بوك