محتويات المقال
ولادنا بيعيشوا عمرهم من أول يوم في حياتهم بيتعلموا ويجربوا بالفطرة، ربنا خالقهم قلبهم جامد لسة مش بيخافوا زينا ولا يعرفوا يقدروا الخطر أو الغلط تقدير كافي! وللأسف اوقات بسبب خوفنا عليهم وردود أفعالنا ناحية مشاكل الأطفال والتحديات اللي بتحصلهم بنبدا ندخل جواهم الخوف مننا وإحنا مش قاصدين ده! ويبدؤا كل ما يكبروا بعد ما كانوا بيحكوا بمنتهي الحماس يخافوا ويقلقوا من رد فعلنا حتي لو إتحطوا في موقف كانوا فيه الضحية، بس خلاص مجرد ما دخل في قلبهم توتر وقلق مننا ومن رد فعلنا بيفكروا ألف مرة قبل ما يطلبوا مساعدة مننا أو يستنجدوا بينا.
وزي ما دايما بنقول إحنا مش بإيدينا نحمي ولادنا طول الوقت، لكن بإيدينا نقويهم وندعمهم ونبقي في ضهرهم موجودين وحضننا جاهز ومستنيهم. وده مش هيحصل غير لما الطفل يفضل متطمن من ناحيتنا وإنه مهما حكي لنا فإحنا هنبقي معاه مش عليه، في شهره مش واقفين في وشه.
عشان كدة في مقال النهاردة هقولكوا علي اكتر حاجات بنعملها بدافع حماية او خوف علي ولادنا بس ممكن تكون بتبني حواجز كبيرة مع الوقت تخليهم يلجؤا لغيرنا، مشاكل الأطفال مش بتخلص، يا ترى ليهم ممكن ميحكوش!؟
-
الهجمات المفاجئة:
المربي اللي بيطلع طلعات عصبية مفاجئة كدة، أوقات بسبب وأوقات بدون سبب حتي يستاهل، بتخللي الطفل معندوش ثقة في رد فعل المربي اتجاه الموقف اللي هو فيه، وبتخليه كمان متلخبط بين الصح والغلط لأن مفيش دايما رد فعل واحد واضح إتجاه المواقف المختلفة في حياتهم، وبالتالي الطفل بيقرر إنه يأثر السلامة ومايحكيش أصلا المشكلة اللي هو فيها لأنه مش ضامن رد فعلنا.
-
النقد المستمر:
لما بننتقد كل تنتوفة الطفل بيعملها ونعلق عليها، لما نفضل نعدل في تصرفاته وندي محاضرة مع كل موقف يحكيه وننصح من غير ما يطلب النصيحة، فيتقفل ويبطل يحكي من أساسه.
-
الأحكام المطلقة:
“هببت إيه خلاك تتحرم من البريك”\ “قولت لصاحبك إيه زعله ما أنا عارفاك” \”أكيد عملت مصيبة من مصايبك خللي الكابتن يعاقبك”.
الحكم علي الطفل إنه بتاع مشاكل وإنه السبب الأول والرئيسي في أي مشكلة يقع فيها، بيخليه خايف يلجأ لنا ويطلب مساعدتنا لأحسن نقوله إنت برده السبب.
-
الموضوع مش مستاهل:
كام حد فينا سمع الجملة ده وهو صغير او حتي وهو كبير وبيحكي لحد عن حاجة مضايقاه؟
بيتهيألي محدش نفد منها غالبا! جملة زي ده ممكن نقولها بدون وعي لولادنا وهما بيعيطوا أو محموقين أوي من كلمة حد قالهالهم بس هي كفيلة تقفل الطفل من الكلام معانا أصلا!
الطفل مش محتاج مننا غير:
– التقبل المستمر والغير مشروط اللي يحسه مننا، محتاج أب وأم بيسمعوه بإهتمام وبنسيب اللي في إيدينا عشان نركز وهو بيحكي من غيرما ننط بسرعة علي نصايح وهو مش مستعد يسمعها، محتاج مننا إقرار مشاعر لما يجي بيعيط من مشكلة بدل إتهامنا له إنه سبب في المشكلة او التقليل من اللي حاسه.
مهما كان الموقف اللي هو فيه أو حتي المشكلة اللي فيها، عشان يتطمن ويحس بالأمان ناحيتنا وإنه يعرف يتكلم في أي حاجة في اي وقت ويجري علينا لأننا دايرة الأمان اللي ما بتتقطعش.
التعليق باستخدام حساب فيس بوك