مشاهدة الأطفال لمسلسلات رمضان: إيه ينفع وإيه لا؟

رمضان السنة ده مختلف عن كل سنة، وغصب عننا وقت الشاشات زاد مش بس لولادنا، ده لينا كلنا كمان. والتلفزيون بصراحة في رمضان مش مقصر معانا في حاجة، من مسلسلات كوميدية لدراما لوطنية لبرامج مقالب بكل أشكالها. بس للأسف، المضمون والرسايل اللي بتوصل لولادنا عن طريق التلفزيون مش كلها مضمونة، ومش أحسن حاجة نحب ولادنا يستقبلوها من أول سن السنتين لحد سن المراهقة كمان. والمشكلة طبعًا مش في رمضان بس، المشكلة طول أيام السنة، طول ما فيه تليفزيون. لكن بيزيد التفاتنا له في رمضان عشان موسم للمسلسلات والبرامج.

في بيتنا مثلًا، من زمان واحنا مانعين برامج المقالب المؤذية واتناقشنا مع ابني اللي عنده 8 سنين وفهمناه الأسباب لحد ما بقى هو نفسه رافضها ومش عايز يشوفها. رمضان اللي فات لما كنا بنبقى معزومين على الفطار ويشتغل برنامج زي كده، كان ابني بيبقى معترض جدًا عشان خلاص مقتنع إن ده حاجة مؤذية وما بتضحكش، بس رمضان ده، لقيت نفسي باسأل طب وبعدين هاقنعه بإيه ولا إيه؟

كل ما نيجي نفتح مسلسل شكله كده مناسب للأطفال، يا إما نلاقي مكتوب عليه +12، يا إما نلاقي فيه ألفاظ مش مناسبة أو طريقة كلام ما أحبش إن ابني يقلدها، يا إما مشاهد ضرب أو عنف أنا عارفة ومتأكدة من خلال دراستي وقراءاتي إن مش صحي للأطفال يشوفوها.

الحقيقة، فيه بيوت حاسمين الموضوع ده بإنهم قافلين التلفزيون خالص ومش بيعرضوا أطفالهم لفكرة المسلسلات من أساسه. طبعًا أنا باحييهم على صرامتهم، بس أنا ما أقدرش أعمل كده وعارفة إنه صعب على ناس كتير، بالذات إنه من أكبر وسائل الترفيه بالنسبة لنا دلوقتي في الحظر، ده غير إني ضد فكرة المنع والفصل التام، لإن الولاد بتكبر ومصيرهم هيشوفوا ويعرفوا كل حاجة والأحسن إنهم يتعرضوا لها تحت إشرافنا في البيت.

فلقيت إنه أسلم حل في موضوع مسلسلات رمضان والتلفزيون عمومًا هو إننا ندوّر على أكتر محتوى لطيف وخفيف ممكن ولادنا يشاركونا فيه واحنا بنتفرج عليه بس نكون مركزين ومصحصين للي بيتقال وبيتعرض قدامهم، ونهتم إننا نكون فاتحين حوار رايح جاي ما بيننا وبين الولاد باختلاف أعمارهم ونسمع منهم رأيهم في اللي شايفينه ونقول رأينا ونصحح المفاهيم والرسايل اللي بتدخل عقولهم ونحاول ناخد الجزء اللايت المسلي من المسلسلات ونطلع برضه في الآخر بفايدة وبحوار مفتوح وحاجات نعرف نعلمها ونصححها لولادنا في قعدة زي قعدة الصحاب من غير محاضرات ولا تنظير.

عشان كده باشجع كل أب وأم إننا نكون واقعيين وما نضغطش على نفسنا بس في نفس الوقت ما نسيبش ولادنا أبدًا فريسة للميديا والرسايل المخفية اللي ممكن يشوفوها كوول من وجهة نظرهم وتفضل مأثرة عليهم باقي عمرهم.