محتويات المقال
مشروبات صيفية زي العصائر الطبيعية والسموزي محبوبين جدًا في الصيف مش بس عشان نستمتع واحنا بنشربهم ونحس بالانتعاش، لكن كمان عشان الفوائد اللانهائية الموجودة في المكونات بتاعتها فبتساعد على زيادة وتقوية المناعة. العصاير ممكن تكون طريقة ممتازة جدًا عشان ندخل بيها عناصر غذائية مفيدة لنظامنا الغذائي، مش بس لينا لكن كمان لأطفالنا اللي طبعًا بيعشقوا العصائر الساقعة اللذيذة. كوباية العصير ممكن تتقدم للأولاد كوجبة متكاملة على الفطار أو العشا أو زيادةكسناك بين الوجبات، وده لإن ممكن نخبي جواها عناصر كتير قوي مفيدة لهم زي:
- السبانخ والكيل والخضروات الورقية.
- أنواع الفواكه اللي ممكن يكونوا ما بيحبوش ياكلوها، ممكن نخلطها مع أنواع تانية بيحبوها فيحصلوا على كل الفوايد بتاعتها.
- زبدة المكسرات زي زبدة اللوز وزبدة الفول السوداني.
- منتجات الألبان المختلفة زي الزبادي، اللبن، اللبن الرايب، أو حتى الألبان المناسبة للأطفال اللي عندهم حساسية ألبان زي لبن اللوز ولبن جوز الهند مثلًا.
- الشوفان وجنين القمح والبذور المختلفة زي بذر الكتان اللي بيعتبر مصدر نباتي غني جدًا بالبروتين وله فوائد مالهاش عدد.
أهم حاجة إننا نحاول على قد ما نقدر ما نستخدمش السكر الأبيض في تحلية العصاير ونحاول نعتمد على السكر الطبيعي الموجود في الفواكه، أو أي مصدر طبيعي للتحلية زي العسل الأبيض أو التمر.
عشان كده، النهارده، هنقدم لك 5 أنواع مشروبات صيفة من العصائر والسموزي مش بس لذيذة في طعمها، لكن كمان غنية بفوايدها لتقوية وزيادة مناعة أطفالك، جربيها وقولي لنا إيه أكتر وصفة حبيتيها.
مشروبات صيفية منعشة لزيادة وتقوية المناعة
-
سموزي البطيخ بالنعناع ولبن جوز الهند
مشروبات وعصائر لتقوية المناعة – المصدر runninginaskirt
البطيخ هو ملك فاكهة الصيف وملك الانتعاش والترطيب وكمان فوائد البطيخ هايلة لصحتك ولزيادة مناعتك.
أهم فوائد البطيخ:
- غني جدا بالفيتامينات زي فيتامين A-c-b1-b5-b6، وكمان غني جدًا بالمعادن ومضادات الأكسدة.
- له خواص مضادة للالتهاب ومكافحة العدوى والفيروسات.
- يتميز بفوايده لصحة الشعر والبشرة.
- بيساعد على تخفيف ألم العضلات عشان كده مفيد جدًا لأي شخص بيمارس الرياضة.
مع إضافة النعناع ورشة خفيفة من الكركم المعروف بفوايده العظيم لتحسين وتقوية المناعة، ولبن جوز الهند هيتنقل السموزي نقلة تانية، مش بس في الطعم لكن كمان في الفوايد الصحية.
المقادير
- 3 أكواب بطيخ بدون البذور
- 1/2 كوب لبن جوز الهند
- عصير ليمونة
- أوراق النعناع
- عسل أبيض حسب الرغبة
- 1/4 معلقة كركم مطحون
- مكعبات تلج
طريقة عمل سموزي البطيخ بالنعناع ولبن جوز الهند
- في خلاط خاص بالسموزي، ضيفي كل المكونات وإضربيها كويس وحليها بالعسل الأبيض حسب الرغبة.
- قدميه فورا وزينيه بأوراق النعناع.
-
سموزي التوت مع الحمضيات
سموزي التوت لتقوية المناعة – المصدر thenourishedmin
التوت بأنواعه له فوايد عظيمة لتحسين المناعة وتقويتها. في المشروب ده، مش بس هنكتفي بفوائد التوت لكن كمان هنضيف عناصر تانية هتعزز التأثير زي الليمون والبرتقان اللي طبعًا معروف عنهم غناهم بفيتامين c.
أهم فوائد التوت
- جميع أنواع التوت غنية جدًا بفيتامين c المعروف بأهميته للجسم لمقاومة الأمراض.
- تقليل الالتهابات، ومكافحة العدوى وتعزيز المناعة.
- لها تأثير مضاد للفيروسات بيعمل على تخفيف أعراض البرد.
- غنية جدًا بمضادات الأكسدة.
المقادير
- 2 كوب توت مشكل مجمد
- 1/2 كوب عصير برتقان
- 1/4 كوب عصير ليمون
- 3/4 كوب زبادي
- 1/2 كوب ماء أو لبن
- عسل أبيض للتحلية حسب الرغبة
- تلج حسب الرغبة
طريقة عمل سموزي التوت
- في خلاط خاص بالسموزي، ضيفي كل المكونات واضربيها كويس وحليها بالعسل الأبيض حسب الرغبة.
-
سموزي البينا كولادا الأخضر
مشروبات صيفية لزيادة المناعة – المصدر pinterest
عشاق النكهات الاستوائية هيحبوا المشروب ده جدًا. المشروب ده أكتر من رائع لإنه مش بس بيجمع بين الأناناس وجوز الهند، ودي توليفة مشهورة جدًا من النكهات بتليق قوي مع بعض. لكن كمان إضافة السبانخ، أو أي نوع من الورقيات الخضرا، هيضيف لون أخضر رائع وفوايد صحية هايلة. والأهم إن نكهته مش هتبان قوي في العصير.
أهم الفوائد الأناناس الصحية
- غني بمضادات الأكسدة.
- يحتوي على إنزيمات بتساعد في تحسين عملية الهضم بشكل كبير.
- مليان بالفيتامينات والمعادن والإنزيمات اللي كلها بتعزز مناعة الجسم وتقاوم الالتهاب.
- في دراسات اتعملت على الأطفال، وجدت إن الأطفال اللي بيدخلوا الأناناس في نظامهم الغذائي أقل عرضة للإصابة بالعدوى الفيروسية والبكتيرية.
- الخصائص المضادة للأكسدة في الأناناس بتخفف من أعراض مرض التهاب المفاصل.
أما بالنسبة لإضافة السبانخ للسموزي، ده بيدي قيمه غذائية عالية جدًا، لإن السبانخ والورقيات عمومًا غنية جدًا بالألياف والفيتامينات زي فيتامين A-c-k، وكمان غنية جدًا بالكالسيوم وحمض الفوليك.
المقادير
- 1 كوب أناناس مقطع مكعبات (يفضل يكون مجمد)
- 1/2 كوب زبادي أو لبن رايب
- 1 كوب لبن جوز الهند
- 1/4 كوب جوز هند مبشور
- 1 كوب سبانخ أو كيل أو جرجير أو مزيج من التلاتة
- عسل أبيض حسب الرغبة
- تلج حسب الرغبة
طريقة سموزي البينا كولادا الأخضر
- في خلاط خاص بالسموزي، ضيفي كل المكونات واضربيها كويس وحليها بالعسل الأبيض حسب الرغبة.
-
سموزي المانجو غير العادي
سموزي المانجو – مشروبات لزيادة المناعة – المصدر livesimply
في بعض المناطق في العالم، بتسمي المانجو “ملكة الفواكه”، وده مش بس عشان طعمها الرائع لكن عشان فوائد المانجو الصحية لجسم الإنسان كتير أوي.
أهم فوائد المانجو
- تحتوي المانجو على أكثر من 12 نوع مختلف من مادة البوليفينول اللي بتعمل عمل مضادات الأكسدة داخل الجسم.
- تحتوي المانجو على مجموعة كبيرة من الفيتامينات زي فيتامين: A-B-C-E-k، وهي كمان مصدر رائع لحمض الفوليك وكل العناصر دي بتساهم في تعزيز المناعة بشكل كبير.
- تحتوي المانجو على المعادن المهمه جدًا لصحة الجسم وخصوصًا صحة القلب زي المغنيسيوم.
اللي بيخلي السموزي ده غير عادي في فوايده هو العناصر المضافة عليه غير المانجو نفسها، زي عصير البرتقان الغني بفيتامين سي، والكركم وفوايدة الرهيبة لتقوية المناعة، له تأثيرات مضادة للأكسدة ومضادة للالتهابات ومضادة للبكتيريا وبتساعد على التئام الجروح. في الحقيقة، تقدروا تضيفوا منه رشة بسيطة لأي سموزي عشان ترفعوا من قيمته الغذائية مش بس مع النوع ده من السموزي. أما بالنسبة للبن اللوز، فمش لازم نكون بنعاني من حساسية ألبان أو اللاكتوز عشان نشربه وندخله في نظامنا الغذائي لإنه له فوايد كتير جدًا لصحتنا ولتقوية المناعة.
المقادير
- 2 كوب مانجو (يفضل تكون مجمدة)
- 1 موزة مجمدة
- 1/2 كوب عصير برتقان
- 1 كوب لبن اللوز (يمكن إستبداله بلبن بقري عادي أو رايب)
- 1/4 معلقة صغيرة كركم
- 1/4 معلقة صغيرة قرفة
- عسل أبيض حسب الرغبة
- تلج حسب الرغبة
طريقة عمل سموزي المانجو غير العادي:
- في خلاط خاص بالسموزي، ضيفي كل المكونات واضربيها كويس وحليها بالعسل الأبيض حسب الرغبة.
لو عايزة تعملي تورتة الآيس كريم على طريقة الشيف غادة التلي، ادخلي هنا.
-
الشاي المتلج بالليمون والجنزبيل
مشروبات صيفية صحية لزيادة المناعة – المصدر thekitchenmuseng
مشروب الشاي المتلج مشروب منعش جدًا في فصل الصيف والشاي بأنواعه له فوايد صحية كتير جدًا سواء الشاي الأسود أو الأخضر تقدري تستخدمي النوع اللي بتحبيه. وطبعًا إضافة الليمون والجنزبيل والكركم والعسل الأبيض كل دي مكونات بتعزز فوايد المشروب وبتضيف للجسم عناصر كتير تعزز مناعته.
فوائد الشاي الأسود للصحة العامة
- يحتوي الشاي الأسود على ماده ألكيلامين، ودي لها علاقة مباشرة بتقوية جهاز المناعة.
- مفيد جدا للتحكم في نسبة السكر في الدم، بشرط شربه بعد الوجبات ب45 دقيقة على الأقل.
- بيحسن من صحة الأمعاء.
المقادير
- 4 باكيت شاي أحمر أو أخضر
- 1 لتر من الماء المغلي
- عسل أبيض للتحلية حسب الرغبة
- 1/4 كوب عصير ليمون
- 1/4 معلقة كركم
- أوراق النعناع
- شرايح ليمون إيطالي
- شرايح من الجنزبيل
طريقة عمل الشاي المتلج بالليمون والجنزبيل:
-
- في بولة كبيرة ضيفي كل المكونات ما عدا العسل الأبيض وضيفي عليهم الماء المغلي.
- سيبي المزيج يبرد تماما وضيفي مكعبات من التلج عشان تسرعي عملية التبريد وحلي الشاي بالعسل حسب رغبتك.
- صبي المزيج في زجاجة، أو إبريق للتقديم، وسيبيه يبرد في التلاجة ساعتين يبرد قبل التقديم، وقدميه مع مزيد من التلج.
التعليق باستخدام حساب فيس بوك