لو أكلك حلو ونفسك خطير، وكل أصحابك طول الوقت بيقولوا لك: “يا بنتي انتي لازم تفتحي مشروع أكل بيتي”، لأنه مشروع ناجح ومربح وبيحتاج رأس مال قليل، يبقى المقال ده مهم جدًا ليكي! إنك تفتحي مشروع أكل من البيت دي مهمة بتحتاج منك قدرات ومهارات تانية كتير غير مهاراتك في الطبخ ونفسك الحلو في الأكل.
عشان راحة بالي دايمًا يهمها إنك تكوني ناجحة في أي مجال وتحققي ذاتك، قررنا النهارده ننقل لك مجموعة نصايح ذهبية بتقدمها الشيف سمر كمال وهي شيف معتمدة دوليًا ومتخصصة في تنسيق وتطوير وابتكار منيوهات المطاعم والكافيهات.
شيف سمر نشرت سلسلة فيديوهات على صفحتها على الإنستاجرام عن مشاريع الأكل من البيت وازاي تبدأي بداية ناجحة بأبسط الإمكانيات ورأس مال قليل، وازاي تقدري تكتبي منيو بسيط وناجح يساعدك على بداية مشروعك بثقة، وده ملخص مبسط للفيديوهات إللي قدمتها شيف سمر لمساعدة كل ست حابة تبدأ مشروعها الخاص.
الشيف سمر – مشروع أكل من البيت خطوة بخطوة
ادخلي على اللينك ده عشان تشوفي فيديوهات شيف سمر لمشروع الأكل البيتي كاملة.
الفرق بين المطعم ومشروع الأكل البيتي
- في المطعم، بنعيش حالة كاملة، المكان نفسه، الديكور، الأجواء والموسيقى، الخدمة، كل دي عوامل لا تقل أهمية عن جودة الأكل نفسه.
- أما مشروع الأكل من البيت له طبيعة مختلفة. الخدمة الوحيدة المقدمة من خلال مشروع الأكل البيتي هي الأكل نفسه. عشان كده، فيه 3 عوامل أساسية مهمة جدًا لازم تكون متوفرة في مشروع الأكل من البيت عشان المشروع يكون ناجح والزبون يطلبك بالاسم:
- طعم الأكل حلو.
- سرعة خدمة التوصيل.
- السعر مناسب لنوع الأكل إللي بتقدميه ولطبيعة السوق والزبون إللي هيشتري منك.
أهم النصائح قبل ما تبدأي مشروع أكل من البيت
- تحديد نوعية وطبيعة الأكلات المقدمة من خلال مشروعك
- هل هتقدمي أكل سخن جاهز للأكل في صورة وجبات فردية مثلًا؟ ولّا هتقدمي مجمدات وأكلات للستات العاملات زي المقبلات المختلفة والأكلات الجاهزة على القلي أو التسوية فقط؟ ولا هتقدمي أكل للعزومات بكميات كبيرة؟
- لكل نوع من الأكلات دي طبيعة وتجهيزات خاصة واستعدادات مختلفة. عشان كده، لازم تحددي نوع واحد فقط في البداية وتحددي على أساسه باقي خطواتك.
- تحديد فئة العميل الموجه له مشروعك
يعني لازم تكوني عارفة بالظبط طبيعة مشروعك موجهة لأي فئة من العملاء، لإن على الأساس ده هتقدري تحددي الأصناف وتكلفتها وكمان الأسعار المناسبة للشريحة إللي هتختاريها.
- التسويق لمشروع الأكل البيتي
وده عامل مهم جدًا من عوامل نجاح أي مشروع. وهيتطلب منك في بداية المشروع إنك تتعلمي بعض المهارات المهمة لعملية التسويق، زي:
- إنك تعرفي ازاي تنسقي المنيو.
- ازاي تبدأي في بناء صفحات لمشروعك على السوشيال ميديا بشكل منسق ومنظم.
- تتعلمي أساسيات تصوير الأكل عشان تقدري تعرضي شغلك بشكل لائق ومشهي. طبعًا تقدري تستعيني بخبير عشان يقوم لك بكل الأعمال دي بس في بداية أي مشروع بسيط بنحتاج جهود ذاتية وخصوصًا لو الإمكانيات المادية مش متاحة.
ادخلي على اللينك ده لو حابه تتعرفي على أساسيات تصوير الأكل زي المحترفين
عوامل كتابة منيو مشروع الأكل البيتي
مشروع أكل بيتي – المصدر: pinterest
- مساحة التخزين:
- مهم جدًا إنك تراعي قدرات مطبخك وإمكانياته، ومن أهم الإمكانيات دي هي مساحة تخزين الأطعمة زي التلاجة، الفريزر، مساحة تخزينية للمنتجات الجافة، المسطحات إللي هتشتغلي عليها وتجهزي أكلك وتغرفيه وتغلفيه.
- لازم تفكري في كل الإمكانيات دي قبل البدأ في المشروع عشان تبدأي بداية ناجحة. قدرات مطبخك وإمكانياته هي إللي هتحددي على أساسها حجم الشغل إللي هتقدري تقومي بيه وده هيساعدك ما ترهقيش نفسك بعدد كبير من الأوردرات ممكن ما تقدريش توفيها.
- روح المنيو لازم تكون واحدة: بحيث المنيو يكون كله متناسق مع بعضه وله هوية معينة بلمستك الخاصة إللي هتخليه يتميز عن غيره.
- تقليل التجهيزات على قدر الإمكان: يعني تستغلي نفس المنتج إللي حضرتيه بطرق مختلفة وفي أصناف مختلفة، مثلًا يفضل في بداية تشغيل المشروع إنك تجهزي نوع واحد من الرز، وشكل واحد من المكرونة، نوع واحد أو إتنين من الدريسينج للسلطات، وده مهم جدًا لتسهيل عملية التشغيل وتقليل المجهود خصوصًا مع ضغط الطلبات.
- مراعاة تقليل المشتروات (الخامات المستخدمة): النقطة دي مكملة للنقطة السابقة، وهتساعدك في تسهيل عملية التشغيل وكمان في تقليل المساحة التخزينية إللي هتحتاجيها لكل مكوناتك، كل ما تكون مكوناتك قليلة هتحتاجي مساحة تخزينية أقل وهتقللي وقت وجهد عملية التجهيزات، وكمان هتوفري في التكاليف.
ادخلي على اللينك ده عشان تتعرفي على 10 منتجات من السوبر ماركت هتوفر لك وقتك ومجهودك
- اختيار الأطباق سهلة التوصيل: لازم تفكري كويس
هل الطبق ده مناسب للتوصيل؟ هل هيوصل للزبون سخن وفي حالة جيدة؟ هل لو اخترت صنف من المقليات مثلًا مع التغليف والتوصيل هيوصل مقرمش وسخن وفي أفضل حالاته؟ ولا هيطرى ويسبب مشكلة مع الزبون؟
كل دي أسئلة مهمة جدًا لازم تسأليها لنفسك، لإن سلامة وصول الأطباق للزبون عامل مهم جدًا من عوامل نجاح مشروعك.
- مراعاة تكلفة الأطباق وتحقيق ربح مناسب من كل طبق: اعتمدي دايمًا على تكنيك الطبخ نفسه لعمل أطباق ناجحة، بدل ما تعتمدي على شراء مواد خام غالية جدًا هتزود تكلفة الطبق وده هيأثر على نسبة مكسبك منه.
لو عاوزة تبقي محترفة في فنون الطهي، ادخلي على اللينك ده عشان تعرفي أهم أماكن كورسات الطهي في مصر
- ابعدي عن الاختراعات في بداية مشروعك: اختاري أصناف بسيطة ومعروفة للغالبية العظمى من الناس، وقدميها بطريقتك وبلمستك الخاصة، وابعدي عن الابتكارات والاختراعات في الأكل خصوصًا في بداية المشروع، واستني لحد ما مشروعك يشتغل والناس تعرفك وتثق فيكي وبعدها ضيفي أصناف جديدة مبتكرة بالتدريج.
- عبوات التغليف: لازم تكون محكمة الغلق، مناسبة لخدمة التوصيل، وبتحتفظ بالحرارة لمدة مناسبة، شكلها مقبول ومناسب. يفضل كمان إنك تختاري علب التغليف مناسبة لأغلب الأصناف الموجودة عندك بحيث ما تكونيش مضطرة تشتري أصناف وأحجام كتير من عبوات التغليف وده هيوفر وقت وجهد وتكلفة.
- الاهتمام بخدمة توصيل الطلبات (الدليفري): لازم تهتمي بجودة خدمة التوصيل وتختاريه بعناية عشان هو ده إللي هيحافظ على وصول أكلك سخن وفي أحسن حالاته للزبون.
- المتابعة مع العملاء: التواصل مع العميل مهم جدًا عشان ده بيوصل له اهتمامك بيه، وبيبني ثقة بينك وبينه، وبيوسّع دايرة علاقاتك، وكمان رأي العميل هيساعدك في تحسين جودة الأكل والتغلب على أخطائك والاستفادة منها.
ممكن هنا كمان تأخدي فكرة عن أفكار مشاريع صغيرة مربحة وناجحة من المنزل
في النهاية، بنتمنى لك النجاح في مشروعك، ودايمًا حاولي تستفيدي بخبرات إللي حواليكي واسألي واطلبي المساعدة من المتخصصين عشان تبدأي بداية قوية، وكمان تحافظي على نجاح مشروعك واسمراريته.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك