واحدة من أكتر المشاعر الهدامة لأي علاقة أيًا كانت هي مشاعر الشك، بمجرد ظهورها على السطح فتصرف الأطراف القائمين على العلاقة بيكون غير عاقل، متهور، وببساطة الطريق ده آخره انتهاء العلاقة دي وتدميرها، إلا لو حصلت وقفة وتراجع عن الشك خصوصًا لو مافيش أدلة واضحة وصريحة تدعم إحساس الشك ده.
خلينا كسيدات نعترف إن فيه فئة مننا بطبيعتها شكاكة جدًا، يمكن ده نابع من شعور داخلي جواها بضعف شخصيتها، وهي بتحمي نفسها إنها تفضل حاطة كل اللي حواليها محل اتهام، والشخصية اللي من النوع ده دايمًا حاسة إنها ضحية، وإن كل اللي حواليها ذئاب بشرية. حقيقي بيكون التعامل معاها في غاية الصعوبة، وبتكون فعلًا محتاجة متخصص تعديل سلوك، علشان هي مش بس بتعذب نفسها إنما كمان كل اللي حواليها.
بس لو إنتي في علاقتك الزوجية حاسة إنك بتشكي في جوزك ومش معاكي دليل ملموس، مجرد حدس كده أو أصبح معاكي دليل واضح وصريح، فالعصبية أخر حاجة ينفع تستخدميها في الموقف اللي زي ده. هاقول لك شوية نصائح تساعدك في ازاي تديري الموقف ده.
الشك في الزوج بالخيانة .. نصائح للنقاش مع الزوج في مخاوفك
- اكتبي كل أفكارك على ورقة.
- اختاري مكان لطيف وهادي إنتم الاتنين بترتاحوا فيه.
- اختاري الوقت المناسب ليكم إنتم الاتنين تكونوا مستعدين وقتها للكلام.
- مهم قوي تعبري لزوجك عن حبك واحترامك ليه، ويكون كلامك واضح مافيش فيه تلميحات عن مخاوفك وشكوكك.
- اشرحي سبب رغبتك في إجراء المحادثة دي.
- وضحي إن قصدك هو التوضيح بس، دي مش جلسة اتهامات.
- حددي كويس جدًا سلوكيات جوزك اللي خلتك تحسي بالتوتر أو الشك من ناحيته.
- استعدي لأي رد فعل من جوزك، وحاولي انتي إنك تكوني هادية على قد ما تقدري، علشان القعدة دي ممكن تتحول لحرب لو إدارتها فشلت.
- بعد ما تقولي كل اللي عندك، اسمعي لزوجك من غير أي ضغط منك، اسمعيه من غير مقاطعة.
- لو اقتنعتي بكلام زوجك، اعتذري له بكل بساطة، واتفقي معاه إنكم مع بعض هتستعيدوا ثقتك فيه من أول وجديد، مع وعد بعد الاستسلام لشعور الشك تاني.
طب لو طلع بيخونك فعلًا؟ قولي لنا ازاي قفشتي خيانة جوزك
علاج شك الزوجة في الزوج .. ازاي تستعيدي ثقتك في زوجك
- على الزوجة فهم حقيقة مشاعرها وتوقعاتها وتحللها، بحيث تحط إيديها على منطقية وصدق المشاعر والتوقعات دي.
- على الزوجين إنهم يمنحوا بعض المساحة واحترام خصوصية الطرف الآخر لسبب بسيط، إحنا بشر مش أملاك لبعض. فبالتالي الشعور بالحرية والخصوصية المتقدرة في إطار العلاقة الزوجية بيساعد على استمرارها بشكل صحي.
- التواصل الجيد بين الزوجين من أهم طرق استعادة الثقة تاني بين الطرفين، وده لأن التواصل سواء الجسدي أو لغوي بيرجع بينكم تاني خطوط الحياة، هترجعوا تعرفوا بعض تاني من أول وجديد وهتفتكروا حبيتوا بعض ليه من الأول، وكمان هتكتشفوا اكتر عن نفسكم وعن بعض.
- الزوج يستحق ياخد الوقت والفرصة علشان بكتسب ثقة زوجته من تاني، الثقة بناء بيتبني بالتدريج وبالصبر. علشان كده، لو حصل أي هدد في جدار الثقة، فرجوعه من تاني بياخد وقت ومجهود.
- لازم تتفقوا على إيه هي حدود كل واحد مع التاني وإيه الممنوع على كل طرف إنه يعمله أو يتعداه. النقطة دي مش غريب وجودها بين الأزواج، مش معنى إننا متجوزين يبقى مافيش حدود، لا طبعا فيه، وتحديدها من البداية بيختصر مشاكل كتير قوي بجد.
- اطلبوا الاستشارة من أخصائيي العلاقات الزوجية، الاستعانة بمتخصص خطوة إيجابية وناضجة جدًا، خصوصًا لما الطرفين يحسوا إنهم استنفذوا كل الحيل والموقف واقف عند حيطة سد. علشان كده، بتيجي لحظة الاستعانة بمتخصص علشان دايمًا هيكون معاهم الطريق اللي من خلاله هتقدروا تكملوا مع بعض.
الحياة الزوجية مش سهلة، وإدارة العلاقات طويلة الأمد زيها بيحتاج مهارات حقيقية. حاليًا سهل جدًا تتعلموا المهارات دي مع بعض، لإن الزواج يستحق إنه يتبذل فيه مجهود للحفاظ عليه واستمرار بقائه.
التعليق باستخدام حساب فيس بوك