الطفرة اللي حصلت للأسعار في مصر، واضحة وأثرت على الكل، سواء كانت أسباب الغلاء حقيقية، أو بعضها بسبب جشع التجار، ده غير إنها أثرت بشكل كبير على الاستيراد، فكتير من المنتجات اللي متعودين عليها، ما بقتش متوفرة، ولو اتوفرت بدائل لها بتكون غالية جدًا. وده هدد الميزانية الشهرية للبيت أو زي ما بنقول “مصروف البيت”. وفي المقال ده هنقول لك على نصايح، تساعدك إنك تتجاوزي الغلاء ده، بأقل خسائر مادية ونفسية ممكنة.
-
حددي احتياجاتك
لستة الاحتياجات دي، رغم إنها ممكن تكون مملة بالنسبة لستات كتير، إلا إنها مهمة جدًا، سواء كانت في احتياجات الأكل والشرب، أو الملابس وغيرها، وده مش هتقدري تحدديه غير بالفرز الدائم للحاجات اللي عندك. فمثلًا لو عندك خضار في التلاجة، لازم تكوني عارفة قبل ما تطلبي خضار جديد، وهكذا.
5 أفكار لـ توفير مصروف البيت والميزانية
-
قللي الهدر
- اعملي أكل بكميات مناسبة لأفراد الأسرة، بحيث ما يتبقاش منه حاجة، وبالتالي ما يتعرضش للهدر والرمي.
- ما تجيبيش هدوم إلا وانتي متأكدة من مقاساتها، بحيث لو طلعت كبيرة هيتعطل لبسها، ولو صغيرة هتبيعيها بخسارة أو هتتحول لكراكيب.
- علمي أولادك يطفوا نور الأوضة اللي مش موجودين فيها، وطبعًا تكييفها.
- جمعي الغسيل وصنفي ألوانه وخاماته، بحيث تقدري تعملي دورات غسيل متكاملة، لإن ده هيوفر عليكي في الكهربا، ولو ده مش متوفر، ممكن تجيبي مناديل حماية الألوان من البهتان، وتحطي ألوان كتير مع بعض.
-
وفري في التنقلات
- سواء بتستخدمي عربية أو أوبر، جمعي احتياجاتك مرة واحدة في أماكن قريبة.
- أفراد الأسرة ينسقوا مع بعض مشاويرهم، لإن ممكن يكونوا اتنين رايحين مكانين قريبين جدًا، ومع كده كل واحد واخد أوبر لوحده.
- استخدمي الأبلكيشن الموفرة زي إن درايفر، وديدي.
-
اعتمدي على نفسك
معروف إن أي خدمة هتطلبيها جاهزة، هتكلفك أكتر مما انتي تعمليها بنفسك، فمثلًا قللي من الأكل الجاهز، واطبخي انتي في البيت، حتى لو أكل بسيط، وعلشان تسهلي المهام دي على نفسك، علمي أولادك يساعدوكي. اعرفي الأعمال المنزلية للأطفال حسب كل سن
-
حمّلي أفراد البيت المسؤولية
اعملي ميتنج مع كل أفراد البيت، وناقشي معاهم الوضع، وفهميهم مثلا إن ميزانيتنا للبيت قيمتها كذا، ومتطلباتنا كذا، ففكروا معايا ازاي نوائم ما بين ميزانيتنا ومتطلباتنا، وادرسي اقتراحاتهم بشكل جاد، وقولي لهم اقتراحاتك، واوصلوا لاتفاق بينكم كلكم، علشان تنجّحي الخطوات اللي هتمشي عليها لتنظيم الميزانية.
-
خلي عندك يقين في رزق ربنا
وده قبل وبعد كل اللي قولناه، خدي بالأسباب، واسعي ودبّري وخططي، لكن ما تقلقيش من الرزق، ولا تهلعي وتقلقي البيت كله، رزقكم جاي لكم بغلاء أسعار أو بدون.
-
الصدقة
الصدقات سحر في الرزق والبركة، مش شرط يجي لك رزق زي اللي تصدقتي بيه، بس ممكان يجيلك على شكل بركة في بيتك، أو ربنا يعافيكي ويعافي أولادك، من حاجة كانت هتصيبهم وتدفعي عليها فلوس كتير. تصدقي وانتي نيتك التوسيع على الفقراء، وتفريج الكرب، وربنا يتقبل منك.
اعملي ميزانية البيت كله بـ 3000 جنيه في الشهر
التعليق باستخدام حساب فيس بوك