محتويات المقال
لو جربتي تخرجي في الويك إند في أي مكان، هتلاقي أكتر المطاعم اللي عليها إقبال رهيب ودايمًا زحمة بشكل ملفت للنظر، هي المطاعم الآسيوية اللي بتقدم السوشي. طب إيه يا جماعة قصة السوشي وإيه الحب والإقبال الخطير ده من المصريين عليه، خصوصًا في الخمس سنين الأخيرة، وبعد ما كان مفيش في مصر غير مكان أو إتنين بيقدموا السوشي، بقى فيه مئات المطاعم، كل مطعم له طريقته وأنواعه المميزة.
أسباب شعبية السوشي
أسباب كتير قوي تخلينا نعشق السوشي ونحبه، وتخلي عشاق السوشي عددهم يزيد كل يوم، منها مثلًا:
- إنه صحي جدًا ومليان فوايد من أول الأسماك والسي فود، لحد أوراق النوري والجنزبيل المخلل والواسابي، جرعة مكثفة من الأوميجا 3، ومضادات الأكسدة، واليود (Iodine).
- كمان السوشي يعتبر أكلة (فوتوجونيك) يعني شكله وطريقة تقديمه حقيقي جميلة جدًا وتفتح النفس وتفرحك من قبل ما تحطيه في بقك حتى، وكمان بيطلع شكله قمور جدًا في الصور.
- أكلة مميزة ولها طقوس معينة، زي مثلًا العصيان الخشب اللي بيتاكل بيها chopsticks، والأطباق الصغيرة اللي بنضيف فيها صلصة الصويا، وأطباق التقديم الواسعة المفتوحة اللي بتترص فيها قطع السوشي بطريقة مميزة، والإضافات المتنوعة الكتير اللي بتتقدم مع السوشي.
- الابتكارات مع السوشي ما بتنتهيش، وممكن كل مرة تاكليه بشكل وطعم جديد.
- مناسب لكل الخروجات، يعني لو أنتي مع صحابك، أو في خروجة مميزة مع جوزك، هتلاقي خروجة السوشي اختيار ممتاز.
احنا النهارده جايين نساند كل عشاق السوشي، وخصوصًا المبتدئين اللي بيحتاروا من المصطلحات الكتير (المكلكعة) الموجودة في المنيو، هنشرح لك أشهر المصطلحات اللي هتقريها أو هتسمعيها في أي مطعم سوشي، واللي هتخليكي محترفة وانتي بتطلبي الأوردر.
مصطلحات السوشي
النوري Nori
المصدر thesprucepets
هو الأوراق الخضرا اللي بيتلف بيها السوشي، وهو عبارة عن أعشاب بحرية مجففة، لها فوايد صحية كتير جدًا ونكهتها الخفية، هي اللي بتضيف للسوشي طعمه وريحته المميزة جدًا.
الواسابي Wasabi
المصدر eatthis
مكون مهم جدًا بيكون دايمًا مرافق للسوشي، وأحيانًا بيضاف القليل منه جوه السوشي نفسه، الواسابي موضوع كبير قوي عايز مقالات نتكلم فيها عنه. بس أهم معلومة تهم أكيلة السوشي هو إن الواسابي له تأثير مضاد للبكتيريا. عشان كده، مهم إنه يكون مرافق للسوشي خاصة الأنواع النية منه. وطبعًا لكل المبتدئين في السوشي: اوعوا تاكلوه لوحده بكمية كبيرة، لقد أعذر من أنذر!
الجنزبيل المخلل Pickled Ginger-Sushi Ginger-Gari
المصدر gettyimages
شرايح من الجنزبيل مخلله بطريقة خاصة، بيتقدم كمرافق لكل أطباق السوشي، له تأثير مضاد للميكروبات. عشان كده مهم أكله مع الأنواع النية من السوشي. تعمل النكهة القوية للجنزبيل المخلل على تطهير الفم وتغيير الطعم. عشان تقدري تستطعمي الأصناف المتنوعة من رولات السوشي.
الترياكي صوص Teryaki sauce
المصدر freepik
صوص لونه بني غامق شبه لون صلصة الصويا، لكن قوامه سميك مشابه لقوام العسل الأسود، نكهته مسكرة ولذيذة وبيتقدم مع بعض الأنواع من السوشي بشكل أساسي، أو كمكمل جانبي.
بونزو صوص Ponzu sauce
المصدر wandercooks
صلصة تغميس شهيرة جدًا، وهي بتتكون من الصويا صوص مضاف إليها مكونات تانية بتديها حموضة، بتضيف نكهات لذيذة للسوشي.
التامبورا Tempura
المصدر goldsushiclub
أي مكون موجود في المنيو مكتوب جنب اسمه كلمة “تامبورا” معناه إنه مقلي باستخدام دقيق التامبورا، وهو مزيج بيتخفف بالمياه وبيستخدم لعمل عجينة تتغلف بيها المقليات، وهو مشهور جدًا في المطبخ الآسيوي بشكل عام، مش بس مع السوشي.
ساكي Sake
المصدر postmates
معناها الحرفي “سلمون” يعني لو قريتي الكلمة دي في مسمى أي رول سوشي، اعرفي على طول إن السلمون من مكوناته.
أوناجي Unagi
45shutterstock
معناها الحرفي (سمك التعابين أو Eel) يعني لو قريتي الكلمه دي في مسمى أي رول سوشي، اعرفي على طول إن سمك التعابين أو الـ Eel من مكوناته. سمك التعابين المستخدم مع السوشي بيكون دايمًا مطبوخ، ولا يقدم ني أبدًا. وهو من أنواع الأسماك المشهورة جدًا في اليابان.
إيبي Ebi
المصدر tripntravel
معناها الحرفي (جمبري) يعني لو قريتي الكلمه دي في مسمى أي رول سوشي، اعرفي على طول إن الجمبري من مكوناته.
النيجيري Nigiri
بالعربي معناها السوشي المضغوط باليد. وهو نوع من السوشي بيحتاج حرفية عالية من الشيف لتشكيل الرز بشكل مستطيل إلى حد ما، وبيكون فوق الرز شريحة من السلمون أو التونة أو أصناف متنوعة كتير أغلبها بيكون ني مش مستوي. وأحيانًا بيكون مستوي زي الجمبري اللي بيكون مسلوق، وفي بعض الأحيان، الأسماك بتاخد تسوية خارجية خفيفة باستخدام البشبوري اللي بيدي له نكهة مدخنة لذيذة. شوفي الصور للتوضيح. النيجيري يفضل يتاكل بالإيد: غمسي القطعة في الصويا صوص من جهة السمك أو السي فود، وكليها في قطمة واحدة.
الساشيمي Sashimi
المصدر bbcgoodfood
شرايح من السمك الني في الأغلب بتتقطع بطريقة معينة ولازم الأسماك تكون بجودة عالية ودرجة عالية من الطزاجة طبعًا وبتتقدم بدون رز. الساشيمي بيتاكل بالعصيان الخشب.
ماكي Maki
المصدر lifehack
ماكي هو شكل من أشكال السوشي يتم فيه تغليف أرز السوشي مع أي نوع من الأسماك زي السلمون أو التونة أو الجمبري أو الخضار سواءً نوع واحد أو أكتر من نوع جوه نفس الرول، في ورقة من النوري، المهم إن ورق النوري بيكون هو الغلاف الخارجي للنوع ده من السوشي ملفوف على الرز والحشوة جواهم.
الأورا ماكي Uramaki
المصدر foodwiki
أو بيسموه “Inside out” يعني اللي جوه بره واللي بره جوه! ببساطة الطبقة الخارجية للرول بتكون هي الرز، أما ورقة النوري بتكون من جوه، زي ما الشكل موضح لكم.
الهوسوماكي Hosomaki
المصدر yutaka
نفس فكرة الماكي: النوري هو الطبقة الخارجية، لكن الاختلاف هو إن الحشوة الداخلية بتكون عبارة عن مكون واحد فقط، يعني مثلًا salmon Hosomaki بيكون جواه سلمون فقط بدون إضافات.
تيماكي Temaki
unilever
أو بيسموه (Hand Roll) وهو عبارة عن كل مكونات السوشي جوه قرطاس معمول من ورق النوري شكله مميز جدًا.
الأوشي زوشي
المصدر youtube
هو نوع من السوشي بيتم تجميع مكوناته جوه قالب خشبي مخصص للنوع ده من السوشي بعدها بيتقطع بالسكينة في صورة مكعبات شكلها مميز جدًا، الصورة هتوضحه أكتر.
التعليق باستخدام حساب فيس بوك