محتويات المقال
الأزياء والملابس من أكتر الحاجات اللي بتشغل جزء كبير من اهتماماتنا إحنا الستات، ومهما كان لبسنا عملي بعد الأمومة، بس برضه بنفضل نهتم بالفاشون، ونتفرج على التصميمات المختلفة للفساتين والملابس، ولما بييجي وقت مهرجان فني أو حفل عالمي، أول حاجة بتلفت انتباهنا هي موضة ملابس الفنانات، علشان كده النهارده اللقاء ده خصصته كله عن الفاشون والأزياء مع مصممة الأزياء الروسية “فيرا زولوتاريفا”:
“فيرا زولوتاريفا” لها صفحة على الفيسبوك، تعدى عدد متابعيها الـ 100 ألف متابع، وتميزت منشوراتها بالآراء الفنية اللي مكتوبة بطريقة مبسطة تخلينا كلنا -كغير مختصين- نفهمها بسهولة ونتفاعل معاها، بس قبل ما أبدأ كلامي مع “فيرا” تعالوا الأول نشوف هي مين:
وده كان حواري معاها:
إيه الفرق بين فن تصميم الأزياء وبقية الفنون زي الرسم والموسيقى مثلا؟
فن تصميم الأزياء يختلف عن بقية الفنون، هو أهم وأقدم الفنون لإن كان الهدف منه مش ترفيهي زي بقية الفنون، ولكن ضروري لتصنيع غطاء يغطي عورة جسم الإنسان وحمايته من حرارة الجو وتزيينه، كما أراد الله للإنسان أن يكون، هو فن مرتبط بمشيئة ربنا وبفطرة الإنسان، ممكن البعض يختلف على ضرورة وجود الفنون المختلفة، إلا فن تصميم الأزياء، فهو ضروري لحياة الإنسان على الأرض، بدليل إن أول حاجة عملها سيدنا آدم على الأرض هي تغطية عورته.
صمم الإنسان والقدماء المصريين الأزياء منذ آلاف السنين، يعني الأزياء هي أول وأهم مظاهر الحضارة الانسانية، وحضور الإنسان على الأرض، علشان كده بنشوف لكل حضارة بصمة معينة في اللبس.ب
هو فن سريع التجدد والتطور مع كل يوم، بيتطلب بالإضافة للموهبة المعرفة بالأديان والتاريخ والعلوم المختلفة، وتكنولوجيا تصنيع الخامات، والمعرفة اليومية بخطوط الموضة ومتطلبات الشعوب وأحداث وأخبار العالم.
في العالم أعداد لا نهائية من تصميمات الفساتين، إنتي كمصممة، إزاي بتقدري تعملي فكرة جديدة ومختلفة؟
يتحكم في التصميم 3 حاجات: الدافع من وراءه ورؤية المصمم والهدف منه، هدف التصميم ممكن يكون تنفيذ لطلب محدد من بعض الناس بدافع معين عندهم، أو إنه يكون بدافع فكرة أو نتيجة استلهام للمصمم نفسه من البيئة المحيطة بدون طلب من أي حد.
وراء كل تصميم قصة تصنعه وتشكل خطوطه وأشكاله وألوانه، فإذا عاش المصمم قصة التصميم، بيلاقي نفسه تلقائيًا بيضيف لمسته ورؤيته فيه، وده اللي بيخليه مختلف، والعملية الإبداعية دي بتتطلب قدرة كبيرة على تنظيم الوقت والادقة لونظام، وموهبة ومعرفة وخبرة طويلة، ومعرفة مستمرة على كل إبداعات جميع المصممين الآخرين في العالم، علشان يتأكد إن تصميمه متميز عنهم.
لو بيئة المصمم ظهرت في أفكاره، تبقى نقطة قوة ولا ضعف؟ يعني لو الاستايل الشرقي أو الروسي ظهر في تصميماتك، دي نقطة لصالحك؟ وهل في إيدك تتحكمي فيها؟
لو كان المصمم بيصمم لنفس بيئته فطبيعي إن بيئته تظهر في تصميماته، لكن لازم يكون قادر على إبرازها أو إخفاءها، حسب البيئة والمجتمع المطلوب التصميم لهم، مصمم الأزياء المفروض يقدر يصمم المناسب لأي مجتمع، لو المجتمع اللي طالب التصميم مشابه لمجتمعه يمكنه إظهار نفس أفكار مجتمعه المناسبه له، ولو مجتمع مختلف فلازم يخفي أفكار مجتمعه غير المناسبه له، إذا كان المصمم موهوب فعلا ومبدع ومتمكن فإنه بيكون قادر على اختيار أو مزج المناسب من جميع المجتمعات والأذواق والبيئات المختلفة للمجتمع المطلوب التصميم له، حتى إنه بيقدر يمزج بين الحريمي والرجالي، مفيش حدود للإبداع.
ودي صورة بدلة Smoking رجالي أنا صممتها لعميلة مصرية وكانت مقبولة جدًا في مصر، والطقم التاني كمان من تصميمي:
ممكن تنفذي تصميم انتي مش مقتنعة بذوقه؟
مستحيل أعمل كده، محددة لنفسي إطار وثوابت لا يمكن اتخطاها، مستحيل أصمم مثلا أزياء باستايل مفتوح أو ضيق أو عاري يظهر الجسم، لإني شايفة إن الهدف الرئيسي للملابس هو تغطية وحماية وتزيين الجسم مش العكس، ومستحيل أنفذ تصميم يظهر عيوب الجسم، فمن ضمن أهداف تصميم الأزياء إخفاء وعلاج عيوب الجسم.
إزاي ممكن المصمم يعمل لنفسه بصمة محددة؟ بحيث لما أشوف الفستان أو القطعة أقول ده أكيد تصميم فلان من غير ما أعرف إن هو اللي مصممه؟
يدرس الأول وبعدين يمشي مشواره خطوة خطوة، فالبداية الصحيحة لأي مصمم أزياء هي تصميم الأزياء الرئيسية البسيطة بطريقة سليمة بقواعد صحيحة أولا، ولو قدر يعمل ده بشكل كويس، فبعدها يقدر يبدأ في ابتكار فكرة معينة لنوع معين من القطع، ويبدأ في تطويرها لو لقاها ناجحة.
بداية تميز مصمم الأزياء كريستيان ديور كانت بعد أن تمكن من تصميم الجاكيت الكلاسيكي البسيط، وبعدها بدأ في تعديل المواصفات القياسية في الباترو بتاعه، ضيق الوسط، ووسع النصف السفلي، وبعد ما نجح في كده ولاقاها فكرة ناجحة، بدأ في تنفيذ جيبة بنفس الفكرة، وبعد ما نجح بدأ في نقل هذه البصمة إلى أنواع تانية من اللبس زي الفساتين وهكذا، علشان كده نجح، لإن لا يمكن لمصمم الأزياء أن يبدأ بالإبداع والتميز بدون تصميم الاشكال البسيطة الرئيسية بطريقة سليمة في الأول، ودي الغلطة اللي بيغلطها معظم مصممين الأزياء، إنهم بينطوا أول خطوات في مشوارهم فالنتيجة بتكون فقدان لبصمتهم ورؤيتهم.
ومعرفة ما إذا كان المصمم أصبح له بصمة أو لأ بتحصل بعد سنين من شغله، معظم مصممي الأزياء بيقضوا حياتهم كلها يقلدوا الآخرين ومش بيخلقوا بصمة خاصة بيهم.
ومن أمثلة بصمات المصممين: بصمة كريستيان ديور في الجاكيت، واستايل Valentino Red لمصمم الأزياء Valentino Caravan، واستايل مصممة الأزياء Gabrielle Chanel وخاصة في فستان الـ: LBD
هل بتقبلي تعديل العميل على تصميمك؟
التصميم مرحلة من مراحل تصنيع اللبس، في وقت رسم الاسكتش ممكن طبعًا أوافق تعدل فيه معايا تعديلات معينة لا تتعارض مع قواعد وأساسيات التصميم، بعد التصميم وقص القماش خلاص، لا يمكن التعديل، وبفهّم كل عميلة نقط كتير قبل التعامل، دي نقطة منهم.
إيه أصعب موقف اتعرضتي له في مشوار التصميم؟
اتعلمت في درجة حرارة 30 تحت الصفر، كنت بسافر 30 كم رايح وجاي للكلية، اشتغلت في تصميم الأزياء من سن 12 سنة، هاجرت وغير ديانتي ولغتي ولبسي واتحجبت، وبعدت عن أهلي وأصدقائي، وصممت أزياء لمجتمع تاني ونجحت فيه.
كل مشوار حياتي كان صعب، كل مواقفي في مشوار تصميم الأزياء صعبة.
السؤال كان يبقى واقعي أكتر لو كان “إيه أسهل موقف اتعرضتي له في مشوار حياتك؟ والإجابة ساعتها هتكون: “مفيش”.
وإيه أكتر موقف طريف؟
كنت الأولى على دفعتي في الكلية، كان الدكاترة بيخلوني أطلع اشرح لزميلاتي وبيحترموني ويشجعوني، في مرة اتأخرت على الامتحان بسبب التلج، رحت بعد ما خلص، وقفت ورا الباب سمعت الدكتورة بتقول “فيرا “غابت النهارده لكن طبعا هي ناجحة بالدرجة النهائية برضه، مدخلتش ومشيت تحت التلج بضحك واعيط في نفس الوقت، عرفت قيمة الاجتهاد والكفاح والسعي للنجاح طول الوقت مش وقت الامتحان فقط.
أظرف وأجمل حاجة في حياتي هي حب واحترام الناس ليا في كل مكان بروح له الحمد لله، بعد ما كنت مشهورة ومحبوبة كمصممة أزياء في روسيا، هاجرت من سيبيريا وعشت على بعد 6 آلاف كم من موطني، ولقيت نفسي مشهورة ومحبوبة وناجحة في مصر برضه الحمد لله.
إيه طموحك في مجال التصميم؟
طموحي في مصر أصمم أزياء سيدة مصر الأولى، واعمل فيها أكبر أكاديمية لتعليم تصميم وتصنيع الأزياء في الشرق الأوسط شبه كليتي الروسية، بهدف نقل معرفتي ومعرفة شعبي لجيل من الشعب المصري وأسيبها بعد كده والجيل ده ينقلها لغيره، مش بهدف الفلوس، بهدف ظهور مصر بشكل أجمل، مليش طموح أعمل خط إنتاج كبير لكل الناس بهدف الفلوس، مش بجري ورا الفلوس ولا الشهرة، هما اللي بيجروا ورايا.
نصايحك إيه للحوامل في اختيار ملابسهم؟
المرأة الحامل لازم تلبس لبس يبينها فرحانة بمناسبة حملها، ألوانه تكون جميلة زي البينك أو الأورانج، أو نقشة فيها ورود، يكون فيه ديكور مش سادة، مش لبس عادي، ولازم اللبس يبين إنها حامل يعني ما تحاولش تغطي بطنها، ويكون بتصميم خاص للبطن، مريح مش بيضغط عليها.
نصايحك إيه للأمهات في اختيار ملابسهم بعد ما جسمهم بيتغير بسبب الحمل والولادة؟
بعد الولادة الست لازم تحط لنفسها سقف زمني “سنة” ترجع فيه للياقتها زي ما كانت وتلبس كعب تاني وتظهر أنيقة زي الأول،ل تفتح دولابها واللبس اللي مش مناسب لجسمها بعد التغيير تتخلص منه، علشان ما تزعلش إن جسمها اتغير كل اما تشوفه، وعلشان تفضي مكان للبس بمقاس جديد، ولإنه بعد سنة الموضة بتاعته هتقدم فحتى لو استعادت لياقتها بعد سنة مش هتستخدمه تاني.
لازم تختار موديلات تداري العيوب الجديدة مش تختار موديلات تظهرها أكتر، ما ينفعش نقول نصيحة معينة لكيفية تغطية عيوب الجسم الجديدة لإن تغيبرات الجسم بتختلف من واحدة للتانية، مفيش جسم زي التاني، أنصحها تعمل إعادة استايلينج جديد وتنظر نظرة جديدة لنفسها بنفسها أو عند متخصص.
ممكن نتعلم من أيقونة للموضة زي عارضة الأزياء الـ Super Model الروسية Irina Chaik بعد ما بقت أم:
إيه أهمية إن السيدة تتعلم التفصيل حتى لو بمستوى بسيط مبتدئ؟
تعلم المرأة للخياطة مهم جدًا، ومش لازم تكون بهدف الشغل، الأم بتحتاج يوميًا تخيط حاجات في البيت، في رأيي الست اللي ماتعرفش الخياطة اليدوية أو بمكنة الخياطة زي الست اللي ماتعرفش تعمل أكل.
وأكيد بعد اللقاء هنحب نشوف صور تصميمات لفيرا زولوتاريفا:
ولحد هنا بيخلص لقائي مع مصممة الأزياء فيرا زولوتاريفا، واللي بتمنى تكونوا استمتعم بيه واتعرفتوا أكتر عليها وعلى عالم تصميم الأزياء ودي صفحتها على الفيسبوك لو حابه تتابعيها وتعرفي عنها أكتر: زوريها من هنا
6 تعليقات
مقال رااااائع شكرا ليكم
أهلا بيكي يا نهى، مبسوطة إن المقال عجبك
مقال جميل جدا
شكرا ليكي
حوار مبهر مع شخصية ملهمة غير عادية. نحن أمام مصممة أزياء عالمية. شكرا لكم
أنا كمان اتبسطت جدًا من الحوار معاها، شكرا ليكي.