المصدر flo.health – تكرار الولادة القيصرية
لما الأم بتولد مرة واحدة قيصرية، الولادة التانية ممكن تبقى طبيعي أو قيصري برضه ويحصل تكرار الولادة القيصرية. بس لو لازم تكون التانية كمان قيصرية عشان صحة الأم أو الجنين، هل فيه خطر كبير أو مضاعفات؟ مع تطور الطب، الولادة القيصرية بقت شائعة ومخاطرها بقت أقل. ومع ذلك، فيه آثار جانبية أو مضاعفات ممكن تحصل مع تكرار الولادة القيصرية. في المقال دا هنكلمك عن المخاطر والمضاعفات دي. لكن قبل ما نبدأ، نحب نقول لك إن ممكن جدًا ما يحصل لكيش أي مضاعفات وتعدي ولادتك القيصرية التانية والتالتة بسلام لكِ وللجنين.
أولًا: مضاعفات مؤثرة على الجنين:
- ممكن الطفل يتولد غير كامل النمو أو “مبتسر” زي ما الدكاترة بيسموه.
- ممكن الطفل يتولد وهو بيعاني من مشاكل تنفس.
ثانيًا: مضاعفات مؤثرة على الأم:
- زيادة الإلتصاقات في البطن السفلى: يعني ممكن بعض الأنسجة تلزق في بعضها أو في جدار البطن الداخلي. ودي للأسف بتسبب إعاقة لحركة الأعضاء الداخلية وبتسبب ألم. لكن بعض الدكاترة بيقولوا إن آلام البطن بعض القيصرية التانية بتكون أقل من الأولى.
- طول مدة الجراحة: بسبب الإلتصاقات اللي اتكلمنا عنها دي، الدكتور بيحتاج وقت أطول عشان بيضطر يفتح ندوب العملية الأولى.
- النزيف الشديد: احتمالية إن يحصل نزيف شديد بتزيد جدًا بعد تكرار الولادة القيصرية لمرتين أو تلاتة.
- إصابات المثانة والأمعاء: نتيجة إن العملية صعبة وإن فيه إلتصاقات، ممكن تحصل إصابات في المثانة وفي الأمعاء خلال العملية. وعشان كدا، الدكتور لازم ياخد وقت ويكون دقيق جدًا وهو بيعمل العملية.
ومع كل المضاعفات دي، موقع BBC كتب ملخص دراسة بتقول إن “فرصة حدوث تمزق في الرحم تراجعت بين الأمهات اللاتي فضلن تكرار الولادة القيصرية.” وكمان إن نسبة المخاطر ما بتبقاش أكتر من حالتين من كل 10 آلاف حمل في بريطانيا. بننصحك دايمًا تكلمي الدكتور بتاعك في امكانية ولادتك طبيعي أو قيصري. واطلبي أكتر من رأي واسألي دايمًا عن حالتك انتِ لأن الاستعداد من جسم لجسم بيختلف.
المصادر:
التعليق باستخدام حساب فيس بوك