بعض بيئات الشغل بتكون مشتركة بين الرجالة والستات، ومع التعامل اليومي بينهم، بيحصل معرفة لبعض تفاصيل حياة بعض في سياق الشغل. لكن بعض الأشخاص ممكن يلفتوا انتباه بعض أكتر ببعض المواقف والصفات والطباع. وبتحصل المشكلة لو كان واحد من الأطراف دول متجوز، راجل أو ست وهنا ممكن تبدأ المقارنة ما بين الزميل ده وما بين شريك الحياة. وفي المقال ده، احنا بنتكلم في حالة لو الست متجوزة وأعجبت بطريقة تعامل زميلها معاها، وبدأت تقارن معاملة الزميل بـ معاملة الزوج لزوجته وتقول زميلي في الشغل بيعاملني أحسن من جوزي.
-
احنا في الشغل غير اللي في البيت
زميلك اللي في الشغل ده، انتي ما شوفتيهوش في بيته بيتصرف ازاي. ما تعرفيش لما يكون راجع من الشغل تعبان ومتعصب بيعمل إيه مع مراته، مهما كان باين قدامك جنتل في التعامل. صحيح هو مش شرط يكون وحش كاسر في بيته، بس أكيد مش هيتعامل مع ضغوط حياته وظروفه الصعبة، زي وهو بيشرب معاكي القهوة وانتم على مكاتبكم في الشغل. وعلشان تتأكدي اسألي نفسك: هل أنا في البيت نفس اللي في الشغل؟ هل أناقتك في الشغل هي أناقتك في البيت وانتي ما بين شغلك والمطبخ وتمارين الولاد؟ هل صوتك في الشغل وضبط أعصابك نفس صوتك في البيت؟ لما هتجاوبي على الأسئلة دي هتعرفي إن زميلك اللي في الشغل حاجة وفي بيته وفي الحياة حاجة تانية، مش عشان هو بيمثل، لكن عشان ده الطبيعي.
-
ما تسكتيش على المشاكل
قبل ما نبتدي نتكلم عن مبادئ معاملة الزوج لزوجته، لازم لما تكون في مشكلة بينك وبين جوزك، ما تسكتيش عليها ولا تستسلمي لها، لإن في أقل موقف هتلاقي آثار المشكلة دي ظهرت فورًا. زي إنك تكوني نفسك جوزك يهتم بيكي مثلًا، فتتأثري بأي اهتمام من زميل الشغل، وتبدأ دماغك تجيبك وتوديكي. اعرفي فين حلول المشكلة وحليها. ولو ما تعرفيش، روحي لاستشاري علاقات زوجية يساعدك، لإن الاستسلام والتعود مش حل.
مهم انك تشوفي ده استشاريين علاقات زوجية .. أهم خطوة في حياة الزوجين
معاملة الزوج لزوجته – زميلي في الشغل بيعاملني أحسن
-
شوفي كويس
هل فعلًا زميل الشغل ده بيعامل كل زميلاته بالطريقة اللي عاجباكي دي؟ ولا بيعاملك انتي بالذات بيها؟ لو لقيتي إن الموضوع خاص بيكي انتي، لازم تعرفي إن في مشكلة كبيرة، يا إما انتي سمحتي له بالمساحة دي، أو حكيتي له حاجة عن جوزك فهو بيحاول يبان ليكي إنه فيه الحاجة اللي ناقصاكي في جوزك. ولازم تراجعي كل طريقة التعامل اللي بينكم، ولو لقيتي إن الزمالة اللي بينكم دي فيها إنّ، افتكري إنك لو اكتشتفتي إن جوزك فيه زميلة في شغله في نفس الوضع، إنتي مش هتسكتي على كده.
-
وقفي المقارنة
المقارنة تصرف بيحصل مننا في حاجات كتير في الحياة، في الولاد وفي المستويات المادية، وغيرها من تفاصيل الحياة، فمش جريمة لو حصلت مرة أو مرت على بالك. لكن إنك تكوني عايشة بتقارني، ومنها المقارنة بين زمايلك في الشغل وبين جوزك، فإنتي كده عمرك ما هتعيشي سعيدة. لإن المقارنة مش هتقف على حاجة واحدة بس، هتقارني بين طبع حلو في زميلك وبين جوزك. وهتقارني بين وسامة مديرك وبين جوزك. وبين فلوس زوج صاحبتك وبين جوزك. وهتدخلي في دوامة تكرهك في جوزك وتعيشي متضايقة منه، وهو مش عارف مالك، وبدون مشاكل جوهرية بينكم. لو فكرتي وحسيتي إنك كده فعلًا، لازم توقفي الحالة دي حالًا، عشانك انتي قبل أي حد تاني. لإن طبع المقارنة ده قاتل، وبيسبب عدم رضا في الحياة كلها، ودايمًا بيخليكي شايفة اللي ناقصك بس وناسية كل النعم اللي مالية حياتك واللي ممكن ناس تانية يكون نفسها في ربع اللي عندك.
أسباب فشل العلاقة الزوجية .. الست عايزة أب والراجل عايز ست
التعليق باستخدام حساب فيس بوك