للأسف نجاح الأم دلوقتي بقى يُختصر في الأم العاملة، وبتترسم صورتها إن هي البطلة اللي بتعرف توفق ما بين بيتها وأطفالها وشغلها، وأي أم تانية فهي فاضية وعندها وقت كتير، ومالهاش كارير شغالة عليه. واللي رسم الصورة دي هم الأمهات نفسهم، وده برأيي يرجع لسبب مهم وهو: إن الأم مع إن وظيفتها في تربية أطفالها مقدسة وجليلة جدًا، إلا إنها مع الوقت بتبدأ تحس إنها مش متشافة، أو مش حاسة بوجودها، وحياتها كلها لأطفالها وبيتها وبس. وبتشوف كل اللي حواليها ناجحين في شغلهم ودراستهم، وعمالين ياخدوا خطوات في حياتهم وهي محلك سر، وده مش شرط يحصل مع الأم ربة البيت بس. الأم العاملة كمان بيجي لها إحساس عدم النجاح ده لما شغلها بيتحول لروتين. وفي المقال ده، هاقول لك على شوية نصايح تتغلبي بيها على الأفكار دي.
معايير النجاح
-
قللي سوشيال ميديا كتري حياة واقعية
مع إننا كلنا عارفين إن السوشيال ميديا مش هي الصورة الحقيقة، إلا إن دماغنا بتقع في الفخ ده كل مرة. بتدخلي على جروب السفر، بتلاقي الناس كلها مسافرين وانتي اللي شجرة. جروبات تنظيم البيت، بتلاقي الناس بيوتها معارض موبيليا، وانتي اللي بيتك متبهدل. لو زرتي لينكد إن، هتشوفي شهادات ونجاحات عجيبة وانتي واقفة في المطبخ بتتبلي البانيه للولاد. هتدخلي جروب الأمهات، هتغني “ماعرفتش اربي .. صبرني ياربي”.
واللي بيحصل ده مش غلطتك. مهما قاومنا تأثير السوشال ميديا، دي الصورة اللي دماغك بيعملها في اللاوعي. علشان كده، اطلعي من الجروبات اللي مش بتستفيدي منها، وقللي عدد الساعات اللي بتقضيها على السوشيال ميديا. وحاولي تشوفي الحاجات اللي تفيدك وتطور من حياتك، مش الصور والبوستات اللي فيها استعراض للجزء الحلو من حياة الآخرين.
طرق التغلب على فقدان الشغف في الحياة
-
بلاش المقارنة
لو انتي راضية عن حياتك، ما تقارنيش نفسك بحد، لإن جارتك اللي بتشوفيها بتنزل كل يوم الصبح للشغل بتاعها، انتي ماتعرفيش بقية حياتها، ومدى نجاحها فيها. وممكن جدًا تكون ناجحة في شغلها وفي حياتها وعارفة توفق بينهم، بس دي ظروفها اللي تخصها، ومش شرط أبدًا ده يكون مناسب ليكي. لإن النجاح مالوش مقياس معين، النجاح إنك تنجحي على حسب إمكانياتك وظروفك انتي.
-
نمّي مهاراتك
سواء كنتي أم عاملة أو ربة منزل، حاولي تنمّي مهاراتك على قد ما تقدري، لو عندك وقت لكورسات عادية أو أونلاين، ارجعي لحاجة كنتي بتحبي تعمليها زمان ووقفتيها، أو حاجة نفسك تتعلميها فحاولي تطلعي لها وقت ولو قصير في زحمة يومك، هتحسي بالإنجاز الرهيب.
-
عيدي ترتيب أولوياتك
لو حاسه إنك واقفة مكانك من زمان، ارجعي فكري في ترتيب أولوياتك، لإن لو أولادك كانوا أطفال وده كان مانعك من حاجات نفسك تنجحي فيها، هتلاقيهم كبروا وعرفوا يعتمدوا على نفسهم وده هيوفر لك شوية وقت، لو في شغل روتيني مستنزف وقتك وانتي نفسك في شغل تاني، حاولي تدوري على شغل جديد أو تاخدي بريك من شغلك، وهكذا..
لكن افتكري دايمًا إن الأولويات دي بناءً على ظروفك انتي، مش تقليد لحياة الآخرين.
-
قليل متصل خير من كثير منقطع
اعملي حاجات قليلة ويومية أو منتظمة، أحسن ما تتحمسي في يوم وتعملي حاجة كبيرة وبعدين توقفي، لإن الانتظام في حد ذاته إنجاز، وهتلاقي نتيجة انتظامك في حاجة واحدة يوميًا نجاح كبير على نهاية الشهر أو السنة.
-
استفيدي من الناجحين اللي حواليكي
لو انتي حواليكي نماذج ناجحة في حياتها، دردشي معاهم واستفيدي منهم، شوفي بينظموا وقتهم ازاي، وطريقة توفيقهم للمهام اللي في حياتهم، وحاولي تاخدي خطوات جدية للبداية، بدل ما تتفرجي على الناس وتقضي وقتك في الزعل على حياتك.
وافتكري دايمًا إن مفيش خلطة أو وصفة جاهز للنجاح، النجاح متعب ومرهق وله تمن، ومفيش مقياس للست الناجحة، لكن برأيي الأم الناجحة هي الأم الراضية اللي بتبذل كل ما في وسعها علشان حياتها وحياة أسرتها تكون مستقرة، وبنتمنى لك حياة ناجحة ومفيدة ليكي وللي حواليكي.
التعليق باستخدام حساب فيس بوك