محتويات المقال
كل أم في فترة الحمل بتبقى منتظرة أحلى وقت ممكن يعدي عليها وهو وقت حركة الجنين جوه بطنها، ساعتها بيكون شعور الأم وفرحتها ما تتوصفش ازاي الكائن الصغنن ده قدر بحركة بسيطة ينسيها هموم الحمل والتعب ويفكرها إنه هنا موجود وبيكبر.. ومع قرب نهاية رحلة الحمل، الحركة بتتحول لمغامرات جوه بطن الأم ودكتور النساء دايمًا بينصح الحامل بمراقبة حركة الجنين، وخصوصًا في الشهور الأخيرة، وفي المقال ده، هنستعرض معاكي معدل حركة الجنين شهر بشهر.
هنا ممكن تشوفي للحوامل: أهم مراكز السونار الرباعي في القاهرة 4D
معدل حركة الجنين في الشهور الأولى من الحمل
عادةً في الشهور الأولى من الحمل، حركة الجنين بتبقى مش واضحة قوي، وخصوصًا لو أول حمل للأم، وبتبتدي حركة الجنين من أول الأسبوع الـ12 من الحمل بس ممكن الأم ما تقدرش تميزها.
حركة الجنين في الثلث الثاني من الحمل
من الأسبوع الـ16 للأسبوع الـ24، بتبدأ حركة الجنين تبقى أوضح شوية وبرضه ممكن ما تحسيش بيها لو إنتي أم للمرة الأولى، والحركة بتكون عبارة عن نغز بسيط أو رفرفة في البطن أشبه بحركة الغازات، وبعض السيدات ممكن تميز حركة الجنين مبكرًا من الأسبوع الـ13 على سبيل المثال لو مروا بتجربة الحمل قبل كده. ومعدل الحركة في الثلث الثاني من الحمل مش بيكون منتظم عادةً زي الثلث الأخير من الحمل.
5 أسئلة عن التخدير النصفي في الولادة
حركة الجنين في الثلث الأخير من الحمل
في الثلث الأخير من الحمل، حركة الجنين بتبقى أوضح، وبتكون فيه ركلات ونشاط كبير للجنين في بعض الأحيان. وبتكون الحركة محسوسة بشكل أكبر من الشهور السابقة نظرًا لكبر حجم الجنين. ومن الأسبوع الـ28، الحركة بتكون واضحة بشكل أكبر وفي الأسبوع الـ36 ممكن يحصل بطء بسيط في الحركة بسبب كبر حجم الرحم. ودكتور النسا ممكن يطلب من الأم متابعة وعد الحركات اللي بيتحركها الجنين في اليوم وهي بتكون حوالي 10 حركات في خلال ساعتين.
لو ما قدرتيش تحسي بحركة الجنين، ممكن تستريحي على الجانب الأيسر وتحاولي تاكلي وجبة بسيطة. لو حسيتي إن الحركة قليلة ومش واضحة أو حسيتي إن مفيش أي حركة خالص، تواصلي فورًا مع دكتور النسا الخاص بيكي أو زوري أقرب مستشفى.
اعرفي هنا كل اللي محتاجة تعرفيه عن ممارسة العلاقة الحميمة أثناء الحمل
التعليق باستخدام حساب فيس بوك