محتويات المقال
باعتبر معرض الزهور بحديقة الأورمان في الجيزة واحد من أجمل وأعظم المعارض اللي بتقام في مصر عمومًا، واللي ما راحش المعرض ده قبل كده، فايته كتير فعلًا في الترفيه والسعادة. طيب كلنا هنسأل هو معرض الزهور بيكون امتى؟ .. معرض الزهور بيبدأ كل سنة في شهر مارس يعني هينطلق من 1 مارس 2021 ولمدة 45 يوم. بيضم عدد ضخم من مزارع الورد والمنتجين المميزين جدًا في مجال تنظيم الحدائق واللاند سكيب في مصر، يعني لو حابة تحاوطي نفسك باللون الأخضر وتختاري بين آلاف الاختيارات، دي فرصتك الحقيقية عشان تكتشفي عالم يمكن ما دخلتيهوش قبل كده.
والمفاجأة إن حديقة الأورمان من الحدائق القليلة في نطاق الجيزة اللي بتسمح بدخول السيارات، يعني مش هتغلبوا في الركنة أو في النقل لو معاكم عربية والمفاجأة الأجمل إن رسم دخول العربية بالراكب اللي جواها 20 جنيه فقط شاملة تذكرة الدخول للمعرض.
شراء العسل الأبيض الأصلي
جوه معرض الزهور، بيكون في عدد كبير من العارضين اللي عندهم مناحل عسل، والحقيقة كتير منهم العسل الأبيض بتاعهم ممتاز، خضت التجربة من سنتين واشتريت نوع عسل أبيض من عارض منهم، كان جاي من الإسكندرية وحقيقي كان أجمل عسل دوقته في حياتي وقررت كل سنة أجيب كمية من نفس العارض لأنه فعلا ممتاز، لذلك واحدة من القرارات الحكيمة إنك تجرب أنواع عسل يمكن مش هتشوفيها قدامك بالتنوع والتميز ده باقي السنة.
دروس الزراعة
جوه المعرض بيكون في ورش تدريب على الزراعة للكبار والصغيرين، سواء زراعة الأسطح أو العناية بالزرع، وكمان ورش فنية تانية وسط الجو الجميل، بعضها مدفوع وبعضها مجاني، تقدروا تتابعوا صفحات العارضين عشان تعرفوا أكتر عن الورش دي.
اللعب
ناس كتير ما تعرفش إن جوه حديقة الاورمان مساحة آمنة للعب الأطفال، زحاليق ومراجيح بسعر رمزي جدًا، 10 جنيه للطفل من 9 صباحًا لـ3 العصر، والحقيقة إنه المكان مقفول بسور، وفيه مكان جوه للأهل عشان يقعدوا بدون ما يضطروا يجروا ورا الولاد أو يكونوا خايفين إنهم يخرجوا بره منطقة الألعاب.
بيكنك Picnic
بنشوف صور كتير للناس وهي بتعمل نزهة وسط الخضرة، وبنتمنى نعيش التجربة، لكن دي هي فرصتنا الحقيقية عشان نعمل بيكنك بجد، ومش هنلاقي أجمل من حديقة الأورمان واللي بتعتبر واحدة من أجمل الحدائق على مستوى مصر، صحيح شكلها مش مبهر زي حدائق تانية كتير ممكن تشوفوها في المدن الجديدة، لكن المميز جدًا في الحديقة دي تحديدًا هو تاريخها والأشجار المعمرة اللي فيها واللي مش هتشوفوها في أي حديقة تانية على مستوى مصر.
فوتوسيشن Photo session
لو بتحبوا التصوير فهو ده معادكم مع أجمل فوتوسيشن وسط الزرع والورود والألوان العبقرية الخلابة، تجانس ألوان وورود وزرع مش ممكن هاتشوفوه في مكان تاني أبدا، والحقيقة إن في ناس كتير جدا بتستنى المعرض ده تحديدا عشان تاخد صور عبقرية بجد، بننصحكم تخوضوا التجربة دي لأنكم هتتبسطوا جدًا.
التعليق باستخدام حساب فيس بوك