مصدر الصورة: falsoo.com
معرض الكتاب 2020
معظم الأمهات بيستنوا معرض الكتاب من السنة للسنة، وبيكونوا مخططين يشتروا كتب كتير لأطفالهم، بس اللي بيحصل حاجتين: يا إما بتروحي وتشتري فعلا بس ولادك ميقرأوش اللي الكتب اللي إنتي جبتيها، أو بتروحي وتحتاري هناك مع العدد المهول من الكتب المعروضة ومابتكونيش عارفة تشتري على أساس إيه.
علشان كده في المقال ده هنقولك على شوية نصائح تفيدك في شراء كتب الأطفال من معرض الكتاب
حددي إيه اللي إنتي محتاجاه قبل ما تروحي معرض الكتاب
- شوفي إيه الكتب الموجودة عندك، ولو في سلسلة كتب معينة طفلك حاببها ومتعلق بيها كملي له بقية السلسلة، لو في نوعية كتب ابنك ما حبهاش وما اتفاعلش معاها بردو حددي نوعيتها واتجنبي تكرارها.
- قرري إيه العملي بالنسبة لطفلك، هل الكتب اللي ورقها ضعيف بتتقطع بسرعة وما بيلحقش يستفيد منها؟ في الحالة دي ركزي على الكتب القماشية أو المصنوعة من الكرتون والورق المُقوى.
- تابعي اهتمامات طفلك في الفترة الحالية، لو اهتماماته مثلا متجهة لأشكال الحيوانات وأصواتها وأسمائها يبقى تركزي أكتر حاجة في الاتجاه ده، أطفال تانية بيكون الفضاء الخارجي شاغل دماغها وبيسألوا طول الوقت عن الشمس والقمر والنجوم والسماء ففي الحالة دي لو جبتي له كتب عن مجال تاني مش هيهتم بقراءة الكتب اللي إنتي شارياها.
- اكتبي كل اللي إنتي محتاجاه لأنك بالتأكيد مش هتقدري تحفظي كل حاجة.
اختاري الكتب على حسب عمر طفلك
- لو هو لسه بيبي اختاري الكتب اللي بتنمي عنده الإدراك البصري، ولو عمره أقل من سنة اختاري له الكتب اللي بتعتمد على اللمس والمحتوى البارز وممكن اللي بتطلع أصوات موسيقى أو أصوات حيوانات.
- في عمر الحضانة وأول المدرسة اختاري كتب الحروف والفواكه والخضروات والحيوانات مع مراعاة إن الكتابة تكون كبيرة الحجم قليلة الكلمات.
- في عمر الـ 6 سنين اختاري الكتب الشيّقة اللي يقدر يقرأها بمساعدتك، وفي عمر الـ 8 سنين اختاري الكتب اللي يقدر يقرأها لوحده بدون مساعدة.
اختاري الكتاب اللي هيضيف لطفلك قيمة جديدة
- في كتب كتير بنلاقيها ملونة وإخراجها ممتاز وبتكون مغرية فعلا للشراء بس للأسف محتواها تافه وفي بعض الأحيان هدّام، زي حصر قيمة الجمال في البنات اللي شعرهم ناعم وعنيهم ملونة، أو تلقّي الطفل معلومات خيالية مش حقيقية وغيرها وغيرها من المحتوى غير المناسب.
- تقدري تعرفي قيمة المحتوى بنظرة سريعة على صفحات الكتاب قبل ما تشتريه خصوصًا إن كتب الأطفال ما بتكونش كبيرة أوي.
- حاولي تبعدي قدر الإمكان عن القصص اللي فيها شخصيات كارتونية بيتفرج عليها في الأفلام، لأن الكتب مصدر ثقافة مستقل فحاولي تستغليه في معلومات وقصص جديدة.
اختاري الكتب الشيّقة
- مش معنى إن الكتاب مفيد وهيضيف قيمة لطفلك إنه لازم يبأه كتاب ممل، بالعكس هو لازم يكون شيّق علشان طفلك يقدر ينجذب لقرايته أكتر، طيب إزاي تعرفي إن الكتاب شيق؟
- في السن الصغير حاولي تكون قراءة الكتاب متاخدش أكتر من 5 دقايق، لأن دي المدة المتوقعة لتركيز الطفل وعدم تشتته، ولازم تكون ألوان الصفحات والصور واضحة ومبهجة بدون إزعاج بصري.
نصايح عامة قبل شراء الكتب
- حددي ميزانيتك علشان وإنتي بتختاري الكتب في المعرض تقدري تشتري أولوياتك الأول.
- شجعي أطفالك لو سنهم يسمح إنهم يشتروا كتب من مصروفهم، هيحافظوا عليها أكتر وهيرتبطوا بيها بشكل ما تتخيليهوش.
- تابعي دور النشر على الفيسبوك، واقرأي أسماء دور النشر المكتوبة على الكتب اللي عندك اللي هتجيبي زيها علشان تروحي عليها على طول بدون ما تضيعي وقت في اللف في معرض الكتاب.
- لو طفلك عنده زاوية للقراءة أو مكتبة صغيرة، عيدي ترتيبها معاه وقوليله إنكم هتشتروا كتب جديدة تضيفوها للمكتبة.
- لو عندك أكتر من طفل واشتريتي لهم الكتب ما تحدديش كتب معينة لكل واحد، فهميهم إنها كتبهم كلهم يقرأوها مع بعض، ولو لأي سبب عاوزة تحددي كتب لكل واحد علشان يتحمل مسؤوليتها اشرحيلهم فكرة استعارة الكتب من بعض، ولو سنهم يسمح خليهم يعيروا ويستعيروا مع الجيران أو قرايبهم ( طبعًا مع إشرافك على محتوى الكتب اللي هيستعيروها من بقية الأطفال).
- لو فيه طفل من معارفك محتاجه تهاديه تقدري تخلي أطفالك يختاروله كتب مفيدة ومناسبة من معرض الكتاب.
- لو عمر طفلك يسمح خليه يختار معاكي الكتب اللي هو محتاجها، ولو اختار حاجة مش مناسبة تقدري تخيريه بين كتابين تانيين أنسب له.
- وإنتي بتقرأي لطفلك الكتاب حاولي متكونش طريقتك سرد ورا بعضه، مثلي له الأحداث بصوتك وخليه يشاركك القراءة وتوقع السيناريو.
- وأهم نصيحة على الإطلاق أقدر أقولها ليكي: إنك لازم تكوني إنتِ بتقرأي كتب خاصة بيكي علشان طفلك يتعلم القراءة بالقدوة، هتتفاجئي إنه جايب كتابه جنبك وبيقلدك، وأجمل لحظة هتعيشيها لما يجيب القصة بتاعته ويقراها للألعاب بتاعته أو الأطفال التانيين بنفس طريقتك.
القراءة مش رفاهية أو هواية، القراءة ضرورة زي الأكل والشرب لأطفالنا وخصوصًا في زمن الشاشات اللي مالية حياتنا كلها.
لما ترجعي من معرض الكتاب قوليلنا اشتريتي إيه لأطفالك.
مصادر استفدنا منها في كتابة المقال ده:
scholastic.com
arageek
What’s your Reaction?
التعليق باستخدام حساب فيس بوك