محتويات المقال
معرض الكتاب حدث بيحصل مرة واحدة في السنة، وبيستمر عدد أيام قليل وكل أم بتكون عاوزه تروح وتقضي وقت ممتع مع أولادها هناك وكمان تقدر تختار كتب مناسبة للأطفال، لكن كل تفكيرها بيكون في “الأولاد هيعملوا إيه هناك؟” وخاصةً إن إحنا فكرتنا عن المعرض إنه يوم متعب ومرهق على الأطفال.
ولأن راحة بالي كل اهتمامها بالأمهات، هنقولك تعملي إيه مع أولادك في يوم زيارة معرض الكتاب 2020
هتروحوا إزاي
أعلنت الصفحة الرسمية لمعرض الكتاب على الفيسبوك عن المواصلات المتوفرة لمعرض الكتاب:
خطوط وأسعار المواصلات إلي معرض الكتاب 2020 ، تشمل ٧ خطوط بإجمالي ٨٠ أتوبيسا، ويمكن زيادتها إلى ١٠٠ أتوبيس في أيام العطلات، وهي كالتالي:
1- المسار: عبد المنعم رياض – رمسيس – معرض الكتاب، عدد السيارات: 15
2- المسار: العباسية – الحي السادس – معرض الكتاب، عدد السيارات: 10
3- المسار: النزهة الجديدة – السبع عمارات – معرض الكتاب، عدد السيارات: 10
4- المسار: الأميرية – المطرية – معرض الكتاب، عدد السيارات: 10
5- المسار: ميدان الجيزة – السيدة عائشة – معرض الكتاب، عدد السيارات: 15
6- المسار: مدينة السلام – الأوتوستراد – معرض الكتاب، عدد السيارات: 10
7- المسار: المظلات – حدائق القبة – معرض الكتاب، عدد السيارات: 10
بالإضافة إلى خط من 15 مايو، بتذكرة موحدة قيمتها 6 جنيهات.
لو المواصلات دي مش مناسبة بالنسبالك فطبعا تقدري تستخدمي متخصصي فك الأزمات سويفل وأوبر وكريم.
ولو هتروحي بعربيتك فبنطمنك إن في جراج للعربيات وسعر التذكرة 10 جنيه.
دخول معرض الكتاب
حاولي تروحي بدري قدر الإمكان لأن عدد زار المعرض كبير وهتحتاجي تقفي في طابور التذاكر.
تذكرة المعرض للفرد سعرها 5 جنيه.
لو مقررة تروحي أكتر من مرة، تقدري تشتري تذاكر للمرات الجاية علشان توفري وقت وما تقفيش كل مرة في طابور التذاكر.
أماكن أنشطة الأطفال في معرض الكتاب
- فيه منطقة مخصصة للألعاب نضيفة وآمنة في المعرض، لو أولادك كبار وتقدري تسيبيهم لوحدهم هيتبسطوا فيها، لو سنهم صغير بس معاكي مرافق ممكن يتابعهم وهما بيلعبوا على ما إنتِ تلفي براحتك في المعرض.
- صالة 3 فيها فعاليات كتير للأطفال، تلوين وشغل بالصوف وحكاية قصص.
- بعض دور النشر المتخصصة في أدب الطفل مخصصين ترابيزات لتلوين الأطفال.
- صالة 3 فيها أكبر تجمع لدور نشر أدب الأطفال والألعاب التعليمة وخصوصًا جناح مصر، تقدري تاخدي أولادك وتخليهم يختاروا بنفسهم القصص والألعاب اللي بيحبوها.
بعد ما نخلص لف في صالات معرض الكتاب نعمل إيه؟
- فيه عدد كبير ومتنوع من المطاعم والكافيهات تقدروا تختاروا واحد منهم وتقعدوا عنده في الجو الدافي المشمس.
- خصصي وقت تاخدوا فيه صور تذكارية لكم، والمعرض فيه أماكن كتير حلوة تقدروا تتصوروا فيها.
- متوفر حمامات مجانية حريمي ورجالي، علشان لو أولادك احتاجوا.
- الطرق في المعرض نضيفة وممهدة ممكن تتمشوا شويه فيها.
نصائح عامة
- حددي ميزانيتك قبل ما تروحي المعرض علشان تقدري تخيري أولادك بين الحاجات اللي سعرها مناسب لكِ.
- ممكن تعملي سناكس تاخديها معاكي علشان لو أولادك احتاجوا ياكلوا ومكانش عندك وقت تطلبي من المطاعم اللي هناك.
- ما تتقليش في طبقات اللبس لأولادك لأن الجو جوا الصالات دافي، وبرا بتكون الشمس ساطعة.
- لو ناوية تشتري كميات كتب كبيرة من الأفضل إنك تاخدي شنطة بتتجر لأن المشي وإنتي شايلة أكياس الكتب مرهق جدًا.
الصفحة الرسمية لمعرض الكتاب على الفيسبوك من هنا
التعليق باستخدام حساب فيس بوك