معرض الكتاب 2020: 8 أمهات في المعرض بكتب جديدة

إحنا متعودين في راحة بالي نسلط الضوء على الأمهات ونفتخر بإنجازاتهم طول الوقت.. لكن بما إن المعرض بدأ إمبارح فما ينفعش ننسى الأمهات إللي تعبوا طول السنة وقدروا رغم مسئولياتهم إنهم يكتبوا، ويدونا رسالة إنه الأمومة مش بتوقّف الإبداع.. بالعكس، يمكن تكون أمومتنا هي إللي مصحية المشاعر جوانا.

هنسيبكم دلوقتي مع  8 أمهات كاتبات في رحلة قصيرة علشان نتعرف عليهم وعلى إصداراتهم..

 

 

هبة السواح

هبة السواح هي أم لعبد الله (15 سنة) و ماريا (12سنة) وهي صاحبة الكتاب الأكثير مبيعا إللي صدر في 2017 سيندريلا سيكريت. هبة باحثة وكاتبة ومدربة متخصصة في مجال العلاقات الأسرية وتنمية الذات وحصلت على عدة شهادات معتمدة من د. ريتشارد بولستاد وجون جراي وجون جوتمان وجين نيلسون. هبة بتشتغل دلوقتي في مركز الإغاثة والدعم النفسي ومركز التربية الأسرية في كندا.

 

هبة السنة دي هتشارك في معرض الكتاب بكتاب “شهرزاد أون فاير” عن دار الرواق للنشر والتوزيع صالة 1 جناج B12.. الكتاب بيجاوبك على سؤال مهم: “أنا مين وإيه بصمتي في الدنيا”؟ من خلال حكايات ألف ليلة وليلة.. الكتاب بيعتبر من كتب التنمية الذاتية أو self help books.

 

رانيا شكري

رانيا شكري أم لمحمد ونادين ومريم، تعمل أخصائية نفسية بالمدرسة المعرفية السلوكية.. اتدربت في أماكن مهمة زي مستشفى العباسية ومستشفى قصر المعادي واتدربت على العلاج الجدلي السلوكي لمرضى الشخصية الحدية.. رانيا حصلت على دبلومة من الجامعة الأمريكية في لندن في العلاج والإرشاد النفسي وبتشتغل مدرّسة لمادة علم النفس لطلاب المدرسة الأمريكية- السنة النهائية ودايمًا بتهتم بالكتابة عن العلاقات الإنسانية والعاطفية.

 

 

رانيا لأول مرة هتشارك في معرض الكتاب ككاتبة بكتاب “بعد ما سبنا بعض”، الكتاب ده يعتبر مرجع فيه خطوات عملية للتعامل مع وجع الانفصال وهو مفيد جدًا لأي أم سينجل أو أي أم بتفكر في الانفصال.. الكتاب موجود في دار نشر تويا صالة 1 B59

 

د.نورهان قنديل

دكتورة نورهان معروفة على السوشيال ميديا بالفيديوهات المفيدة إللي بتعلمها عن التغذية وعن العادات الصحية. د. نورهان صيدلانية ودرست التغذية العلاجية والتأهيل الصحي النفسي Health coaching وظهرت ضيفة على العديد من البرامج التلفيزيونية.

 

د. نورهان بتشارك في معرض الكتاب 2020 بأول كتاب ليها وهو “كتاب الهيلثي” عن دار دون صالة (1) جناح (B31). الكتاب مش عن التخسيس، لكن هيساعدك لو عايزة تخسي وهياخد بإيدك ويحكيلك فلسفة الدايت وفكرته وإزاي بيشتغل علشان تعرفي تتعاملي مع جسمك. الكتاب بيتكلم عن الحياة الصحية السليمة.

 

سارة الذهبي

سارة دكتورة صيدلانية وأم لياسين (8 سنين) ونادين (5 سنين)،سارة بتحب الكتابة من طفولتها بس قررت تكتب بشكل جاد من 4 سنين ونص بعد ما اتغربت عن مصر وحست إنها هتدخل في دوامة اكتئاب ما بعد الولادة. صدر لسارة كتابين: فيها حاجة حرشة وخلطة عمري.. وكتبها تعتبر من الأعلى مبيعا في المكتبات زي الشروق وفيرجن ومتواجدين كمان في مكتبات جرير في الدول العربية..  سارة قررت في 2019 تعمل فيديوهات واندهشت من النجاح الكبير للفيديوهات بتاعتها ومؤخرًا ظهرت كضيفة في برنامج صاحبة السعادة.

 

كتاب وش القفص كتاب اجتماعي حتي النخاع بس فيه موضوعات واقعية أكتر من الكوميدية لإن كتاب فيها حاجة حرشة كان كوميدي ساخر بحت فحبت تغير جلدها المرة دي.. كتبت فيه أحاسيسيها ووجهة نظرها في حاجات بتحصل لينا كلنا تقريباً بشكل يومي.. و حبت تدي فيه جرعة أمل في آخره لكل واحدة عندها حلم ونفسها تحققه علشان يمكن تكون مصدر إلهام لحد.. الكتاب صادر عن دار  تويا للنشر والتوزيع، صالة ١ جناح B59.

 

 

سارة النجار

ساره النجار أم لأدهم 13 سنة وريماس 9 سنوات، طبيبة مصرية اتخرجت من كلية الطب جامعة عين شمس عام 2004 وتخصصت في طب وجراحة العيون، حاصلة على دبلومة إعداد وتقديم برامجي إذاعي وتليفزيوني وبتشتغل في إذاعة عرب إف إم، كاتبة؛ اتنشر لها عدة مقالات في مجال تربية الأطفال والإرشاد السلوكي، وبعض القصص القصيرة.

 

 

 

علاقات GPS هو كتاب سارة الأول وهو عبارة عن حكايات بتناقش علاقاتنا مع نفسنا، مع أهلنا، مع حبايبنا، إختياراتنا؛ إيه اللي بيحددها، إحباطاتنا بتيجي منين؟ صورتنا عن نفسنا بتتكون إزاي؟ توقعاتنا من اللى حوالينا. ليه فيه علاقة بتفشل وعلاقة تانية بتنجح. أمتى أمشى من علاقة وامتى أكمل، الكتاب صادر عن دار الهالة للنشر والتوزيع صالة 1  جناح A 59

 

مروة رخا

مروة رخا أم لآدم، قبل ولادتها كانت مهتمة بالكتابة والتدوين في مجال العلاقات العاطفية ولكن بعد ما بقت أم، قررت إنها تكتب وتسجل كل حاجة في رحلة الأمومة من أول يوم واتشجعت إنها تدرس المونتسوري وكتبت عشرات المقالات عن تعليم الأطفال بالمنتسوري وده خلاها واحدة من أشهر المدونات في مجال التربية.. ومروة قررت إنها تعلم آدم تعليم منزلي ” Home Schooling”  وده خلى آلاف الأمهات يتابعهوها عشان يتعلموا إزاي ممكن يفيدوا أولادهم في البيت.

 

مروة رخا بتقول عن كتابها: “أنا وآدم والمونتيسوري” : ده اسم كتابي اللي لسة خارج للنور. ناس كتير سألوني هو عن إيه وأنا بصراحة مش عارفة أجاوب … هو أكيد فيه مونتيسوري … وفيه تجربتي ومشاعري الوحشة أكتر من الحلوة … وفيه عن آدم وتفاصيل كتير عن رحلتنا وعلاقتنا … لكن برده مش عارفة أشرح أكتر هو عن إيه. دكتور محمد طه أستاذ م. الطب النفسي قال عن الكتاب: ” أنت أمام تجربة إنسانية نفسية وعلمية فريدة، تنسج خيوطها وتجدلها بمهارة واحدة من عباقرة المنتسوري في مصر.. مروة رخا هنا، تقدم لك خلاصة مفاهيم ومبدئ علم المنتسوري في الأمومة والطفولة والتربية مخلوطة بتجربتها الشخصية الخاصة في طفولتها وأمومتها ونهجها في التربية.” الكتاب صادر عن دار العين وهتلاقوه في قاعة 1 B38 –

نورا ناجي

نورا ناجي أم لفاتيما (7سنين)، حاصلة على بكالوريوس الفنون الجميلة قسم هندسة الديكور.. لكن بعد التخرج قررت إتباع شغفها بالكتابة والعمل في الصحافة والتحرير. تولت منصب مديرة تحرير موقع نواعم النسائي عام ٢٠١٥..وكاتبة مقالات في موقع نون ومجلة فنون..عمرها ٣٣ سنة وبتحب تعريف نفسها بصفتها أم قبل أي شيء آخر. الكتابة هي أهم شيء في حياتها وبتعتبرها هوايتها الوحيدة.

صدر لها ٣ روايات:  بانا ٢٠١٤ الجدار ٢٠١٦ وبنات الباشا ٢٠١٧ وتعتبر رواية أطياف كاميليا هي الرواية الرابعة ليها.

 

 

غادة كريم

غادة كريم  أم لمازن (10 سنين) و ملك (5سنين)، كاتبة مصرية لها 4 اصدارات من الأكثر مبيعا في المكتبات  وهم: علامات الحب السبعة  رسائل حريمى جدا .. كتالوج الحب .. ومكعب ثلج. غادة مهتمة بالكتابة عن المشاعر الإنسانية والعلاقات العاطفية وتأملات الحياة.

 

الكتاب عبارة عن شهور السنة وكل شهر له دلالة .. يناير شهر الأمل وفبراير الحب وهكذا..  عن الكدب والخذلان والوعى والبهجة والأمومة .. رحلة بين كل الفصول وانكسارات الحياة وبهجتها وإزاى من خلال الاعترافات هتلاقي حتة من نفسك في كل حتة في الكتاب وهو صادر عن دار دون صالة واحد B31

 

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك