محتويات المقال
من أصعب التحديات اللي بتقابلنا في رحلة الأمومة هي أكل الأطفال بداية من الرضاعة لدخول الأكل الصلب في صورة خضروات وفواكه مهروسة، ولحد ما الطفل يقعد معانا على السفرة ويبدأ ياكل من أكلنا العادي. مشاكل كتير بتواجهنا من ضعف الشهية، لطفل بينقي أكلات معينة بيحبها وما بياكلش غيرها، لطفل عايش على السكريات والنشويات وغير متقبل لفكرة إنه ياكل أي نوع من الخضراوات.
ليه الخضروات على وجه الخصوص مش محبوبة من الأطفال وما بيفضّلوش قوي أكلها؟ هاقول لك على شوية أسباب غريبة:
- الأطفال بتتولد بالفطرة عندها رفض لمذاق الأكل المر، وسبحان الله دي غريزة خلقها ربنا في الأطفال عشان ما ياكلوش حاجة تأذيهم، وأغلب الخضروات فيها النكهة المرة موجودة بدرجات مختلفة. عشان كده تلاقي أغلب الأطفال بيفضّلوا الأنواع اللي النكهة المسكرة فيها بتكون غالبة زي الجزر والقرع مثلًا.
- على الصعيد الآخر، أغلب الأطفال بتنجذب بشكل فطري للكربوهيدرات زي المعجنات والمخبوزات والكوكيز والبسكوتات عن الخضروات. وده لإن الكربوهيدرات هي مصدر أساسي بيمدهم بالطاقة اللي بيحتاجوها بشكل يومي أو بمعنى آخر هي البنزين لشقاوتهم ولعبهم طول اليوم.
- كل الأطفال بيمروا بمرحلة اسمها Neophobia أو الخوف من أي نوع جديد من الأكل. فطبيعي جدًا لما نقدم له البروكلي مثلًا لأول مرة هيخاف وما يبقاش عارف هو ده إيه وبيتاكل إزاي. عشان كده تلاقوا دايمًا الأطفال بتمسك الأكل بإيديها وتستكشف شكله وملمسه وألوانه.
ولإننا حاسين بيكي وبمعاناتك اليومية عشان تهتمي بتغذية طفلك، إيطاليانو النهارده هتقدم لك أربع وصفات باستخدام مكرونة إيطاليانو اللي هتمد ابنك أو بنتك باحتياجاتهم من الكربوهيدرات واللي طبعًا كل الأطفال بيحبوها. بالإضافة لصوصات مليانة بالخضراوات والمكونات المفيدة لأطفالك مستخبية عشان نزود لهم القيمة الغذائية للأطباق وندي لهم جرعات أكبر من الخضراوات المليانة فيتامينات ومعادن مهمة لنموهم وصحتهم.
مكرونة سباجيتي بصوص السبع خضراوات
مكرونة إيطاليانو – المصدر myfussyeater
مكرونة إيطاليانو – المصدر jamieoliver
وصفة مشهورة جدًا للشيف الإنجليزي جيمي أوليفر وحققت نجاح ساحق مع أطفال كتير، وده لإن إضافة الخضروات المتنوعة لصوص الطماطم العادي مش بس بيضيف فوايد كتيرة لكن كمان طعم مختلف كومبو من أطعمة الخضراوات، حضّري كمية من الصوص وشيليه في الفريزر لوقت الحاجة. تقدري تضيفي للصوص ده لحمة مفرومة متعصجة أو أي نوع بروتين يحبوه أولادك لوجبة غذائية متكاملة.
المقادير
- مكرونة سباجيتي إيطاليانو مسلوقة
- 2 بصلة مقطعة مكعبات
- 1/2 كوب كرات أو بصل أخضر مقطع
- 1/2 كوب كرفس مقطع مكعبات
- 2 ثمرة كوسة مقطعة مكعبات
- 2 ثمرة جزر مقطعة مكعبات
- 1/2 ك قرع مقطع مكعبات
- 3 فصوص توم
- 2 معلقة صغيرة زعتر أو ريحان مجفف
- 5 أكواب طماطم مبشورة
- 1 معلقة كبيرة صلصة طماطم
- ملح وفلفل
الطريقة
- في كمية وفيرة من زيت الزيتون شوحي التوم لحد ما تطلع ريحته، وضيفي باقي الخضراوات المقطعة مكعبات وقلبيها على نار متوسطة لحد ما تطرى.
- ضيفي الطماطم المبشورة وصلصة الطماطم والزعتر أو الريحان وضيفي مياه تغطي الخضار وسيبي كل المكونات تمتزج وتستوي لمدة 25-30 دقيقة.
- اضربي الصوص بعد ما كل الخضروات تستوي في الخلاط أو المضرب اليدوي لحد ما توصلي لقوام ناعم.
- ضيفي الملح والفلفل للصوص وضيفيه لمكرونة سباجيتي إيطاليانو المسلوقة مع رشة من الجبنة البارميزان والريحان الأخضر وزيت الزيتون.
لو لسه ما جربتيش تاكلي المكرونة المسكرة، ادخلي هنا واعرفي أشهر الأطباق المسكرة من المكرونة.
مكرونة بالكريمة والسبانخ والبيستو
مكرونة إيطاليانو – المصدر myfussyeater
ممكن تسميها مكرونة hulk أو المكرونة بالصوص الأخضر عشان ولادك يحبوها ومش لازم نقول إن فيها سبانخ، بس ممكن نقول إنها هتخلينا أقوياء زي أبطال الكارتون المحبوبين عند أطفالك. الوصفة دي كريمية جدًا ولذيذة وتقدري كمان تضيفي لها البسلة المسلوقة وتضربي كل الصوص في الخلاط أو بالمضرب اليدوي لقوام ناعم.
المقادير
- 1 كيس مكرونة إيطاليانو بينا
- 1 معلقة كبيرة صلصة بيستو جاهزة
- 400 جم سبانخ مجمدة
- عصير ليمون
- 1 كوب كريمة
- ملح وفلفل
- 2 معلقة كبيرة جبنة كريمي
- 1/4 كوب جبنة بارميزان
- 2 فص توم مهروس
- زبدة وزيت زيتون
الطريقة
- اسلقي مكرونة إيطاليانو حسب تعليمات المغلف واحتفظي بكوب من ماء السلق
- في طاسة على النار، شوحي التوم المهروس مع شوية من الزبدة وزيت الزيتون لحد ما ريحته تطلع وبعدين ضيفي السبانخ المجمدة بعد تصفيتها كويس جدُا من الميا.
- ضيفي البيستو والكريمة والجبنة الكريمي وقلبي المزيج مع بعض وضيفي من مياه سلق المكرونة عشان تساعد على عمل قوام مظبوط للصوص.
- سيبي المكونات تغلي مع بعض لحد قوام الصوص ما يتقل، والسبانخ تدوب جوه الصوص. كمان تقدري تضربي الصوص كله في الخلاط أو المضرب اليدوي لقوام أنعم وهيتحول الصوص معاكي لصوص أخضر ناعم جدًا.
- ضيفي عصرة الليمون والجبنة البارميزان والمكرونة ونكون جاهزين للتقديم.
- تقدري تضيفي شرايح فراخ مع المكرونة أو أي بروتين أولادك يحبوه.
لو مستعجلة، هتلاقي هنا وصفات تخلص في 15 دقيقة
الماك أند شيز بالحمص والقرع
مكرونة إيطاليانو – المصدر myfussyeater
وصفة كل الأطفال بيحبوها هنخبي فيها القرع وكمان الحمص. هو صحيح الحمص مش خضار بس له فوايد كتيرة جدًا وهيليق قوي على الوصفة دي ويديها قوام سميك. ولو طفلك عنه حساسية من منتجات الألبان، تقدري تستغني عن الجبنة، والحمص هيقوم بدور الكريمة واللبن والجبنة وهيدي قوام الماك أند شيز من غير منتجات ألبان.
المقادير
- 1 كيس مكرونة إيطاليانو (قواقع صغيرة)
- 1 كوب حمص مسلوق
- 1 كوب قرع متقطع مكعبات
- عصير ليمون
- ملح وفلفل
- زبدة وزيت زيتون
- 1 بصلة مفرومة ناعم
- 1 جزرة مفرومة ناعم
- 1/2 كوب جبنة شيدر حمرا مبشورة
الطريقة
- اسلقي مكرونة إيطاليانو حسب تعليمات المغلف واحتفظي بكوب من ماء السلق.
- في طاسة على النار، شوحي البصل والجزر في شوية من الزبدة وزيت الزيتون، ضيفي الحمص والقرع وشوحيهم على نار هادية لحد الخضروات ما تبقى طرية.
- ضيفي مياه المكرونة اللي احتفظتي بيها للخضار وغطي الخضار وسيبيه لحد ما يستوي.
- اضربي الخضار في الخلاط للوصول لقوام ناعم وكريمي.
- رجعي الصوص في الطاسة ولو قوامه تقيل ضيفي له شوية من مرقة الخضار وضيفي الملح والفلفل.
- ضيفي الجبنة الشيدر وسيبيها تسيح جوه الصوص على نار هادية وبعدين ضيفي المكرونة وقدميها.
لو حابة تلعبي وتعرفي شخصيتك من نوع مكرونتك المفضلة، ادخلي هنا.
ريزوتو لسان العصفور بصوص الفلفل الملون
مكرونة إيطاليانو – المصدر carolinescooking
المقادير
- 1 كيس لسان عصفور إيطاليانو
- 2 ثمرة فلفل أحمر
- 1 ثمرة فلفل أصفر
- 1 كوب عصير طماطم
- ملح وفلفل
- زبدة
- مرقة فراخ أو خضار
- 1 بصلة مفرومة ناعم
- 1 جزرة مفرومة ناعم
- 1/2 كوب جبنة بارميزان مبشورة
- 1 معلقة صغيرة بابريكا
- 1 معلقة صغيرة بودرة توم
- 1 معلقة صغيرة زعتر طازة أو مجفف
الطريقة
- في صينية للفرن، رصي مكعبات الفلفل الأحمر والأصفر وضيفي عليها رشة من زيت الزيتون مع الملح والفلفل وقلبيها كويس.
- اخبزي الفلفل في الفرن على حرارة 220 لمدة نص ساعة أو لحد الفلفل ما يطرى ويتشوي.
- في حله على النار، ضيفي مكعب من الزبدة وشوّحي البصل المفروم مع الجزر ورشة من الملح والفلفل لحد الخضار ما يطرى.
- ضيفي عصير الطماطم، مرقة الخضار أو الفراخ والفلفل اللي شويتيه للصوص وسيبي المزيج يغلي على نار هادية لمدة ربع ساعة.
- اضربي الصوص في الخلاط للوصول لقوام ناعم.
- رجعي الصوص للحلة وضيفي الملح والفلفل، وضيفي لسان العصفور بدون سلق وسيبيه يستوي على نار هادية مع التقليب. لو احتاجتي تضيفي سائل، زودي مرقة.
- بعد ما يستوي لسان العصفور، ضيفي له الجبنة البارميزان ورشة من زيت الزيتون وقدميه فورًا.
التعليق باستخدام حساب فيس بوك