محتويات المقال
ناس كتير شافت الفساتين الرائعة لبنات جميلة فساتينهم عليها رسوماتهم، كل طفلة رسمت عالمها الخاص على فستانها بمساعدة الفنانة المبدعة الدكتورة إنجي طلعت. دكتور إنجي طلعت، فنانة مصرية حصلت على الدكتوراه في كلية الفنون الجميلة قسم الديكور والازياء، وقررت تأسس مركز تعليم للرسم، بتقدم من خلاله ورش رسم للكبار والأطفال، وأحيانا للأم والطفل مع بعض، تحت شعار: “لوّن وانطلق”.
23 سنة شغل ودراسة في مجال الفنون من رسم لتصميم لتفصيل ملابس خصوصا للأطفال، عشان كده المركز فيه قسم للتفصيل، أما طباعة رسومات الأطفال على هدومهم فبيكون من تنفيذ مطبعة.
المركز بيعلّم فنون الرسم والتلوين ومبادئ الظل والنور والمنظور وكمان الديكوباج، راحة بالي قابلت دكتورة إنجي عشان نعرف منها إزاي نحافظ على موهبة الطفل اللي بيحب الرسم أو عنده بوادر تميز في مجال الفن كخطوة على طريقة تربيته بشكل إيجابي.
اقرأي أيضا: ألوان للرسم على وجه الأطفال بطريقة آمنة
مركز رسومات كورسز لتعليم الرسم للأطفال
من سن كام نبدأ نهتم ونراعي الطفل الموهوب في الرسم؟
من سن أربع سنين، أقل من كده نسيبه براحته تمامًا بدون أي توجيه، وبرضو نديله أدوات يرسم ويشخبط براحته، يعني نديله فرشة وألوان واقلام بدون أي توجيه.
الفكرة إن الطفل يلعب ويشخبط ويطلّع الطاقة اللي جواه، قبل أربع سنين العضلات ضعيفة ماقدرش أخليهم يتحكموا في حركتهم أو إيديهم، لكن بعد أربع سنين ممكن أوجههم نرسم دايرة أو مربع وشوية تعديلات وأسيبهم برضو ينطلقوا.. الفن أساسه الانطلاق و أجمل حاجة عند الطفل خياله مقدرش أقيدة..هو حر يلعب ويلوّن، و بلبسه المريلة عشان يبدع بدون خوف على هدومه، الطفل لو حس إنه خايف مني أو خايف من حاجة مش هايطلع اللي جواه بصدق.
بحب أشوف عشوائية الطفل لأنها ممكن تطلع حاجات حلوة جد.. مفتاج إبداع الطفل الحرية.
إزاي نعرف إن الطفل موهوب في الرسم؟
بيبان من إحساسه بالألوان، ولما بييجي ينقل النسب من لوحة للوحة، زاوية مسك الفرشة، بيدخل برا الخط ولا بيفضل جوه الخط، مع ذلك الرسم مهارة مكتسبة ممكن مايكونش الطفل موهوب لكن أعلمه الرسم.
إيه هي فوايد تعلم الرسم؟
بيبعد الطفل عن الموبايل واللابتوب والكومبيوتر وبيطلع طاقة جواه في اللوحة ويوصلنا رسالة هو نفسيته عاملة إزاي.
لما يرسم باباه صغير ومامته كبيرة، نعرف إن مامته مهمة وباباه هامشي في حياته، يرسم سكينة ودم نعرف إنه في مشكلة في حياته، يرسم نفسه متعور نفسهم إن حد بيأذيه، الرسمة بتاعة الطفل وألوانه نفسها بتقول حاجات كتير، فيه أطفال تختار درجات الأخضر و الأزرق فنعرف إنهم أطفال هادية، في حين أطفال تختار درجات الأصفر والأحمر نعرف إنهم عندهم طاقة.. الفن بيفيد في نشأة الطفل زيه زي الرياضة.
الأم تجيب إيه من المكتبة تساعد بيه الطفل على تنمية موهبته في الرسم؟
كل أم وجرأتها، فيه ستات بتخاف فهاتجيب علبة ألوان وشوية ورق كانسون، في أمهات تانية مش بتخاف زي الأجانب هاتجيب ألوان سايلة إكريليك أو جواش آمنة وغير مسممة، ولوحة كانفا بتكون عبارة عن قماش مشدود والطفل ياخد الألوان والبالتة ويقعد في مكان فاضي حديقة أو أرضية ممكن تتمسح، وينطلق.
الفكرة في الانطلاق، الأجانب بيسيبوا الأطفال يعملوا اللي هم عايزينه حتى في فيديوهات عيد الميلاد بنشوف الطفل قدام التورتة بيتصرف فيها زي ما هو عاوز ياكل براحته وبإيده بمنتهى الحرية. للأسف في أوقات كتير بنوتر الطفال، في حين إنهم محتاجين يعيشوا حياتهم وينطلقوا.
هل صحي إننا نسيب الطفل يرسم على الحيطة وعلى كل حاجة في البيت؟
صحي جدا إننا نسيبهم يرسموا على الحيطة وكل حاجة، ونصيحتي لكل أم إنها تخصص حيطة واحدة لإبنك وتقوله الحيطة دي بتاعتك ارسم عليها زي ما إنت عايز، هاتلاقي مراحل تطور الطفل على حسب طوله، هايرسم على الحيطة في كل مرحلة بطول مختلف وأسلوب مختلف، في النهاية الحيطة بتاعتا بتكون لوحة فنية وتوثيق للطفل على مدار سنين عمره.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك