على طريقة رامي جمال.. سقفت وعمري ما وقفت

ده المقال الأول ليا من سلسلة مقالات “النفسية بعافية”.. هنتقابل كتير.. هكلمكم عني، وعنكم، وعن أولادنا.. عن حاجات بحبها وحاجات بتحبوها..

هعرف نفسي معاكم، وهتعرفوا نفسكم معايا.. هنضحك سوا.. وهنعيط سوا.. هنحاول كتير بس في االنهاية مصرينا نوصل..

أنا شيماء الجمال.. ومالاقتش أجمل من أغنية رامي جمال الجديدة “سقف سقف.. اوعى توقف” تبقى بداية تعارفنا ببعض..

مين قال إننا هنسقّف.. ومش هنعمل حاجة؟  لأ.. إحنا هنسقف وكل سقفة هتكون بمحاولة.. كل سقفة بمعركة صغيرة هننتصر فيها على شيء صغير بنحاربه لوحدنا..

أنا سقّفت كتير.. ولحد دلوقتي بسقّف وعمري ما وقفت..

لما رجعت من السعودية إللي قضيت فيها كل طفولتي.. ما عنديش أصحاب.. ما بعرفش أفهم إنجليزي كويس.. ما بلعبش رياضة.. ما بعملش حاجات كتير بحكم ستايل العيشة هناك.. سقفت.. سقفت كتير علشان يبقى ليا حياة وأصحاب وزمايل..

لما جريت ورا حلمي وبدأت أكتب في جرايد ومجلات كتير ببلاش علشان أتعلم وأكبر وأبقى حاجة.. كنت بسقف.. سقفت كتير علشان أكون هنا بكتب لكم المقال ده..

لما خلفت أولادي التوأم.. وحولت تجربتي مع الحمل والولادة وتربية الأولاد لمشروع “أنا حامل”.. إللى بقى بعد كدة واحد من أكبر مواقع الحوامل والأمهات في الشرق الأوسط.. وإللي بقى دلوقتي من ضمن المشاريع المملوكة راحة بالي.. كنت بسقّف..

لما كتبت كتاب تاء مربوطة، إللي اتكلمت فيه عن خواطر وتأملات واحدة من الستات في مصر.. لما كتبت كتاب أنا حامل.. لما كتبت حتة مني وأخيرا كتاب البسكوتة والدحلاب.. كنت بسقف.. كنت بسقف وأنا بحول ألمي وخوفي وتجاربي وأسراري لكلام منشور في كتاب ممكن يفيد الناس..

سقفت كتير.. سقفت حتى لما انفصلت عن جوزي.. وحياتي الأسرية انتهت.. أخدت كورسات كتير وذاكرت وحضرت حاجات كتير علشان أتعلم من التجربة دي  لما الموضوع شدني جدًأ وقريت وذاكرت فيه كتير، بقيت كاتبة متخصصة في العلاقات والصحة النفسية..

لما اكتشفت من 3 سنين تشخيصي بمرض اضطراب وجداني ثنائي القطب Pipolar2.. سقّفت.. حضرت عشرات الجلسات العلاجية.. ورش عمل جروبات علاج نفسي جمعي.. وقررت إني أحوّل تجربتي مع المرض ده لشئ يلهم ويفيد كل الناس، قررت أساعد كل مرضى الاكتئاب بكتابتي.. قررت أحاول وأشتغل وأنجح قوي علشان أديهم أمل إنهم يقدروا همّا كمان يعملوا كدة.

إحنا مولودين في الدنيا دي علشان نفضل نسقّف لمّا الدنيا تسخّف.. نسقّف يعني نحاول.. نسقّف يعني نعافر.. يعني نسعى.. يعني نصدق في بكرة أحلى.. نسقف يعني نصدق في إنه ربنا كبير وإننا هنوصل..

شكرًا رامي جمال.. علشان بتسقّف معانا وبهدي أغنيتك لكل أم بتحاول وبتعافر.

أتمنى تكونوا اتعرفتوا عليا كويس 🙂