أكتر شكوى في رحلة الرجيم وفقدان الوزن الناس بتشتكي منها هي الدهون في منطقة البطن، وكتير بيكون مستغرب جدا إيه السر اللي يخلي الجسم يخس من كل مكان إلا البطن، اشمعنى دي أكتر منطقة بترفض تخس تماما وبتكتنز الدهون بطريقة مستفزة وبتخلي أي رجيم يتعمل كأنه ماتعملش لأنها مش بس مابتنزلش بطريقة مرضية لكنها كمان أسرع منطقة بترجع وبقوة تكتنز الدهون بمجرد ما الرجيم يقف.
كل السر في كل ده هو مقاومة الأنسولين واللي بيكون مسئول بنسبة كبيرة جدا عن اكتناز الجسم للدهون في منطقة البطن والخطر هنا مش مجرد مقاس صعب أو شكل مش حلو وبس لكن كمان مخاطر صحية ماتخطرش على بالك هانشرحها بالتفصيل في المقال ده.
هنا ممكن تشوفي أهم فوائد القرنفل.. هتخليكي تستخدميه علطول
يعني إيه إنسولين أساسا؟
الأنسولين عبارة عن هرمون بيفرزه البنكرياس في جسم الإنسان عشان يساعد الجلوكوز الموجود في الدم والكبد إنه يدخل الخلايا ويتحول لطاقة، وده باختصار شديد جدا.
يعني إيه مقاومة الإنسولين في الجسم؟
مقاومة الإنسولين بتحصل لما ما يحصلش استجابة جيدة للأنسولين وبالتالي الخلايا مش بتمتص الجلوكوز من الدم وبالتالي بيبدأ الخلل.
طول ما البنكرياس بيفرز أنسولين كفاية مستويات الجلوكوز في الدمن هاتفضل في النطاق الصحي، أما لو في مشكلة في إنتاج الأنسولين من هنا بتبدأ المشكلة اللي ممكن توصلنا للإصابة بمرض السكر.
الطريق لمرض السكر
في 84 مليون شخص في عمر 18 فيما فوق في الولايات المتحدة الأمريكية عندهم مقدمات لمرض السكر، بنتكلم عن 1من كل 3 بالغين، الرقم مرعب فعلا والأرقام مش أقل في بلادنا اللي النشويات والسكريات فيها جزء أساسي من كل الوجبات.
لما تكون مستويات السكر في الدم أعلى من المعتاد نقدر نقول إنه ده المقدمة الحقيقية للإصابة بالسكر، صحيح لسة مفيش سكر، لكن وجود السكر في الدم بمعدل أعلى من الطبيعي معناه إنه خلالا بيتا في البنكرياس مش بتنتج أنسولين كفاية عشان يحافظ على السكر في الدم في معدلاته الطبيعية، ومع مرور الوقت ممكن ييجي مرض السشكر من النوع التاني تمهيدا للإصابة بالنوع الأول.
مين أكتر ناس بيحصلها مقاومة الأنسولين
- الناس اللي وزنها زيادة أو عندهم سمنة
- الناس اللي عمرها 45 سنة أو أكبر
- الناس اللي عندهم عوامل وراثية وتاريخ للإصابة بمرض السكر
- نمط الحياة الغلط يعني حركة أقل وأكل أكتر
- وجود ارتفاع في ضغط الدم أو مستويات كوليسترول غير طبيعية
- تاريخ للأصابة بسكر الحمل
- تاريخ لللإصابة بأمراض القلب والسكتة الدماغية
- متلازمة تكيس المبايض
- متلازمة التمثيل الغذائي (بتكون عبارة عن ضغط وكوليسترول عاليين وتركيز دهون في البطن).
- تناول بعض الأدوية ومضادات الذهان وبعض أدوية الإيدز
- الاضطرابات الهرمونية
- مشاكل النوم خاصة توقف التنفس أثناء النوم
- الانتماء العرق يعني الأمريكيين من أصل إفريقي وسكان آلاسكا الأصليين وبعض الأعراض بتكون عرضة للإصابة بالسكر عن غيرها.
إزاي نوقف مقاومة الأنسولين في جسمنا؟
النشاط البدني هو كلمة السر، وكمان فقدان الوزن، الدايت هنا مش مجرد رفاهية عشان نلبس أحسن، لكن كمان عشان نحافظ على صحتنا ونمنع الإصابة بمرض السكر، مع خطوات تانية زي الأكل الصحي.
في دراسات أظهرت إنه الناس اللي خسوا 5لـ 7 % من وزنهم قلت فرص الإصابة عندهم بالسكر، كمان أشارت بعض الدراسات إن تناول بعض الأدوية الخارجية بوصف الطبيب زي الميتفورمين ممكن يأخر الإصابة بمرض السكر، وطبعا وجود خطة ودعم من الأسرة والأصدقاء والطبيب المعالج هايكون مقدمة حقيقية لتغيير نمط الحياة، وتجنب تطور مقاومة الجسم للانسولين لمرض السكر.
المصدر:
التعليق باستخدام حساب فيس بوك