محتويات المقال
أطباق المقبلات على سفرة رمضان بتكون مهمة جدًا لدرجة إن بعض الناس ممكن تفطر مقبلات وشوربة وبس كده، وبصراحة أنا شخصيًا، أيام كتير بيكون ده فطاري وخصوصًا لو فيه تنوع في أصناف المقبلات. حتى في العزومات، هتلاقي دايمًا إقبال رهيب على الكبيبة والسمبوسك والسلطات بأنواعها، واحنا في مصر بنحب قوي المقبلات اللبنانية إللي هم حقيقي متميزين ومشهورين جدًا بيها. عشان كده احنا النهارده هنشجعك تحضري أحلى كورنر مقبلات ومزّات لبنانية سخنة وباردة عشان تكون مميزة جدًا في عزوماتك 6 مقبلات من المطبخ اللبناني هتبهري بيها ضيوفك وصدقيني مش هتحتاجي جنبها غير أطباق رئيسية بسيطة وخفيفة وهتكون هي نجمة عزومة رمضان.
أشهر 6 مقبلات من المطبخ اللبناني
-
البطاطا الحارة
مقبلات من المطبخ اللبناني – المصدر: feelgoodfoodie
المقادير
- 3 حبات بطاطس كبيرة مقشرة ومقطعة مكعبات
- زيت غزير لتحمير البطاطس
- 1/2 كوب كزبرة خضراء مفرومة
- 1 معلقة كبيرة توم مفروم
- 1 معلقة كبيرة بصل مفروم ناعم جدًا
- 1 فلفل أحمر حار مفروم
- 1/2 معلقة صغيرة شطة مجروشة (اختياري)
- 2 معلقة صغيرة كزبرة ناشفة
- ملح وفلفل
- 1/4 كوب عصير ليمون
- زيت زيتون
طريقة عمل البطاطا الحارة
- حمري مكعبات البطاطس في زيت غزير ساخن نص تحميرة، لحد ما يكون لونها ذهبي فاتح، وصفّيها كويس على مناديل مطبخ.
- في طاسة على نار عالية، سخني زيت الزيتون وشوحي البصل، والتوم، والفلفل الحار لحد ما يبقى التوم لونه ذهبي.
- ضيفي مكعبات البطاطس إللي قليتيها وتبليها بالكزبرة الناشفة والملح والفلفل، وشوحيها على نار متوسطة.
- أخيرًا ضيفي عصير الليمون وقلبي كل المكونات كويس لحد ما تتشرب البطاطس عصير الليمون.
- اطفي النار وضيفي الكزبرة الخضراء وقدميها ساخنة.
ادخلي على اللينك ده عشان تعرفي 5 طرق لعمل الفول على السحور
-
السجق اللبناني بدبس الرمان
مقبلات من المطبخ اللبناني – المصدر pinterest
المقادير
- 1/2 ك سجق لبناني (سجق مارجيز ويمكن استبداله بأي نوع سجق تحبيه)
- 1 بصلة مقطعة جوانح
- 2 معلقة كبيرة زيت زيتون
- 1 معلقة صغيرة توم مفروم
- ملح وفلفل أسود
- 1/4 كوب دبس رمان
- 1/4 كوب مرقة خضار
- 1/2 معلقة كزبرة ناشفة
- للتزيين: صنوبر حبوب رمان – كزبرة خضراء – شرايح ليمون
طريقة عمل السجق بدبس الرمان
- في طاسة على نار عالية، شوّحي السجق في زيت الزيتون لحد ما يبدأ يتغير لونه.
- ضيفي التوم المفروم والبصل واستمري في التشويح على نار متوسطة لحد ما البصل يطرى.
- تبلي بالملح والفلفل والكزبرة الناشفة وضيفي دبس الرمان ومرقة الخضار وسيبي الصوص يغلي على نار متوسطة لمدة 5 دقايق لحد ما يسمك القوام.
- زيني بحبوب الرمان والصنوبر وقدميه ساخن مع عصرة ليمون وخبز لبناني.
-
الكبيبة الشامي المقلية (على طريقة شيف غادة التلي)
مقبلات من المطبخ اللبناني – المصدر: youtube
المقادير
- 1 كيلو برغل
- 4 بصلات
- 1 معلقة صغيرة كمون
- 1 معلقة صغيرة كزبرة
- ملح وفلفل أسود
مقادير حشوة الكبيبة:
- 1 كيلو لحمة مفرومة معصجة
- 1 معلقة كبيرة سمنة
- ملح وفلفل
- بهارات
- جوزة الطيب
- عين جمل وصنوبر
طريقة عمل الكبيبة الشامي المقلية
- لتحضير حشوة الكبيبة: تتبل اللحمة بالملح والفلفل وجوزة الطيب ثم يضاف عليها عين الجمل والصنوبر.
- في محضرة الطعام، يفرم البصل مع اللحمة والبرغل جيدًا حتى ينعم البرغل ويمتزج مع اللحمة.
- تتبل بالملح والفلفل والكزبرة الناشفة والكمون.
- تشكل عجينة اللحمة والبرغل وتحشى بالعصاج ثم تغلق وتكور.
- تكرر هذه العملية حتى نفاذ كمية عجينة البرغل باللحم.
- توضع بالفريزر حتى تتماسك ثم تقلى في زيت غزير وهي مجمدة وتقدم ساخنة.
سلطة الراهب
مقبلات لبنانية – المصدر: kitchen.sayidaty
المقادير:
- 2 بتنجان رومي متوسط الحجم
- 2 حبة طماطم مقطعة مكعبات بدون البذور
- 1 حبة بصل أحمر صغيرة مفرومة ناعم
- 1 كوب بقدونس مفروم
- 1 معلقة كبيرة دبس الرمان
- 1 حبة فلفل أخضر مفروم ناعم
- 2 فص توم مهروس
- زيت زيتون
- 1 معلقة كبيرة عصير ليمون
- ملح وفلفل
- للتزيين: أوراق نعناع-رمان-صنوبر
طريقة عمل سلطة الراهب
- قومي بشوي الباتنجان في الفرن على حرارة 220 أو على عين البوتجاز.
- قشري البتنجان، وفي بولة، اهرسيه كويس بالشوكة وضيفي عليه كل الخضراوات واخلطي كويس.
- تبلي السلطة بالملح والفلفل وضيفي زيت الزيتون ودبس الرمان وعصير الليمون.
- زيني السلطة بالرمان والصنوبر وأوراق النعناع وتقدم باردة مع خبز لبناني محمص.
طريقة عمل الفتوش
مقبلات لبنانية – المصدر: hungryhealthyhappy
المقادير:
- 2 حبة طماطم مقطعة مكعبات بدون البذور
- 2 حبة خيار مكعبات
- 1/2 حبة بصل أحمر مكعبات
- 1 حبة فلفل أخضر مكعبات
- 1 حبة فجل مقطعة شرائح
- شرايح الخس الكابوتشا أو البلدي
- 1/2 كوب أوراق النعناع الأخضر
- 1/4 كوب بقدونس مفروم ناعم
- 2 رغيف خبز لبناني مكعبات محمص أو مقلي
للدريسينج
- 1 فص توم مهروس
- 1/4 كوب زيت زيتون
- عصير ليمونتين
- 1 معلقة صغيرة سماق
- 1 معلقة كبيرة دبس رمان
- ملح وفلفل
طريقة عمل الفتوش
- اخلطي كل مكونات الدريسينج في بولة.
- امزجي كل الخضراوات مع بعض في بولة كبيرة وضيفي الدريسينج وقلبي كل المكونات كويس.
- رصّي شرايح الخبز على الوجه وزينيها بالنعناع والرمان.
الحمص باللحمة
مقبلات لبنانية لسفرة رمضان – المصدر: acedarspoon
المقادير
لخلطة اللحمة:
- 1/4 كيلو لحم بقري راس عصفور (مقطع قطع صغيرة جدًا بيسموها في لبنان راس عصفور)
- ملح وفلفل
- 1/2 معلقة صغيرة بهارات لحمة
- 1/2 معلقة صغيرة بابريكا
- معلقة كبيرة زبدة
لخلطة الحمص:
- 2 كوب حمص مسلوق ومصفى
- 1/2 كوب طحينة
- 1/2 كوب زيت زيتون
- 1/4 كوب عصير ليمون
- 2 فص توم
- ملح
- كمون
- مكعبات تلج
- للتقديم: صنوبر، أو لوز محمص
طريقة عمل الحمص باللحمة
- لتحضير اللحمة: في طاسة على النار، شوّحي اللحمة في الزبدة وتبليها بالبهارات والبابريكا والملح والفلفل لحد ما يبقى لونها دهبي، ومستوية مش هتاخد أكتر من 10 دقايق مع التشويح نظرًا لحجمها الصغير جدًا.
- لتحضير الحمص: في محضرة الطعام ضيفي الحمص مع 4-5 مكعبات من التلج، التلج هيساعدك في الحصول على قوام ناعم وكريمي للحمص.
- اخلطي كل مكونات الحمص في محضرة الطعام لحد ما توصلي لقوام متجانس وناعم.
- قدمي الحمص في طبق التقديم وبظهر معلقة، اعملي فجوة في سطح الحمص وضيفي فيها اللحمة، زيني بالصنوبر وأوراق النعناع.
ادخلي على اللينك ده عشان تتعرفي على 30 أكلة شهية لسفرتك في رمضان
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك