محتويات المقال
المكرونة تعتبر طبق من أكتر الأطباق اللي ليها شعبية في العالم كله وخصوصًا عند حبايبنا الصغيرين، بيحبوها جدًا وبتكون من أكتر الوجبات المفضلة عندهم، من أول ما يبدأوا يتعرفوا على الأكل. أسباب كتير تخلي الأطفال تحب المكرونة، يمكن عشان طرية وبتتشرب طعم الصوص المضاف ليها سواء أحمر أو أبيض، يمكن عشان أشكالها المتنوعة، ويمكن عشان طعمها لذيذ ومغذية، أسباب كتير قوي تخليهم يعشقوها.
مكرونة إيطاليانو ظهرت في الأسواق المصرية من 2014 وحققت نجاح كبير جدًا بجودتها العالية في التصنيع، وتغليفها المبهج بألوانه وتصميماته المختلفة وكمان اهتمامها بالأشكال اللي الأطفال بيحبوها. عملت لهم مجموعة أشكال مخصوصة ليهم، عشان تسهل علينا كأمهات ننوع ونبتكر وصفات لذيذة ترضيهم طعمًا وشكلًا كمان. حققت مكرونة إيطاليانو نجاح كبير جدًا في الأسواق المصرية وبقت هي المفضلة عند كتير من الأمهات والستات، وقدرت تحقق الجودة اللي بيها قدرت تنافس مش بس الماركات المصرية لكن كمان العالمية.
النهاردة حابين نشاركك خمس أفكار لأطباق مكرونة بيعشقوها الأطفال باستخدام خمس أشكال متنوعة من مكرونة إيطاليانو، جربي اعملي الوصفات دي لأولادك بمكرونة إيطاليانو وصدقيني.. هيحبوها جدًا!
الوصفة الأولى
لسان العصفور باللحمة المفرومة والخضار
مكرونة – إيطاليانو – المصدر yummly
يمكن يكون لسان العصفور هو أول نوع مكرونة بياكلوه الأطفال أول ما يبدأوا يدخلوا في المرحلة العمرية اللي تسمح لهم ياكلوا زي الكبار. سر حبهم ليه هو حجمه الصغير وشكله حباته اللذيذ وكمان لإنه بيتشرب أي طعم بيتضاف عليه. والنهارده جيبنا لك وصفة وجبة متكاملة لأطفالك فيها اللحمة والخضار والنشويات وكمان هتعمليها في حلة واحدة.
المقادير
- 1 كوب لسان عصفور إيطاليانو
- 1 وربع كوب مرقة خضار أو فراخ
- 1 معلقة كبيرة صلصة طماطم
- 1/2 كوب جزر مبشور
- 1/2 كوب كوسة مبشورة
- 1/2 كوب لحمة مفرومة متعصجة
- ملح وفلفل
- 1/2 معلقة كركم
- 1/2 معلقة قرفة
- زبدة وزيت نباتي
للتقديم
- جبنة بارميزان مبشورة
- بقدونس مفروم
طريقة التحضير
- في حلة على النار، ضيفي مكعب من الزبدة مع معلقة من الزيت النباتي وشوحي لسان عصفور إيطاليانو مع التقليب المستمر لحد ما توصلي للون دهبي جميل.
- ارفعي لسان العصفور من الحلة وسيبيه على جنب لحد ما تحتاجيه.
- في نفس الحلة، هتضيفي رشة خفيفة من الزيت وتشوحي فيها الخضراوات وبعدين تضيفي اللحمة المفرومة المتعصجة وتشوحيها مع الخضار كويس.
- ضيفي صلصة الطماطم وشوحيها كويس وبعدين ضيفي المرقة.
- ضيفي الكركم والقرفة والملح والفلفل وبعد ما تغلي المرقة وتبدأ تتشرب، وطي النار تمامًا وغطي الحلة وسيبي لسان العصفور يستوي.
- في خلال 15 دقيقة، هيكون عندك أحلى لسان عصفور إيطاليانو قدميه مع الجبنة المبشورة ورشة بقدونس.
الوصفة التانية
شوربة الخضار بمكرونة إيطاليانو (الحروف أو أشكال الحيوانات)
مكرونة – مكرونة إيطاليانو
مكرونة – إيطاليانو – المصدر serenabakessimplyfromscratch
شوربة الخضار من الوصفات المفيدة جدا لصحة الأطفال ومغذية كمان. عشان تشجعيهم ياكلوها ويحبوها وكمان تزودي قيمتها الغذائية، هتضيفي عليها مكرونة إيطاليانو سواء شكل الحروف، أو أشكال الحيوانات.
شوربة الخضار بمكرونة إيطاليانو (الحروف أو أشكال الحيوانات)
المقادير
- 150 مكرونة إيطاليانو مسلوقة
- 1 لتر مرقة خضار أو فراخ
- 1/2 كوب من شرايح الفراخ المسلوقة
- 1 كوب خضراوات مشكلة مقطعة قطع صغيرة
- 1 كوب طماطم مبشورة
- معلقة صغير زعتر مجفف
- زبدة
- 1 فص مستكة
طريقة التحضير
- في حلة على النار، شوحي المستكة في مكعب من الزبدة لحد ما تدوب تمامًا.
- ضيفي الخضروات المشكلة وشوحيها وضيفي الفراخ المسلوقة وشوحيها مع الخضار.
- ضيفي الطماطم المبشورة ومرقة الخضار أو الفراخ وغطي المزيج وسيبيه على نار متوسطة 30 دقيقة لحد ما الخضار يستوي.
- ضيفي مكرونة إيطاليانو المسلوقة والملح والفلفل ورشة الزعتر.
- قدميها سخنة مع عصير الليمون.
الوصفة التالتة
الماك أند شيز أو المكرونة بصوص الأجبان
مكرونة – مكرونة إيطاليانو – المصدر foodnetwork
مفيش شك إن كل الأطفال بيعشقوا الجبنة بأنواعها، فإيه رأيك لو عملنا لهم وصفة مكرونة كلها أجبان باستخدام مكرونة إيطاليانو؟ وصفة مغذية جدًا وغنية وطعمها روعة وأحلى حاجة فيها مكرونة إيطاليانو لإنها مصنوعة من أجود أنواع قمح الديوروم فعمرها ما بتعجن أبدًا وبتحتفظ بقوامها جوه الصوص.
المقادير
- 1 كيس مكرونة إيطاليانو مسلوقة
- 2 كوب صوص بشاميل خفيف القوام
- 2 كوب من الأجبان المشكلة (جودة-شيدر-بارميزان-جبنة كريمي)
- 3 معالق كبيرة بقسماط ناعم
- بقدونس مفروم ناعم
- 2 معلقة صغيرة توم مفروم
- 1 معلقة صغيرة بابريكا
- زبدة
الطريقة
- في حلة على النار، هتشوحي التوم المفروم في مكعب من الزبدة لحد لونه ما يبقى ذهبي، بعدها ضيفي البشاميل، والملح والفلفل والبابريكا لحد ما يسخن على النار.
- هدّي النار وضيفي كوب من الأجبان جوه البشاميل وسيبيها تدوب على نار هادية جدًا مع التقليب.
- ضيفي مكرونة إيطاليانو المسلوقة وقلبيها كويس مع صوص الجبنة وصبي المزيج في صينية فرن مدهونة بالزبدة مع رشة من البقسماط الناعم.
- زيني الوش بكوب من الأجبان المشكلة ورشة تانية من البقسماط والبقدونس المفروم ودخليها الفرن لحد ما الأجبان تسيح والوش يحمر.
الوصفة الرابعة
المكرونة الإسباجيتي بصوص البولونيز
مكرونة – إيطاليانو – المصدر errenskitchen
ومين فينا ما مسكتش التليفون وفضلت تصور ولادها وهما بياكلوا المكرونة السباجيتي ويملوا الدنيا حواليهم صلصة ووشهم كله يبقى مكرونة في مكرونة؟ بهدلة صحيح بس بتبقى لحظات ممتعة والأطفال بتستمتع جدًا وهي بتاكل وبتشفط المكرونة! عشان كده النهارده جيبنا لك أحلى وصفة للسباجيتي بولونيز بمكرونة إيطاليانو، اوعي تكسري المكرونة وانتي بتسلقيها، سيبيها والأولاد هيتصرفوا، ما تقلقيش!
المقادير
- 1 كيس مكرونة سباجيتي إيطاليانو مسلوقة
- 1/2 كيلو لحم مفرومة
- 1 بصله مفرومة
- 1 فص توم مهروس
- 1 ثمرة جزر مكعبات صغيرة
- 1/4 كوب كرفس مفروم
- 1 معلقة صغيرة زعتر
- 2 كوب عصير طماطم
- 1 معلقة صلصة طماطم
- 1/4 كوب جبنة بارميزان مبشورة
- زيت زيتون
- ملح وفلفل
طريقة العمل
- في طاسة على النار، ضيفي زيت الزيتون وشوحي البصل والتوم والكرفس والجزر مع بعض لحد ما تبدأ الخضروات تطرى وبعدين ضيفي الملح والفلفل والزعتر وقلبي كويس.
- ضيفي اللحمة المفرومة وقلبيها مع الخضروات لحد ما تبدأ تستوي ويتغير لونها، ابدأي ضيفي صلصة الطماطم وعصير الطماطم.
- غطي الطاسة وسيبي الصوص يغلي على نار هادية لمدة ساعة على الأقل عشان تستخلصي منه كل النكهات وفي الأثناء دي ممكن تضيفي ميه لو الصوص نشف.
- ضيفي شوية من الجبنة جوه الصوص وقدمي السباجيتي المسلوقة مع كمية وفيرة من صوص البولونيز وجبنة زيادة على الوش.
الوصفة الخامسة
المكرونة بالصوص الأبيض والفراخ
مكرونة – إيطاليانو – المصدر tasteofhome
مكرونة – إيطاليانو – المصدر italiano facebook
أطفال كتير بتفضل المكرونة بالصوص الأبيض أكتر من صوص الطماطم، وعشان نلّبي كل رغباتهم، إيطاليانو بتقدم لهم وصفة المكرونة بالصوص الأبيض مع شرايح الفراخ. أشكال كتير من إيطاليانو تنفع للصوص الأبيض، زي البينا واللينجويني والفوسيلي اللي بيسموها الأطفال السوستة، وكمان الفارفيلي اللي شكلها شبه الفراشات أو الفيونكات. إيطاليانو عندها 15 شكل للمكرونة تقدري تختاري منها اللي يحبوه ولادك. تقدري كمان للوصفة دي تضيفي أي نوع خضراوات عشان تزودي القيمة الغذائية للطبق زي السبانخ، أو البسلة مثلًا.
المقادير
- 200 جم مكرونة إيطاليانو
- 1 معلقة كبيرة دقيق
- 1 معلقة كبيرة من الزبدة
- 2 كوب لبن كامل الدسم
- 1/2 كوب كريمة طهي
- 1 معلقة كبيرة جبنة كريمي
- 1/4 كوب من ماء سلق المكرونة
- 1 معلقة صغيرة بودرة التوم
- 1 معلقة صغيرة زعتر فريش مفروم
- ملح وفلفل
- جوزة الطيب
- شرايح صدور فراخ مسلوقة أو مشوية
- بقدونس للتقديم
- جبنة بارميزان للتقديم
الطريقة
- في حلة على النار، هتحطي معلقة الزبدة وتقلّبي فيها الدقيق على نار متوسطة كإنك هتعملي بشاميل لحد ما تتخلصي من ريحة الدقيق الني.
- ضيفي كوبايتين اللبن ويكونوا في حرارة الغرفة وقلبي كويس باستخدام مضرب سلك لمنع أي تكتلات.
- ضيفي الكريمة والملح والفلفل وبودرة التوم والزعتر الفريش وسيبي المزيج يغلي على نار هادية ويتكثف وقوامه يتقل شوية.
- ضيفي الفراخ المسلوقة أو المشوية والجبنة الكريمي ورشة من جوزة الطيب والمكرونة المسلوقة مع كمية بسيطة من مياه سلق المكرونة عشان هتساعد على إضافة قوام للصوص.
- قدمي المكرونة لأولادك مع رشة من البقدونس والجبنة البارميزان.
التعليق باستخدام حساب فيس بوك