محتويات المقال
كي الملابس بصراحة يعتبر بالنسبة لي تاني أصعب شيء في الحياة بعد غسيل الأطباق، بس على الرغم من العلاقة المعقدة المركبة دي إلا إن الكي موضوع محتاج شطارة وشوية مهارات بمجرد ما تتعلميها هتلاقي نفسك بتكوي الهدوم بالشكل اللي يخليها كإنك لسه شرياها حالًا.
موضة ديكورات 2021: أحدث ألوان دهانات الحوائط
الموضوع مش إني هاسخّن المكواة وانطلق، الموضوع محتاج تعرفي نوع الخامة اللي هتكويها، درجة الحرارة المناسبة للخامة دي، الكوي مباشر ولا بالبخار، وكل ده على فكرة بيكون مكتوب على قطعة الملابس نفسها على الملصق بتاعها، مهم جدًا تقريه قبل ما تبدأي تكوي.
إزاي أنضف الأجهزة المنزلية وأحافظ عليها؟
فتعالي شوفي انتي محتاجة إيه علشان تكوي زي المحترفين:
-
ترابيزة المكواة
من المهم جدًا تشتري واحدة يكون طولها بيتعدل بحيث تتناسب مع طولك، لا تكون عالية تتعب ذراعك، ولا قصيرة تتعب ظهرك، وتكون متبطنة كويس ويكون تبطينها قطن علشان يستحمل حرارة الكوي، وما يتحرقش ويلزق في هدومك والمكواة.
-
النظافة
لو هتفرشي على ترابيزة وتكوي مباشرة، تأكدى إنها نضيفة، لإن الحرارة كفيلة إنها تخلي أي بقعة تمسك في هدومك وتخلي يومك ينتهي قبل ما يبدأ.
-
اعرفي نوع القماش
مهم تعرفي نوع القماش إذا كان قطن ولا كتان ولا شيفون ولا بوليستر، ده لإن كل نوع من دول له حرارة وتعامل مختلف مع المكواة، ده غير إنك لازم توّقفي المكواة مباشرة لو لاحظتي إن الهدوم مش نضيفة تمامًا، لإنك لو كويتيها وهي فيها بقع، البقعة دي هتفضل موجودة للأبد على هدومك.
-
تجنبي اللمعة
من الحاجات اللي بيعاني منها أصحاب الملابس الغامقة إنها لما تتكوي بيظهر عليها لامعة تحسسك إن المكواة لسعت القماش. علشان كده، الملابس دي لازم تتكوي على ظهرها مش وشها، ولو مش نافع زي مثلًا ما بيحصل مع جاكت بدلة، يبقى لازم تستخدمي قماشة قطن 100% مش سميكة قوي ولا رفيعة قوي، حاجة زي كيس مخدة كعازل بين المكواة والجاكت.
-
بلاش مياه الحنفية
من طرق الكوي الصحيحة واللي هتحافظ لك على جهازك إن المياه اللي بتملي بيها المكواة تكون من الفلتر، حتى لو مكتوب عليها املي من الحنفية عادي، بس دايمًا مياه الحنفية فيها رواسب وكلور تقدر تأثر بالسلب جدًا على جهازك.
موضة شتاء 2021 للمحجبات: أجمد 10 لوك لهذا الشتاء
-
بلاش حركة دائرية
لما تيجي تكوي، خصوصًا لو الخامة بتمط، بلاش الكوي بشكل دائري، لإنه بيساعد على تمدد النسيج نفسه، هتلاقي التيشيرت مثلًا وسع بزيادة بسبب طريقة الكوي دي، الصح هو الضغط والسير بخطوط مستقيمة للحفاظ على قوام النسيج.
-
ابدأي صح
لما تيجي تبدأي تكوي، الصح إنك تختاري الملابس اللي درجة حرارة كويها منخفضة، وبعد كده، تعملي اللي بتحتاج درجة حرارة أعلى مش العكس، ده هيوفر عليكي مجهود وطاقة كبيرة.
-
البليسيه
لو عندك جيبة أو فستان بليسيه، اللي هو مليان كسرات بالطول، علشان تكويه صح، أفضل طريقة ليكي إنك تضبطي الخطوط جنب بعض وتمسكي طرفها بمشبك غسيل أو مشبك ورق، وبعد كده، تمشي عليها بالمكواة بالطول، الحلو في كده إنك هتقدري تتحكمي فيها وتحصلي على النتيجة اللي انتي عايزاها.
-
استخدمي بخاخة مياه:
في كوي الملابس اللي معمولة من خامات طبيعية زي القطن والكتان، حتى لو المكواة بتاعتك كويسة جدًا، فاستخدام بخاخة مياه إنك ترشي منها خفيف على الخامات دي بيسهل جدًا في إنها تتفرد صح.
-
افصلي المكواة:
من الأخطاء الشائعة اللي بتدمر المكواة وتخلّي عمرها قصير جزئية عدم فصلها عن الكهرباء بعد الاستخدام، وده شيء غير مفهوم الحقيقة، بس بجد لازم ومهم جدًا تفصليها وتفضّي كمان خزان المياه اللي فيها قبل ما تتشال.
نتمنى النصائح دي تساعدك في إنك تعرفي تكوي زي المحترفين، ولا أقول لك، ابعتي الهدوم الدراي كلين.
التعليق باستخدام حساب فيس بوك