محتويات المقال
عرايس كتير دلوقتي بيتجهوا لفكرة عمل مكياج الفرح لنفسهم في البيت، وده ممكن له أسباب كتير، زي مثلًا: إنهم شاطرين في الميك اب، أو رغبة في إن المكياج يكون رقيق، أو طبعًا فرق التكلفة لو جابت ميك أب أرتست Makeup Artist. أو طبيعة الفرح لو معمول في البيت أو حتى في مكان مفتوح أو بالنهار. في المجمل هي رغم كل شيء تعتبر خطوة جريئة إنك تعملي مكياج فرحك بنفسك لكن مع شوية نصائح ممكن التجربة تكون ناجحة ولطيفة جدًا خصوصًا لو تجنبتي الأخطاء ومشيتي على خطوات بسيطة. فتعالي نعرف مفروض إيه هي النصائح اللي هنتجنب بيها الوقوع في الأخطاء واحنا بنعمل مكياج العروسة بنفسنا.
10 نصائح للعروسة لو هتعملي مكياج فرحك بنفسك
- بلاش فاونديشن كتير
- توحيد اللون
- لازم بروفة
- بلاش تجربة أولى دلوقتي
- الماسكرا والكحل
- المكياج العادي
- ممنوع الصبغة الصفرا
- هايلايتر خفيف
- الرموش
- الكونتور
هنا ممكن تشوفي أفضل 3 فيديوهات في أساسيات وضع المكياج للمبتدئات
-
ابعدي عن الفاونديشن الكتير
اوعي تتعاملي مع وشك على إنه جزء من تشطيب الشقة ومحتاج وش محارة ودهان تحت أي ظرف من الظروف، لإن اللي هيحصل هيكون عكسي وتعيس للغاية. علشان كده، اختاري أقرب درجة فاونديشن للون بشرتك، مش أفتح ولا أغمق، وحطي طبقة رقيقة جدًا منه، واختاري قوام الفاونديشن اللي بيتناسب مع نوع بشرتك.
لو اشتريتي كريم أساس وطلع غامق أو فاتح .. تعملي إيه؟
-
وحدي اللون
لو هتكوني مش محجبة في فرحك، يبقى لازم تعرفي إن مهم توحدي لون وجهك مع لون رقبتك. علشان ما يبانش اختلاف الألوان خصوصًا في الصور، واللي صدقيني محدش هيتضايق أكتر منك من الشكل ده.
-
لازم بروفة لعمل مكياج فرحك بنفسك
طالما هتعملي مكياج فرحك بنفسك، يبقى لازم تعملي بروفة مرة واتنين وحتى تلاتة. علشان تتمكني منه، وفي نفس الوقت، تجربي كذا لوك علشان تختاري الأحلى والأنسب ليكي. دايمًا صوّري نفسك علشان تعرفي أنهي بروفة أحلى.
-
ما تجربش حاجة لأول مرة في مكياج يوم فرحك
عارفة إيه أكبر عدو ليكي في اليوم ده؟ الحقيقة الإجابة مش اللي جت في دماغك، أكبر عدو ليكي هو أي منتج جديد هتجربيه لأول مرة. والسبب إن احتمالية إصابتك بالحساسية في اليوم ده عالية جدًا، وطبعًا حساسية في بشرتك يوم فرحك هو الألم بنفسه، فبلاش نجرّب.
-
ممنوع الماسكرا والكحل العاديين
اليوم ده بطبيعته يوم عاطفي جدًا، يعني كمية الدموع اللي ممكن تنزل في اليوم دي انتي مش هتتوقعيها. علشان كده، مهم جدًا وبجد وبحق وحقيقي الماسكرا والكحل لازم يكونوا مضادين للماء. علشان دمعة واحدة هتحطم مجهودك في لحظة.
هنا ممكن تشوفي أجمد 10 أنواع ماسكرا في السوق المصري بالأسعار
-
ممنوع المكياج العادي لو هتعملي مكياج فرحك بنفسك
لازم تعرفي إنك في اليوم ده مش نازلة الجامعة، ولا رايحة الشغل، ولا خارجة تتفسحي شوية مع أصحابك. يعني فكرة المكياج العادي اللي أقصى مدى ليه على بشرتك 4 ساعات فكرة لازم تتجنبيها. اليوم ده زي ما قلت لك يوم مجهد، مليان عواطف حرّة، فإنتي لازم تجيبي كل الماتريال مضادة للماء علشان هي بتتميز بقدرتها على الصمود في بعض الأنواع أكتر من 18 ساعة، وده شيء مهم جدًا.
5 خطوات بسيطة لعمل مكياج لوك طبيعي No Makeup Look
-
بلاش تعملي الصبغة الصفرا
هو لسبب مجهول واستعصى على العلم معرفة تفسيره جزئية العرايس اللي بتصيغ شعرها أصفر يوم الفرح! واللي دايمًا النتيجة بتكون مخيفة بحق وحقيقي لأنها يا بتقلب برتقالي أقرب للون سلك الكهربا النحاس، أو إن الشعر يتضرر بشكل ما يخلي شهر العسل تعاسة، وتأكدي إنك هتحبي تتجنبي المشهد ده، فبلاش صبغة شعر بلون جديد مختلف مريع.
جبنا لك هنا موضة ألوان صبغات شعر 2022
-
تجنبي هايلايتر الكهارب في مكياج فرحك
الهايلايتر دوره في الحياة إن لمسات قليلة منها بتضفي عليكي لمسة من التألق بتزود من جمالك، وبيتحط بكميات قليلة في أماكن معينة. علشان كده، جزئية إنك تحطي كتير علشان تنوري وتغطي على كهارب الفرح يعتبر قرار غير حكيم. لأنك حرفيًا هيكون شكلك شبه ورق الفويل وموضة بداية الألفينات دي محدش ناوي يرجع لها تاني.
-
نبعد عن رموش البومة
استمرارا في سياسة تجنب الجديد في اليوم ده، لو انتي مش من النوع المتعود على تركيب الرموش فبلاش منها. وخصوصًا إن ليها مقاسات وأشكال مختلفة هتكوني محتاجة تعرفيها وتتدربي عليها علشان توصلي لأنسب شكل ليكي. لو مش كده، بلاش تتوتري، استخدمي واحدة من طرق تطويل الرموش بالماسكرا وتحافظ على شكلك البسيط.
ممكن كمان تشوفي هنا طريقة تركيب الرموش بنفسك في دقايق
-
الكونتور للتحديد مش التخطيط
الكونتور معمول لإبراز خطوط وشك بشكل محدد وأجمل، مش علشان تخلقي لوشك هيكل جديد يغير من ملامحك الحقيقية. علشان كده، ما تزوديش في استخدامه، كفاية شوية خطوط بسيطة لإبراز جمال بشرتك.
بالنصائح دي نكون حطيناكي على الأول الطريق، اعرفي إنك جمال الفرح وإنك حلوة في كل وقت، والمكياج بيساعد بس على إظهار جمالك الحقيقي مش بيديكي جمال مش عندك.
التعليق باستخدام حساب فيس بوك