لما باتفرج على فيديوهات مكياج البنات في شرق آسيا وازاي في أول الفيديو بتكون العيون باينة صغيرة خالص، وفي آخر الفيديو بتكون العيون واسعة جدًا وجميلة، باؤمن إن المكياج ده سحر! سبب من أسباب عقدي وانا صغيرة كان إن عيني ضيقة، أو صغيرة. لو انتي كمان كده، تعالي نشوف مع بعض بالفيديو وبالخطوات مكياج العيون الصغيرة اللي هتخلينا نبين عينينا الجميلة في اليوم العادي أو في السهرات والزفاف.
بالفيديو مكياج العيون الصغيرة
مكياج العيون الصغيرة له أكتر من خطوة. هتشوفيهم في الفيديو ده. وبرضه هاكتب لك الخطوات في آخر المقالة عشان تكون مكتوبة عندك.
بالفيديو .. طريقة عمل مكياج عيون سموكي ناعم في دقايق
مكياج العيون الصغيرة المبطنة
زي ما قلت في المقدمة، البنات في شرق آسيا عادة بتكون عينيهم صغيرة ومبطنة لكن بحيل مكياج العيون، بتبان أكبر. عشان كده، جبت لك فيديو يشرح الطريقة اللي بيعملوها في مكياج العيون.
أجمل مكياج للبشرة البيضاء .. 20 لوك هتحبيهم
خطوات مكياج للعيون الضيقة
خطوة الكونسيلر
- الكونسيلر لازم ما يكونش أفتح من البشرة أكتر من درجة واحدة. الأفتح من كده، هيصغر العين.
- الكونسيلر مش بس تحت العين، الكونسيلر بنفرشه على الجفن المتحرك كله من فوق العين.
خطوة الآيشادو
- بنستخدم الآيشادو الغامق عند خط الجفن، على الخط نفسه من آخره مش من عند المدمع.
- ما ينفعش أبدًا نحط الآيشادو غامق على الجفن المتحرك فوق العين مباشرة، لأنه بيصغر العين جدًا. ده بيكون كإنه كونتور للعين.
- الدرجة الأفتح من الآيشادو هي اللي بتبقى على نص الجفن المتحرك على العين، وتحت الحاجب، وعند المدمع. ده بيكون كإنه الهايلايت للعين.
خطوة الآيلاينر
اسحبيه وما تكببيهوش. بس كده، عايزين سحبة ناعمة وخط واحد تقيل مش أكتر. اعرفي هنا طرق رسم الآيلاينر كالمحترفات في ثواني.
جوه العين
جوه العين ما بنحطش كحل غامق، ولا ملون! جوه العين هنستخدم قلم أبيض أو كريمي عشان ده اللي هيخلي العين شكلها واسع.
الرموش
سواء هتركبي رموش أو هتحطي ماسكرا، اتأكدي إن يكون الرموش اتجاهها لبرا قوي ومش لازم تكون متنية جدًا عشان تكون مفتوحة وواسعة.
النصايح دي جربتها بنفسي ونجحت جدًا .. انت كمان جربي النصايح دي وقولي لي إيه النتيجة.
التعليق باستخدام حساب فيس بوك