كتير من الستات بمجرد ما بتعرف إنها حامل، بتخاف من ممارسة العلاقة الحميمة مع جوزها خوفًا على سلامة الجنين. وكمان فيه من الأزواج اللي بيخاف من نفس الموضوع. وعشان كده، كتبنا لك في المقال ده أجوبة عن الأسئلة اللي ممكن تخطر في بالك عن العلاقة الحميمة أثناء الحمل. وهنقول لك امتى تتجنبي الجماع في الحمل وامتى تقدري تعملي ده وانتِ متطمنة.
في العموم، هل ممارسة الجماع أو العلاقة الحميمة أثناء الحمل مضرة؟
صفحة هيئة الصحة البريطانية في مقال “الجنس في الحمل” قالت إن العلاقة الحميمة آمنة تمامًا أثناء الحمل لو الدكتور ما قالكيش عكس ده، لأن الجماع ما بيؤذيش الجنين في أي مرحلة من الحمل لأن القضيب ما بيوصلش للجنين.
جوزي ما بقاش بيحبني؟
كتير من الوقت وبسبب تغير شكل جسمنا، بنفتكر إن لو الزوج ما بادرش بطلب الجماع إننا بقينا مش حلوين ومش مثيرين له زي الأول. لكن الحقيقة إنه ممكن يكون خايف إن الجنين ممكن يحس بالجماع أو إنه ممكن يؤثر على صحة الجنين. الحقيقة إن زي ما قلنا فوق القضيب مش بيوصل للرحم، فمش بيوصل للجنين وبالتالي الجنين مش بيحس بحاجة ولا الموضوع بيكون مؤذي له طالما الدكتور ما قال لكيش دا. ممكن تتكلمي معاه بهدوء وتاخديه للدكتور علشان يتطمن بنفسه. وكمان ممكن تدوروا على طرق للتعبير عن الحب والانبساط من غير إدخال العضو لو الدكتور مانع ده.
هل الأورجازم (رعشة الجماع) عند الست ممكن يسبب الإجهاض؟
إذا كان الحمل آمن وطبيعي وماعندكيش مضاعفات، فالعلاقة الحميمة والأورجازم (النشوة/ الرعشة الجنسية) مش هتسبب الإجهاض خالص. لكن لو انتِ في التلت الأخير من الحمل، ممكن الأورجازم أو العلاقة الحميمة تسبب تقلصات خفيفة لكن لازم تعرفي إنها طبيعية وما تقلقش خالص. بس استرخي ونامي لحد ما تخلص التقلصات والرحم يرجع مستقر.
كام مرة ممكن الحامل تمارس العلاقة الحميمة من غير خطر؟
موقع WebMD بيقول إن مفيش عدد مثالي أو عدد آمن لمرات الجماع. كل جسم واحتماله غير وكل وقت كمان غير.
امتى نتجنب العلاقة الحميمة في الحمل؟
- لو خلال الحمل دا جالك أي نزيف.
- لو المشيمة منخفضة أو فيها تجمعات دموية.
- لو أجهضتي قبل كده.
- لو كيس المية انفجر.
- لو عندك ضعف في عنق الرحم أو ولدتي ولادة مبكرة قبل كده.
- لو حامل في توأم وعندك مشكلة من ده.
- لو جوزك عنده أي التهاب جنسي.
- لو عندك اضطراب في الهرمونات أو اكتئاب ومش عايزة، لازم تعرفي جوزك وما تضغطيش على نفسك في ممارسة العلاقة الحميمة لو مش عايزة.
هيكون دايمًا في طريقة إنك تستمعي بحب جوزك في فترة الحمل لو انتِ عايزة. بننصحك تكوني دايمًا صريحة مع جوزك. وبننصحك كمان تتابعي دايمًا مع دكتورك لو عندك أي تساؤلات أو فيه أي أعراض قلقتك.
مصادر ساعدتنا على كتابة المقال:
الجماع للحامل: إجابات لكل التساؤلات!
