محتويات المقال
ما هو التامبون أو السدادة القطنية؟
Tampon أو التامبون بالنسبة لينا هنا في مصر مش منتشرة بشكل كبير وبتتواجد في أماكن محدودة. التامبون بكل بساطة نوع مختلف من منتجات الدورة الشهرية. لكن بشكل مختلف .وطريقة إرتداء مختلفة تمامًا عن الفوط الصحية وهو مش مناسب لأي فتاة عذراء.
-
التامبون بديل للفوط الصحية
التامبون شكل سدادة مناسبة الحجم بيتم إدخالها في المهبل في فترة الدورة الشهرية. والمتخصصين بينصحوا إنها تستخدم فقط في فترة الدورة الشهرية مش في أيام الشهر العادية (كحماية من الإفرازات المهبلية). بتكون مصنوعة من ألياف قطنية أو حرير صناعي معالج بشكل لا يسبب أي نوع من الحساسية ولا التحفيز لنمو أي بكتيريا. وبتيجي أوقات محاطة بقطيب بلاستيكي يساعدك على إدخالها بشكل سهل، أو من غير. بيكون في آخرها خيط يساعدك على سحبها بسهولة. ما تصدقيش أي إشاعة بتقول إنها بتسرح في الرحم وممكن تدخل تتفسح في بطنك! ده كلام غير صحيح بالمرة وعمره ما هيحصل. عضلات الرحم قادرة على التمسك بالتامبون في مكانه الصحيح. مفيش أي داعي للقلق. والحلو فيها إنك مش هتحسي بيها خالص، ده غير إنها مناسبة للاستخدام في حالة إنك عايزة تنزلي البسين، لأن مفيش منها أي تسريب. لو بتمارسي أي نوع رياضة هيكون التامبون أفضل مساعد وساند ليكي ومش هتحتاجي تغيري خططتك بناء على ميعاد الدورة الشهرية.
-
إزاي تستخدمي التامبون؟
- التامبون زي كل وسائل الحماية الصحية بييجي في أحجام مختلفة بتعتمد على القدرة الاستعابية على الامتصاص
- فيه الامتصاص الخفيف، ودي مدة استخدامها بيمتد لأربع ساعات، وفيه العادي اللي بيمتد لست ساعات، وفيه السوبر واللي مدتها بتوصل لثمان ساعات. بس الأفضل إنك تستخدمي ذات الامتصاص الخفيف وتغيريها باستمرار، ده أقرب للصحة
- بعض الأنواع بتيجي ومعاها عصا صغيرة من الكارتون أو البلاستيك بتساعدك على إدخالها بشكل مناسب في المهبل. وأنواع تانية بتيجي من غير، وديه ممكن تستخدمي إيدك في إدخالها، بس لازم لازم تكوني غاسلة إيدك كويس جدًا
- غيريها دايمًا في وقت يتراوح ما بين 4 لـ 8 ساعات، مش أكتر. ولو قررتي تنامي بيها، استخدمي واحدة جديدة قبل النوم مباشرة وغيريها بمجرد استيقاظك
- لا تستخدم غير في فترة الدورة الشهرية فقط
-
ما هي عيوب التامبون؟
- قد يسبب بعض الألم في إدخالها لو ما اتبعتيش الطريقة المكتوبة على العبوة بالضبط
- وضعك واحدة لأكتر من 8 ساعات ممكن يعرضك لحالة صحية خطيرة جدًا اسمها TSS .. اللي هو متلازمة الصدمة السامة وهي حالة نادرة، لكن من المهم إنك تتبعي الإجراءات الصحية علشان تبتعدي عن أي ضرر على صحتك
- أعراض المتلازمة دي شعور بالغثيان والقيء، ارتفاع درجة الحرارة، إسهال، آلام في العضلات، دوخة، التهاب في الحلق، طفح جلدي عند التعرض للشمس. لو حصل عندك أي من الأعراض دي، إنزعي السدادة/التامبون واطلبي المساعدة الطبية مباشرة بدون أي تردد
- بتستخدم للسيدات فقط
- تتواجد في الصيدليات والهايبر ماركت فقط في مصر (هنا دليل أهم صيدليات القاهرة بالتليفونات).
-
ما هي مميزات التامبون؟
- مش بتحسي بيها أبدًا
- بتمنع التسرب طالمًا انتي ملتزمة بعدد ساعات استخدامها
- ممكن تستخدميها وانتي في البيسين
- تقدري تروحي الجيم وتلعبي بكل حرية من غير أي قلق
- مناسبة مع فساتين السواريه
-
أسعار التامبون وأماكن تواجده
زي ما قلت لك، هي بتتواجد في الصيدليات الكبيرة والهايبر ماركت وبتتراوح أسعارها ما بين 80 جنيه مصري لـ 120 جنيه مصري حسب الماركة وقوة الامتصاص.
1 comment
ياريت اضافه إنها متنفعش لغير المتزوجات عشان محدش يستخدمها بدون علم