كتير بنكون بنحب بيتنا والأثاث بتاعه، بس مرات بنمل منه وبنحتاج نعمل فيه تغييرات في الديكور، ومش دايمًا بيكون في إمكاننا نغير في البيت حاجات كبيرة سواء ماديًا، أو علشان المساحة أواعتبارات تانية كتير، بس الحقيقة إننا مش محتاجين نعمل التغيرات الكبيرة دي، هنقولك على 5 منتجات بسيطة هتغير شكل بيتك تمامًا:
-
النباتات
من أكتر الحاجات اللي بتدي روح مختلفة في البيت، هي النباتات الطبيعية، صحيح النباتات الصناعية بتكون في منها أشكال شيك، بس بنحبها لفترة وبعد كده بتتحول لجمادات في البيت، على عكس النباتات الطبيعية اللي بنكون متفاعلين معاها طول الوقت، وبنتابع نموها وموتها وحياتها وسقايتها، ولو انتي ملكيش خبرة قوي، تقدري تروحي لمشاتل وتسأليهم إيه اللي مناسب للظل وإيه للشمس، وتسقيهم كام مرة وتنضفيهم ازاي، وممكن تشتري عدد بسيط لحد ما تتمكني من رعايتهم وبعدين تزودي.
-
الإضاءة
الإضاءة من الحاجات اللي بتأثر على ديكور البيت ومظهره جدًا، ولو انتي عندك إضاءة جاهزة بالفعل، تقدري تضيفي لمسات بسيطة، زي أباجورة صغيرة جانبية، أو الإضاءة الليد اللي بتتلزق في المطابخ، هتتفاجئي بحجم الاختلاف والتغيير اللي حصل.
-
المرايات
المرايات الرقيقة المناسبة لبقية ديكور البيت بتعمل فرق كبير في بيتك، حاولي تختاريها مناسبة للمساحة وللمكان اللي هتحطيها أو تعلقيها فيه، وما تكتريش منها زيادة عن اللزوم لإنها لو كترت بتتحول لإزعاج بدل ما تعمل اتساع وامتداد للبيت.
-
التابلوهات
أغلبنا عنده تابلوهات كلاسيكية في البيت، منوعة ما بين الأوبيسون والرسم بالزيت والشغل بخيوط السيرما، علشان كده بنحتفظ بيهم وقت طويل جدًا وغالبًا مش بنغيرهم، بس الحقيقة إن تغيير التابلوهات في البيت بيعمل روح جديدة للمكان، والتابلوهات اللي أسعارها معقولة بقت متاحة في محلات كتير، ومش شرط تشتري تابلوه على بعضه جاهز، ممكن تشتري الفريم من أيكيا مثلا، وتحطي انتي فيه الصور اللي انتي عاوزها، وتنسقيها في التعليق على ذوقك، أكيد هيفرق في بيتك بشكل ملحوظ جدًا.
-
المخدات (الكوشنز)
لو انتي عندك بالفعل في بيتك كوشنز على الكنب والكراسي أو على الأرض، تقدري بسهولة تجيبي لها قماش جديد تكوني حاسه إنه هيغير شكل المكان عندك، فلو عندك ألوان هادية ودافية، ممكن تجيبي ألوان مطرقعة شوية، والعكس بالعكس، ولو ما عندكيش كوشنز، ممكن تشتري بس عدد بسيط لحد ما تشوفي هتنسقيه ازاي في البيت بدون ما يعمل زحمة أو كركبة.
ولو ليكي تجارب في تغيير ديكور بيتك بمنتجات بسيطة، قوليلنا عليها.
ودي مجموعة مقالات هتفيدك لو انتي مهتمة بديكور البيت:
اللي جربوا قالوا: أجمد أماكن بيع أثاث البيت بأسعار مخفضة
أفكار ديكور لاستغلال مساحات الشقق الضيقة
اعملي بنفسك .. Pom Pom لتزيين غرفة أطفالك
التعليق باستخدام حساب فيس بوك