إيه موضوع فكرة النينجا؟ كام واحدة فينا فكرت بينها وبين نفسها إزاي تجيب منتجات شعر وبشرة أقل من 50 جنية، لاء وكمان تكون فعالة وبتجيب نتيجة، هو إحنا هنعيش كام مرة يعني، وتبتدي تتعاملي على إنك نينجا أحمد مكي في فيلم لا تراجع ولا استسلام القبضة الدامية.
بعد كدة بنهز راسنا ونطردت الأفكار الوردية دي من دماغنا خالص، بس إيه رأيك إن الحلم ده واقع وحقيقية وإنك هتبقى نينجا في نفسك أوي مع منتجات عناية بالشعر والبشرة حقيقي ممتازة وبسعر لا يزيد عن ورقة عملة فئة الخمسين جنيه.
في رحلة بحثنا الننجية سألنا أمهات راحة بالي عن المنتجات اللي هما بيستخدموها في حياتهم اليومية ورخيصة الثمن وفايدتها كانت إيه، ودي كانت إجابتهم:
رشا قالت لنا
- غسول ايفا بالجلسرين: إن غسول ايفا بالجلسرين للبشره الجافه من احسن الحاجات اللي هي إستخدمتها في ترطيب وتنضيف بشرتها الجافة اللي بتعاني في طرتبها وخصوصا في فترات البرد الشديد أو الحر الشديد.
- سعر العبوة على موقع إيفا للعبوة الـ150 مل 24 جنيه، هتلاقيه هنا https://bit.ly/3eXUcn3
شروق قالت أفضل منتجات أقل من 50 جنية
- ايمولينت معالج للشفاه من لونا 10 مللم، مرطي ممتاز للشفاة اللي لا غنى عنه خصوصا مع دخول الصيف، بيتباع في عبوة صغيرة سهل تحطيها في شنطتك وتقدري تستخدميها دايما، سعره على com 43 جنيه.
- حمام كريم لوفيا الكيس الواحد منه بيتباع بـ50 جنيه، بتقولنا إنه بيوفر ترطيب ممتاز للشعر وبيمنع الهيشان وبيقلل من تساقط الشعر.
- كريم نيفيا سوفت، الحلو في الكريم ده إنه بيجي في أحجام مختلفة لكل أنواع البشرة، ده غير قدرته الممتاز على الترطيب من غير ما يسيب أثر دهني، يعني البشرة بتمتصه بكل سهولة، بيتراوح سعره ما بين 20 لحد 45 حسب حجمه.
- كريم سكرب أصالة، بتقول لنا إنه مقشر لطيف جدا على البشرة وبيسيبها نظيف وبتتنفس من غير ما يسبب لها أي جفاف بيتراوح سعره ما بين 36 لحد 40 جنيه.
مونيكا رشحت لنا
- صابونة الجلسرين، واحدة من كلاسكيات العناية من البشرة إللي كانت تقريبا موجودة عند كل أمهتنا وكانت فعلا بتوفر ليهم ترطيب حقيقي للبشرة ولما كبرنا واستخدمنها عرفنا ليه هما كانوا مش بيغيروها أبد.
- ودي سعرها بيترواح ما بين 11 جنيه لحد 43 حسب الحجم والماركة.
دينا كان ترشيحها مختلف شوية
- هي مقتنعة إن شريحة أفوكادو نجرب طعمها لو عجبنا يبقى الحمد الله، معجبناش فنعمل بالشريحة دي ماسك للبشرة أو الشعر مع معلقة عسل وزيت زيتون هتكون نتيجته إيجابية جدا.
أسماء جابت لنا منتجات شعر وبشرة حلوة أقل من 50
- زيت الجرجير من إمتنان سعره 24 جنيه، من الزيوت اللي بتستخدم كماسك وبتتميز بقدرتها على إنبات الشعر وزيادة كثافته.
- بلسم ترسيمي TRESemmé: بلسم لترطيب الشعر الكيرلي بزبدة الشيا ترسيمي، بلسم ممتاز جدا وهتحسي بالفرق من أول استخدام، سعره 35 جنيه.
- حمام زيت من بوناويل العبوة الـ75 جرام شعرها 45 جنيه، حمام الكريم ده يكاد يكون عدى على كل بيوت مصر، ورغم إن موجود في الأسواق المصرية من زمان بس فضل محافظ على مستواه لحد النهاردة، مرطب ممتاز للشعر وبيفرق فعلا مع الإنتظام في الاستخدام.
شيماء رشحت لنا مجموعة تانية من النينجا:
- Cotton pads من Qualita بالصبار، ممتازة جدا لإزالة المكياج واستخدامها مع ماء الميسلر أو التونر وكونها غنية بالصبار بيخلي فاعليتها أعلى وترطيبها حقيقي، سعرها 40 جنيه.
- كريم لونا ايمولينت لليدين والجسم والبشرة بذبدة الكاكاو، من الكريمات الحلوة جدا وبترطب وسعره 25 جنيه.
- زيت جونسون اللي العبوة المتوسطة منه بيتراوح سعرها ما بين 32 لـ 35 اللي له إستخدمات كتيرة جدا، مش بس ترطيب، إنما كمان مزيل ممتاز للمكياج، أساس لأنواع مختلفة من ماسكت البشرة وغيرها كتير.
ترشيحاتي أنا:
- بديل الزيت إي- كيراتين: أول حاجة بديل الزيت إي- كيراتين لحيوية الشعر عبوة 190 ملي بـ 40 جنيه، كنت حقيقي بعاني إني مش لاقية حاجة ترطب شعري شواء مبلول أو ناشف لحد ما جربت المنتج ده وحقيقي فرق جدا برشحه بشدة.
- زيت السمسم من امتنان- 125 ملي العبوة بـ45 جنيه، من أعظم مرطبات البشرة والشعر حقيقي، بعد سن التلاتين بتحتاجي تهتمي فعلا ببشرتك، عليكي وعلى زيت السمسم نقطة واحدة منه كافيه تديكي كل الترطيب اللي عايزاه.
- Garnier Micellar Water العبوة الصغيرة بيبدأ سعرها بـ 45 جنيه، ممتازة جدا في تنضيف البشرة بشكل عميق وإزالة أي أتربة أو رواسب أو مكياج بكل سهولة وبيسيب بشرتك منتعشة ونضيفة.
دي كانت ترشيحتنا ليكي، دلوقتي تقدري تصحي النينجا اللي جواكي وقولي لنا في التعليقات إنتي بتستخدمي منتجات إيه نينجا بأقل من 50 جنيه.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
1 comment
فعلا ايفا غسول للبشره الحافة ممتاز