محتويات المقال
الفترة اللي فاتت دي كانت فترة صعبة قوي علينا كلنا كأمهات، شغل البيت، الطبيخ، رعاية الأولاد بكل ما فيها من تفاصيل، بصراحة الأمهات دايمًا أبطال، ودايمًا شايلين البيوت على كتافهم بمعنى الكلمة. من أكتر المهام التقيلة على قلبنا كلنا هي مهمة تنضيف البيت الأسبوعية اللي بيكون من ضمنها تلميع وتطهير وكنس ومسح، واللي في العادة أغلبنا كان بيكون فيه حد بيساعد في المهمة دي بس – نظرًا لطروف الكورونا وخوفنا من دخول شخص غريب في بيوتنا – أغلبنا استغنى عن المساعدات الخارجية خوفًا على سلامتنا وسلامة ولادنا. وبالتالي للأسف الشديد، بقت كل أم مضطرة تنضف بيتها بدون أي مساعدة. أنا في المقال ده، جمعت لكم شوية منتجات ساعدتني كتير في المهمة التقيلة دي، زيي زي أغلب الأمهات، كنت مضطرة أنضف بيتي بنفسي. بس كنت دايمًا باحاول أكون ذكية في اختياري للمنتجات اللي باستخدمها عشان تساعدني وتسهل عليّ المهمة.
فوط المايكروفايبر
تنضيف البيت – المصدر onegoodthingbyjillee
مميزاتها:
فوط المسح والتلميع من أهم أدوات التنضيف، وممكن تساعدك أو تبوظ لك التنضيفة تمامًا. فوط المايكروفايبر – يمكن ناس كتير ما تعرفهاش – مختلفة عن الفوط القطنية العادية وده لإن المادة المصنوعة منها بتكون قوة امتصاصها عالية جدًا مش بس للسوايل، لكن كمان الأتربة والدهون وأي حاجة تتخيليها. عشان كده هي مثالية لتلميع التراب، لإنها بتلقطه وكمان تقدري تلمعي بيها الأسطح الإزاز والمرايات وبدون ما تستخدمي أي منظف للإزاز هتلمع معاكي بكفاءة رهيبة.
إزاي تحافظي عليها:
أهم حاجة في فوط المايكروفايبر هي طريقة العناية بيها وغسيلها: الأفضل إنك ما تستخدميش معاها كميات كبيرة من المنظفات عشان تحافظي على عمر أطول ليها، كمان يفضل إنها تتغسل غسيل يدوي على درجة حرارة ما تزيدش عن 30 درجة بدون استخدام كلور أو أي نوع من منعمات الأقمشة لإن كل المنتجات دي هتأثر على كفاءة الفوط وقدرتها على الامتصاص.
سعرها وأماكن توافرها:
تنضيف البيت – المصدر egypt.souq
فوط المايكروفايبر غالية نسبيًا، بيتراوح سعرها حسب الماركة والحجم من 40-60 جنيه، فيه نوعين موجودين في الأسواق:
vileda
lock & lock
- هتلاقوها متوفرة في السوبرماركت الكبيرة.
- موجودة عند Home Works وتقدري تستغلي الخصم بكارت راحة بالي عندهم.
- egypt.souq
- jumia
منظف المطبخ متعدد الاستعمالات من مستر ماسل (Mr Muscle)
تنضيف البيت – المصدر egypt.souq
تنضيف المطبخ طبعًا مهمة بنعملها كل يوم والمطبخ فعلًا هو قلب البيت. لما بيكون نضيف ورايق، بنحس إن البيت كله رايق معاه، أنا باستخدم المنتج ده من سنين، وبصراحة هو أكتر من رائع في التنضيف اليومي للمطبخ وإزالة أي دهون صعبة من على الأسطح وتنضيف البوتجاز وأسطح السيراميك من الدهون المتراكمة عليها. أي منتج لإزالة الدهون من تعليمات استخدامه تجنب ملامسته للبشرة، لكن فيه بعض منتجات بتكون مضرة جدًا، ولو بس لمست بشرتك أو إيدك بتإذيها بشكل سريع، المنتج ده مش كده! يعني لو لمس إيديكي بالغلط، تأثيره مش قوي، وبمجرد ما تغسلي إيدك، هتبقى تمام. المنتج ده عمره ما بيأثر أبدًا ولا بيضر بالأسطح، لكن طبعًا له تعليمات مهمة زيه زي أي منتج لإزالة الدهون منها إنه لا يستخدم على الخشب والألومينيوم أو الأسطح المدهونة طبعًا.
- سعره في حدود 50 جنيه.
- بيستخدم مركز للدهون الشديدة والبقع الصعبة أو مخفف بمياه.
- متوفر في أغلب السوبرماركت الكبيرة وتقدري تطلبيه أونلاين من سوق egypt.souq
shuttersheet
تنضيف البيت
منتج كده اختراع! بيحل أزمة كل الستات مع الغسيل، تقدري دلوقتي تغسلي الأبيض مع الألوان عادي من غير ما تخافي إن قمصان جوزك البيضا تقلب بينك! هي عباره عن مناديل هتحطيها في الغساله مع الهدوم، وهي بتتغسل هتمنع إنها تبهت على بعضها، أهم حاجة إنك تتبعي التعليمات والمحاذير الموجودة على العبوة كويس عشان تحققي النتيجة المظبوطة.
سعرها معقول جدًا في حدود 20 جنيه.
- متوفر من خلال صفحتهم على الفيسبوك shuttersheet
- متوفرة أونلاين على egypt.souq
- متوفر في أغلب السوبرماركت الكبيرة زي رويال هاوس ماركت بمصر الجديدة وفلامنجو هايبر ماركت بالتجمع الخامس.
Dettol antibacterial surface cleaner
تنضيف البيت – ديتول
تنضيف وتطهير الأسطح عملية مهمة جدًا وخصوصًا في المطبخ اللي بيتحضر فيه كل أكلنا وشربنا. عشان كده، مهم إن يكون عندي منتج أثق فيه وسهل الاستخدام لتطهير أسطح المطبخ، ألواح التقطيع، التلاجة، حوض المطبخ بعد غسيل المواعين، تعقيم لعب الأولاد وأي سطح بيتحضر عليه أكل أو شرب. ديتول مطهر الأسطح بيكون فيه بخاخة سهلة جدًا للاستخدام اليومي، بيترش على الأسطح وما يتغسلش، بيتساب ينشف لوحده، بيعقم ويطهر الأسطح وبيقضي على أنواع كتير جدًا من البكتيريا.
- سعره في حدود 60-70 جنيه
- موجود في أغلب محلات السوبرماركت الكبيرة
- تقدري تشتريه أونلاين من jumia
Vileda Promist Max Mop مساحة فيليدا
تنظيف المنزل
ودي بقى حقيقي مالهاش حل. ساعدتني كتير قوي خصوصًا مع وجود طفل في البيت، الأطفال طول النهار يوقعوا حاجات على الأرض، وبنحتاج وسيلة سريعة ننضف بيها بقع الأرضيات اللي بتعاني منها كل أم. الموب دي من فيليدا فكرتها حلوة قوي وهو إن فيها تانك صغير بتمليه مياه وتحطي عليها معلقة أو معلقتين شاي من أي منظف أرضيات، أو مطهر وباستخدام إيد الموب هترشي شوية مكان ما هتمسحي. عشان كده، هي عملية جدًا ومنجزة لكل أم، وكمان الغيار بتاعها بيتفك بسهولة وبيتغسل في الغسالة وبتناسب جميع أنواع الأرضيات.
سعرها يعتبر غالي نسبيًا لكنها عملية جدًا وبتستحمل وتعيش وخصوصًا ماركه فيليدا لإن فيه زيها من ماركات تانية بس ضعيفة وبتستهلك بسرعة.
متوفرة عند محلات homeworks تقدري تستغلي الخصم بكارت راحة بالي
متوفرة أونلاين على souq
ليفة المواعين من فيليدا Non-scratch 
تنظيف البيت
المواعين طبعًا هي الصديقة الوفية اللي لازقة فينا وما بتسيبناش أبدًا مهما بعدنا عنها أو هربنا منها، بنرجع نلاقيها زي ما هي مستنيانا عشان نغسلها! الليفة دي مختلفة لإنها ضد الخدش بمعنى إنك هتقدري تنضفي البقع الصعبة من أي طاسة أو حلة تيفال من غير ما تتخربش أو تبوظ. ليفة فيليدا سعرها أغلى من باقي المنتجات المشابهة بس لإنها فعلًا عملية وبتعيش وعمرها ما هتبوظ الحلل والطاسات. هتلاقيها متوفرة في أغلب محلات السوبر ماركت الكبيرة زي سعودي مثلًا.
التعليق باستخدام حساب فيس بوك