محتويات المقال
فيه ستات بتحب تهتم بديكورات البيت والأنتيكات وغيرهم بيحبوا يهتموا بالزرع والورود في البيت، وفيه ستات تانية بتعشق البلاستيكات ومدمنة شراهم.. دول مش ستات دول أنا وكان يوم أسود لما عرفت منتجات تابروير عشان جيس واط؟ مرتبي ومصروف البيت كله رايح عليهم D: وفي الموضوع ده هاعرّفك ليه منتجات تابروير مهمة قوي كده بالنسبة لي وفرقت معايا كتير، وإيه هي أكتر منتجات عملية ومنجزة وهتسهّل على الأمهات كتير وخصوصًا لو إنتي أم عاملة وبتشتغلي ومحتاجة توفري في الوقت والمجهود.
إيه هي منتجات تابروير؟
تابروير منتج عالمي ليه ضمان مدى الحياة ومصنوعة من مواد أولية غير معاد تصنيعها من بلاستيك صحي غير سام ومش بتتفاعل مع الأكل الساخن أو البارد وبتحافظ على الأكل والسوايل أطول مدة ممكنة من غير ما يعمل ريحة أو يغير هيئته.. والمنتجات اللي هاحكي لكم عنها دلوقتي دي أنا مجرباها شخصيًا وحقيقي كانت المنجد بالنسبة لي من ساعة لما خلفت.
إزازة المياه الصغيرة للأطفال
تابروير عاملة أزايز صغيرة للولاد وفيه منها أشكال حيوانات وأشكال كارتون زي العربية برق وفروزين وحجمها تقريبًا ٥٠٠ مل، اللطيف فيها إنها مش بتوقع وهي مقفولة لو هي مايلة في الشنطة وطبعًا لو الولاد بيحبوا عصير فريش هتحافظ عليه من إنه يبوظ.
علبة الخضروات
بما إني أم لتلات أطفال ما عنديش وقت إني أنزل كل فترة أشتري خضار وفاكهة ولقيت إني لما باشتري كمية منهم بتبوظ بسرعة في التلاجة، فاشتريت العلبة دي كذا حجم للخضار والفاكهة وفعلًا بقت تحتفظ بيهم وقت طويل من غير ما تفسد خالص.. اللطيف كمان إنك عيدان البقدونس والجرجير والنعناع اللي كانت بتدبل بعد كام يوم ممكن تقعد بالأسبوع.
بولة تابروير
منتجات تابروير فيها بولات أشكال وأحجام متنوعة، والحقيقة إن البولات دي كانت منقذة ليا في توفير وقت تحضير الغدا واللانش بوكس لإني بقيت أقطع كمية خضار وفاكهة كبيرة جدًا جاهزة وتقعد كذا يوم أخد منها شوية للسلطة واللانش بوكس بدل ما اضيّع وقت كل يوم في التحضير. وطبعًا البولات دي ليها استخدامات تانية هايلة زي حفظ بواقي السلطة والأكل، حفظ الجبنة القريش عشان ما تبوظش بسرعة، حفظ المخللات وغيرهم كتير.. فيه أنواع كمان بتدخل الميكرويف وأنواع تانية بتتحط في الفريزر وكمان محكمة الغلق فمش هتنزل سوايل خالص ولا هيقع منها الأكل.
علبة سوايل تابروير
باحاول اعوّد ولادي إنهم يشربوا عصير فريش بدل المعلب، وتحضير كمية كبيرة من العصير الفريش ممكن تبوظ في التلاجة وكمان بما إني أم عاملة وما عنديش رفاهية إني أقف أحضّر عصير فريش كل يوم بقيت باستخدم الشفشق ده عشان احضر كميات وكمان باستخدمه في حفظ حمص الشام والترمس لمدة طويلة وممكن كمان يستخدم في حفظ الشوربة فترة في التلاجة.
طرق حفظ الخبز طازج لفترة طويلة من هنا
الحلة الألترا برو Ultra Pro
ودي بقى سوبر هيرو بتاع الأمهات اللي بيشتغلوا وعاوزين سرعة في تسوية الأكل، الحلة صحية لأنك مش بتستخدمي فيها أي زيوت أو دهون. فلو بتحبي الأكل الصحي أو عايزة تعملي دايت، هتفيدك جدًا. ممكن تعملي فيها وصفات كتير سريعة زي المكرونة بالبشاميل من غير ما تسلقي المكرونة حتى، بتسوي اللحوم والفراخ بسرعة وممكن تحطي تحتهم خضروات من غير ما تضطري حتى تستخدمي مرقة، فيه منها أحجام مختلفة وآخر حاجة وده الأهم إن تنضيفها سهل مش صعب. بس فيه ملحوظة صغيرة إنك لازم تقري الكتالوج اللي معاها كويس عشان تعرفي تستخدميها صح عشان ما تبوظش وهتلاقي معاه كتيب للوصفات.
علبة وايبس تابروير
ودي بقا ممكن ناس كتير تشوفها إنها ما لهاش لازمة بس بالنسبة لي بتفرق كتير في أول 3 سنين أمومة، العلبة دي صغيرة آه بس نينجا D: بتاخد تقريبًا حجم علبة وايبس كبيرة ومحكمة جدًا ومش بتخلي الوايبس ينشف خالص وممكن يقعد شهر من غير ما ينشف.. بعد ما تخلص فترة الدايبر والوايبس ممكن تستخدميها في حفظ البسكوت أو الكيك أو البقسماط وكده.
ودول كانوا أهم منتجات بالنسبة ليا فرقوا معايا كأم. قولي لي عندك تابروير ولا لأ وإيه أكتر حاجة بتحبيها؟
التعليق باستخدام حساب فيس بوك