الرضاعة الطبيعية واحدة من التجارب الممتعة جدا اللي تستحق التجربة في الحياة، شعور وجود كائن بلا حول ولا قوة حياته بالكامل معتمدة على السائل السحري العظيم اللي ربنا جعلك سبب في إنك توصليه ليه، شعور ساحر، لكن عشان رحلة الرضاعة ما تكونش مرهقة وسبب في فقدانك لصحتك وحيويتك هتحتاجي منتجات مهمة للرضاعة الطبيعية اللي حقيقي هتفرق معاكي 180 درجة، افتقدتهم على المستوى الشخصي، وبنصحك ماتتنازليش عنهم لو في مقدرتك تحصلي عليهم لو حابة تخوضي رحلة رضاعة سهلة ومريحة.
منتجات مهمة لازم تجيبيهم أثناء الرضاعة الطبيعية
-
شفاط الثدي
بحكم شغلي كنت بضطر أخزن لبن، بداية من رابع شهر بعد الولادة، ولأني مكنتش مدركة أهمية الشفط كنت بعصر اللبن يديويا بدون أي ماكينات أو وسائل، وطبعا مش حابة أقول المسألة مرهقة إزاي، لو رجع بيا الزمن أكيد كنت هشتري شفاط لبن، سواء كان يدوي أوكهربائي، فردي أو زوجي، شفط اللبن مش بس بيحافظ على إدرار قوي للبن وبيفضي الثدي استعداد لانتاج لبن أكثر لكنه كمان بيريح من الاحتقان وبيساعدك جدا على تنظيم كميات وأوقات الرضاعة.
-
بيبرونة
البيبرونة من الأكسسوارات الأساسية سواء الرضاعة كانت صناعية أو طبيعية، لو أخدتي قرار الشفاط هتحتاجي بالضرورة بيبرونة نوعها كويس هتنفعك في تقديم اللبن للبيبي و كمان تقديم الأعشاب والعصاير ليه بعد عمر الـ 6 شهور.
-
زجاجات سهلة الاستخدام
ده تاني منتج هيترتب على اختيار شفاط الثدي، لو انتي من الأمهات اللي بيلجأوا لشفط الثدي أثناء الرضاعة الطبيعية هتحتاجي زجاجات حليب سهلة الاستخدام للتخزين المؤقت في التلاجة والفريزر، هتكون منقذ حقيقي، يا دوبك هاتطلع وتدفى ويتحط الحلمة على البيبرونة وبس.
-
أكياس حفظ اللبن
أكياس حفظ اللبن تالت خيار عبقري هيترتب على اختيارك لشفاط الثدي، بنرشحلك أكياس حفظ اللبن من ميديلا مفيش غنى عنها، لأنها مصنوعة ومطورة مخصوص لتجميع وتجميد وتدفئة اللبن، من مواد مخصوصة لتخزين اللبن بجودة عالية وفي نفس الوقت خالية من الBPA.
هنا ممكن تشوفي قائمة تحضير شنطة الرضاعة الطبيعية
-
Nipple former للحلمات الغائرة
من أكبر المشاكل اللي بتواجه أمهات كتير وممكن تعوقهم عن الرضاعة الطبيعية من أساسها هي الحلمات الغائرة أو المسطحة، وهنا بيكون خيار الشفط مثالي ولو مش متاح تشتري شفاط فأضعف الإيمان حلمات النيبل فورمر هتساعدك بشكل كبير في إنك تحلي المشكلة وترضعي طفلك بصورة مريحة وطبيعية.
-
Bra Pads لجفاف الثدي
بعتبر غياب البرا بادز واحد من أهم أسباب اكتئاب ما بعد الولادة، لان الأم بمجرد ما تنزل من البيت بتضطر ترجع بسرعة لأنه هدومها بتتبهدل، مش بس من البيبي والقشط اللي بيعمله لكن كمان من المشكلة المحرجة اللي بتواجه الأمهات المرضعات خصوصا خلال الشهر الأول، شلالات اللبن اللي بتغرقها قبل ما امدادت اللبن تنتظم واللي بتبهدل الهدوم اللي بتلبسها الأم، وهنا بتكون حفاضات الثدي هي المنقذ الحقيقي ليكي كأم، وفي منها نوعين نوع تستخدميه وترميه ونوع قابل للغسيل وفي نفس الوقت مقاوم للبكتيريا.
-
Breast shellsلعلاج الالتهابات
التهاب الحلمات ألم مايعرفهوش غير اللي جربه، جرح مفتوح ومطلوب إنه يتعرض لاحتكاك طول الوقت، بيفتح مع كل مرة البيبي يرضع فيها، البريست شيلز عبارة عن حلمات مصممة مخصوص عشان تساعد الأمهات اللي عندهم التهابات على حماية وعلاج الحلمات المتلهبة، بتساعد البيبي يرضع وبتريح الأم وفي نفس الوقت بتمنع احتكاك الحلمات الملتهبة بالملابس، أو مرور الهواء عليها واللي بيزود الالتهاب كل مرة، وكمان مظهرها بيكون طبيعي تحت الهدوم.
-
معقم الببرونات
عملية شفط لبن أو حتى عصر يعني ببرونات عاوزة تتغسل طول الوقت وأم حاسة إنها مش متأكدة اليبرونة اتعقمت فعلا ولا لأ، معقم الببرونات منقذ لانه هيضمنلك إنها مش هاتنقل للبيبي أي بكتيريا أو ميكروبات.
-
مخدة الرقبة
كام أم داخت على دكاترة العظام والمخ والاعصاب بسبب ألم الرقبة، مخدة الرقبة واحدة من الأدوات المنقذة أثناء رحلة الرضاعة الطبيعية ومع وقت الرضاعة اللي ممكن يطول نسبيا مع وضع رقبة مش مريح ممكن يكون سبب في ألم وعدم ارتياح.
-
ساتر الرضاعة
من أكتر الحاجات اللي مجبتهاش وافتقدتها بشدة، ساتر الرضاعة ده المنقذ اللي مفيش غنى عنه بجد، لو الطفل عيط في أي مكان، مواصلات، أو مكان عام، أو نادي، أو حديقة عامة هتقدري ترضعيه بمنتهى الثقة والراحة بدون إحراج أو تأجيل للرضاعة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك