بما إن المعركة مع فيروس كورونا بتعتمد بشكل كلي على المناعة وتقويتها، عشان يقدر الجسم يواجه المرض ويقاومه بشكل فعال، فبالتالي تغذية مريض الكورونا في البيت عامل مهم جدًا من عوامل علاجه وتعافيه من الفيروس. عشان نحضّر وجبات صحية لمريض الكورونا محتاجين نعرف إيه هي أهم العناصر إللي هيحتاجها في أكلة، وإللي هتعمل على تعزيز مناعته، وكمان إيه العناصر إللي نتجنبها وازاي نحقق التوازن الصحي في كل وجبة. لو كان في بيتك مريض أو مريضة كورونا وانتي مسؤولة عن تحضير الطعام المناسب لمريض الكورونا، دي مجموعة نصائح عامة هتفيدك وترشدك:
نصائح عامة لغذاء مريض الكورونا

مصدر الصورة: emro.who.int
- السعرات الحراراية مهمة جدًا لمريض الكورونا لإن المرض بينهك الجسم ويستنفذ طاقته. عشان كده، مهم إضافة السعرات الحرارية للوجبات في صورة: عيش، رز، مكرونة، حبوب كاملة، بطاطس أو بطاطا، طبعًا بكميات معتدلة وبطريقة طبخ صحية.
- تناول البروتينات مهم جدًا لمريض الكورونا يفضل تناول حصة 75-100 جم من البروتين يوميًا، مش شرط تكون بس في صورة لحمة وفراخ، لكن البروتينات ممكن ناخدها من البقوليات، الحبوب الكاملة، المكسرات، منتجات الألبان، البيض، حتى منتجات الصويا لو كان المريض نباتي.
- الخضراوات والفواكه الطازة من أهم العناصر إللي بيحتاجها مريض الكورونا لإنها بتحتوي على الألياف، حمض الفوليك، الفيتامينات والمعادن المتنوعة، ومضادات الأكسدة. يفضل التنويع بين أصناف الخضراوات والفواكه، وأكلها غير مطهية في صورة سلطات مثلًا للحصول على أكبر قدر من الفايدة (تنصح WHO بتناول 2 كوب من الفواكه، و2.5 كوب من الخضار يوميًا)
- معززات المناعة مهمة جدًا لمريض الكورونا، وإللي بتتمثل في الخضراوات، الفواكه، الخضراوات الورقية والأعشاب، بعض البهارات والتوابل زي الكركم، الجنزبيل، الينسون، القرفة، والبابريكا، إضافتها للأكل بتعزز قدرته على تقوية المناعة، كمان المشروبات العشبية والشاي الأخضر والحليب بالكركم بيساعدوا على تعزيز المناعة والتخفيف من أعراض الفيروس.
- ترطيب الجسم وشرب الماء مهم جدًا للمريض، يفضل شرب من 8-10 أكواب من الماء يوميًا، ويخلي المريض الشوربات والمشروبات الدافئة جزء من نظام غذائة اليومي.
- يفضل الابتعاد عن المعلبات وكل ما يحتوي على مواد حافظة، وتقليل استهلاك الملح والسكر المصنع والدهون المشبعة، كمان يمنع كليًا الفاست فود والتغذية تعتمد بشكل أساسي على الأكل البيتي المطبوخ بعناية، واستخدام الدهون الصحية زي زيت الزيتون وزيت عباد الشمس والكانولا في طبخ الأكل للمريض.
في المقال ده، بنقدم لك منيو أسبوع لأكل صحي لمريض الكورونا. عشان يساعدك في عمل نظام غذائي مناسب ومتوازن يساعد المريض إنه يتغلب على المرض ويواجهه.
منيو أكلات اليوم الأول لمريض الكورونا
قبل الفطار يفضل شرب مشروب أعشاب ساخن (التحلية حسب حالة المريض الصحية)
(ينسون – قرفة – جنزبيل – زعتر – تيليو – بابونج – شاس أحمر مع القرنفل أو النعناع – نعناع أخضر)
وجبة الفطار
- 2 بيض بلدي مسلوق
- قطعة جبنة بيضاء قليلة الملح
- سلطة خضراء مع دريسينج من عصير الليمون وزيت الزيتون ورشة من الكركم
- 2 شريحة توست أسمر أو رغيف بلدي صغير
- عصير برتقان طازة
وجبة الغداء
- شوربة لسان العصفور بالجزر والكرفس (ادخلي هنا عشان تعرفي الطريقة، وطرق عمل شوربات تانية كتير)
- 1/2 فرخة مشوية
- خضار سوتيه (يفضل تسويته على البخار وإضافة رشة خفيفة من زيت الزيتون وعصير الليمون وتوابلكك المفضلة)
- رز بسمتي (مسلوق مع أعواد القرفة والينسون النجمي)
- طبق من الفواكه المشكلة
وجبة العشاء
- سلطة خضراء مع قطعة جبنة قريش
- سلطة فواكه مشكلة
- كوب لبن دافي مع معلقة صغيرة من الكركم أو القرفة
منيو اليوم التاني
وجبة الفطار
- رقائق الشوفان مع اللبن والعسل والقرفة
- ثمرتين من الفاكهة
وجبة الغداء
- شوربة خضار
- صدور الدجاج المخبوزة في الفرن مع الليمون والروزماري والتوم
- فريك مطبوخ بزيت الزيتون والبصل
- سلطة بنجر مع جزر وبرتقال (بنجر مسلوق مع جزر مبشور وشرايح من البرتقان)
وجبة العشاء
- سلطة بطاطس مسلوقة مع الشبت، والفلفل الألوان ورشة خفيفة من زيت الزيتون والليمون
- ثمرة فواكه
منيو اليوم التالت
وجبة الفطار
- فول بزيت الزيتون (تبليه بالكركم والكمون والبابريكا وعصير الليمون)
- عيش بلدي
- سلطة خضراء
- شرايح باتنجان مشوية في الفرن مع الكمون والليمون والتوم المفروم
وجبة الغداء
- شوربة بروكلي بدون كريمة (ادخلي هنا عشان تعرفي طريقة عمل شوربة البروكلي وشوربات تانية كتير)
- أي نوع خضار مطبوخ بعصير طماطم طازة مع مرقة دجاج أو لحم بيتي
- شرايح صدور دجاج مشوية (ضيفي بهارات متنوعة مع عصير الليمون والبرتقال لتتبيل الدجاج لرفع القيمة الغذائية)
- رز مصري مسلوق أو مطبوخ بمعلقة زيت نباتي
وجبة العشاء
- سلطة حمص مسلوق مع البقدونس والطماطم والخيار وأوراق النعناع
- سلطة فواكه مشكلة
منيو اليوم الرابع
وجبة الفطار
- سلطة العدس الأسمر مع الكمون، الليمون، مكعبات الطماطم، البقدونس المفروم، وزيت الزيتون
- خبز بلدي
- ثمرة فاكهة
وجبة الغداء
- سمك السلمون المشوي مع شرايح الليمون
- سبانخ مطهية بالبخار، تشوح في زيت الزيتون مع عصير الليمون والتوم
- بطاطس مشوية بالفرن
- عصير فواكة طازة بدون سكر
وجبة العشاء
- بولة بليلة باللبن قليل الدسم والقرفة مع اللوز الني والزبيب
- ثمرة فاكهة
منيو اليوم الخامس
وجبة الفطار
- لبنة قليلة الدسم مع زيت الزيتون والزعتر الطازة والنعناع الأخضر
- رقائق القمح الكامل والبذور الصحية
- طبق من الخضراوات المشكلة
- عصير ليمون أو برتقال طازة
وجبة الغداء
- شوربة العدس (ادخلي هنا عشان تعرفي طريقة عمل شوربة العدس)
- سلطة الخضراوات المشوية (ادخلي هنا عشان تعرفي الطريقة)
- خبز بلدي محمص في الفرن
وجبة العشاء
- سلطة الفراولة مع الأفوكادو و السبانخ (ادخلي هنا للوصفة)
- ثمرة برتقال
منيو اليوم السادس
وجبة الفطار
- أومليت مخبوز في الفرن مع الخضراوات المشكلة والمشروم
- 2 شريحة توست
- عصير فواكة طازة
وجبة الغداء
- شوربة كوسة مع النعناع بدون كريمة
- كفتة لحم أو دجاج قليلة الدسم مشوية في الفرن
- خضراوات مشكلة مشوية في الفرن (فلفل ألوان – بصل – بتنجان – كوسة – جزر)
- رز بسمتي بالكركم
وجبة العشاء
- بولة شوربة مع شريحة خبز محمص
- ثمرة فاكهة
منيو اليوم السابع
وجبة الفطار
- طعمية مخبوزة في الفرن
- بيوريه الحمص مع البنجر
- سلطة خضراء بلدي بالبصل والخضرة
- خبز بلدي
وجبة الغداء
- شوربة جزر مع الجنزبيل
- دجاج مشوي في الفرن مع الخضراوات المشكلة
- مكرونة مسلوقة مع القليل من زيت الزيتون والملح والفلفل والتوم المفروم
وجبة العشاء
- سموزي التفاح والموز والشوفان مع العسل وزبدة فول السوداني والقليل من اللبن قليل الدسم
وهنا بنقدم لك بعض الأفكار لسناكس صحية للمريض بين التلات وجبات الرئيسية:
أفكار للسناك بين الوجبات
- كبشة إيد من اللوز الني الغير محمص
- مشروب أعشاب ساخن (يحلى بالعسل الأبيض أو سكر دايت لو كان المريض بيعاني من مرض السكر)
- 5-6 حبات من المشمشية أو القراصيا (أو أي نوع من الفواكه المجففة الغنية بمضادات الأكسدة)
- زبادي يوناني مع الفواكه الغنية بفيتامين سي زي الفراولة
- بولة من الشوربة المحضرة منزليًا (لا يفضل استخدام مرقة الدجاج أو الخضار المصنعة في تغذية مريض الكورونا)
- كوب لبن دافيء مع معلقة صغيرة من الكركم (لرفع المناعة)
- بولة من السلطة أو الخضراوات المشكلة مع إضافة رشة بسيطة من زيت الزيتون وعصير الليمون.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك