رمضان 2022 على الأبواب .. والعزومات واللمة من غير شك من أحلى الحاجات في شهر رمضان، والناس إللي ممكن تكون ما بتشوفش بعضها غير على فترات متباعدة جدًا بتتلم كلها في الشهر الكريم على سفرة واحدة يفطروا سوا ويقضوا أحلى الأوقات. المشكلة إللي بتواجه ناس كتير في عزومات رمضان بتبقى دايمًا الميزانية والأسعار وازاي نقدر نعمل عزومة واتنين وتلاتة من غير ما ميزانية الشهر تبوظ تمامًا والموضوع ما يبقاش مرهق لست البيت ماديًا كمان. وعشان هدفنا دايمًا نريّح بالك، حضرنا لك النهارده منيو عزومة رمضانية إقتصادية بأسعار 2022 ما تخرّش الميه، هيحافظ على الميزانية وكمان هيشرّفك قدام ضيوفك.
منيو عزومة رمضان 2022 لـ 12 فرد غير طبعًا أفراد أسرتك على اعتبار إن أسرتك مكونة من 4 أفراد يعني عزومة تشرف لـ4 أسر من حبايبك أو قرايبك. في المنيو هتلاقي متوسط أسعار المكونات الأساسية للعزومة عشان تقدري تظبطي ميزانيتك وتعملي كل حساباتك بدقة، ولو المنيو ده عجبك ونفذتيه، أو حتى أخدتي منه فكرة بسيطة بنتمنى تقولي لنا في التعليقات.
قائمة مشتروات عزومة رمضان بالأسعار 2022
منيو عزومة رمضانية إقتصادية بالأسعار – مصدر: lifesavvy
- 2 كيلو وراك الدجاج أو الدبابيس حوالي (60-70 جنيه)
- 1/2 كيلو فراخ بانيه (30-35 جنيه)
- 1 كيلو لحمة كندوز (من 150-160 جنيه للكيلو)
- 1/2 كيلو لحمة مفرومة (من 60-75 جنيه)
- 1 كيلو رز (12 جنيه)
- توابل وبهارات (10 جنيه)
- خضار (100 جنيه)
- 1/2 كيلو كنافة (10 جنيه)
- 1/4 كيلو فول سوداني مقشر (11 جنيه)
- 1 كيلو سكر (12 جنيه)
- 1/4 كيلو كركديه (6 جنيه)
- 1 لتر لبن (15 جنيه)
- 1/2 كيلو جبنة موتزاريلا (22 جنيه)
- 1/4 ك زبيب (13 جنيه)
- 2 كيس مكرونة (12-16 جنيه)
- كيس لسان عصفور (6 جنيه)
- برطمان صلصة (8 جنيه)
- متوسط تكلفة العزومة: (450-500 جنيه)
منيو أصناف وأكلات عزومة رمضان 2022
- شوربة لسان عصفور
- جلاش بالجبنة والخضار
- صينية مكرونة نجرسكو
- كفتة داوود باشا
- صينية دبابيس فراخ بالبطاطس
- 2 طاجن تورلي باللحمة
- رز بالقرفة والزبيب
- فراخ بانيه (للأطفال)
- سلطة خضراء
- كركدية ساقع
- صينية كنافة بالفول السوداني والقرفة
لازم كمان تجربي الأكلات دي منيو إفطار رمضان 30 أكلة شهية لازم تكون على سفرتك في رمضان
تفاصيل تحضيرات عزومة رمضان لـ 16 فرد
- صينية دبابيس فراخ بالبطاطس
صنف تقليدي لكن شكله هيكون قيّم وكمان محبوب وسهل في تحضيره. هتستخدمي 1 كيلو وراك أو دبابيس الفراخ لعمل صينية فراخ بالبطاطس مع شرايح فلفل أخضر وبصل وطماطم. الصينية دي هيكون فيها 8 قطع من الفراخ ولو استخدمتي دبابيس الفراخ فقط هيكون في حوالي 10 قطع من الفراخ.
- صينية مكرونة نجرسكو:
هتستغلي الكيلو التاني من وراك أو دبابيس الفراخ في إنك تسلقيها وتحضري منها شوربة لعمل شوربة لسان العصفور وملوخية كمان لو حبيتي، وهتفصصي لحم الفراخ لعمل حشوة النجرسكو مع الفلفل الأخضر والبصل والتوم والزيتون لو حبيتي، وطبعًا أكلات البشاميل من الأكلات المحبوبة جدًا في العزومات.
لو من عشاق المكرونة شوفي هنا طريقة عمل المكرونة بالبشاميل
- طاجن تورلي بمكعبات اللحمة:
الخضار المطبوخ مع اللحمة أيًا كان نوعه محبوب جدًا زيه زي كل الأكلات المصرية التقليدية في العزومات، عشان توفري هتحضري 2 طاجن وفي كل طاجن 1/2 كيلو من اللحمة وقطع مكعبات صغيرة، كيلو اللحمة ممكن يتقطع لحد 12 قطعة صغيرة.
- كفتة داوود باشا:
بيحبوها الصغيرين والكبار و1/2 كيلو من اللحمة المفرومة مع إضافة البصل المفروم والكزبرة الخضراء وشوية من البقسماط الناعم هتخلي النص كيلو يعمل معاكي كمية كبيرة جدًا وخصوصًا لو صغرتي حجم الكرات.
هنا بقى ممكن تعملي بالفيديو 3 وصفات مختلفة باللحمة المفرومة
- الجلاش بالجبنة والخضار:
حشوة الجبنة مع الخضار بتكون لذيذة جدًا واقتصادية عن حشوة اللحمة المفرومة وكمان خفيفة ولذيذة، استخدمي الجبن المتوفرة عندك مش شرط الموتزاريلا وضيفي معاها فلفل وزيتون وأي خضراوات وبهارت تحبيها.
السمبوسك من الأطباق الأساسية في رمضان 5 طرق مختلفة لحشوات السمبوسة في رمضان
- الكنافة:
الفول السوداني المطحون مع القرفة وشوية سكر ومعلقة سمنة هيعملوا حشوة روعة للكنافة وطعم خطير وكمان اقتصادية جدًا.
- الفراخ البانيه
صنف مهم جدًا في أي عزومة رمضانية خصوصًا للأطفال إللي ساعات ممكن ما ياكلوش أي حاجة غيره، قطعي الصدور قطع رفيعة نسبيًا عشان يكون عدد القطع أكتر وتوزع أكتر، 1/2 كيلو ممكن يعمل 10 قطع، وكمان تقدري توفري أكتر وتعمليها شرايح زي الستربس.
ولو عندك صدور فراخ مش عارفه تعملي بيها إيه:
وبكده نكون غطينا كل تفاصيل العزومة وطبعًا كونها موفرة واقتصادية دي حاجة نسبية، بس احنا حاولنا بقدر الإمكان تكون سفرة متنوعة فيها البروتين موجود بأكتر من صورة، ونحقق عزومة متكاملة العناصر بالعصير والحلو وبأصناف ترضي الصغير والكبير وبدون مغالاة أو مبالغة في أصناف وكميات كبيرة تهدر وتترمي.
التعليق باستخدام حساب فيس بوك