محتويات المقال
في نوعية من الرجالة ما تتعاشرش حرفيًا، والدراما انعكاس للواقع، بل إن الواقع في أكتر الأوقات بيغلب الدراما وبيخلي صناعها واقفين مش مستوعبين اللي بيحصل. عشان كده محتاجين ناخد العبرة ونعتبر من الأعمال الدرامية عشان ما نوقعش في الشرك، لو لسه سينجل وما ارتبطتيش، فالموضوع ده عشانك، عن 10 شخصيات رجالة قدمتهم الدراما ما يتعاشروش.
السيكوباتي
حسن وعالية في مسلسل حلاوة الدنيا
شخصية ما تعرفيش تقولي لها لأ، هتلاقي نفسك على طول شايلة همه، على طول محسسك بالزعل عليه وعلى حاله، متعاطفة معاه بطريقة رهيبة وحاسة إن الدنيا كلها جاية عليه وانتي بس اللي هتنقذيه من المآسي اللي هو عايش فيها. السيكوباتي شخص كلامه حلو، بيعرف يتلاعب بالآخرين، وبيدي وعود كتير جدًا، وبيخلّي الحق باطل والباطل حق في ثانية، تمام زي ما بيتغير في ثانية من النقيض للنقيض، ومن قمة الحنية لقمة الأنانية هتلاقي نفسك خبطتي في حيطة، هيعجبك شكله الجميل وهيقنعك بإن أي حاجة وحشة بتحصل بينكم هي غلطتك انتي.
عاوزة تتفرجي على شخصية السيكوباتي على حق، اتفرجي على مسلسل حلاوة الدنيا، تحديدًا حسن، الأرمل المميز الوسيم اللي بيحب بنته وعنده طموح وعايش بطريقة منفتحة ومغرية لأي بنت إنها تقرب منها، هوب بتقرب منه عالية، وبتحبه قوي، وبتكون مستعدة تتجوزه وتربي بنته، بس كل حاجة بتتكشف مع مشهد واحد لما عالية بتتعرض للتحرش قدام حسن، وبدل ما يدافع عنها، بيبدأ يعنفها وكمان يلطشها بالقلم لإنها من وجهة نظره هي اللي جرأت المتحرش عليها بسبب هدومها.
ولإن حسن سيكوباتي فهو نجح زي أي راجل سيكوباتي في الدنيا إنه يرجع عالية له تاني ويخليها تسامحه بعد ما مسح بكرامتها الأرض، الشخص السيكوباتي شبه خيط العنكبوت، الوقوع معاه سهل والخروج من شباكه صعب جدًا.
المتسلط
خالد خطيب رضوى في مسلسل ليه لأ
المتسلط ده عمرك ما هتعرفي تعملي حاجة في حياتك إلا لما تستأذنيه، هيتحكم في تفاصيل غريبة، زي بصيتي من الشباك ولا لأ، فتحتي الباب ولا خليتي حد يفتح الباب بدالك، نزلتي امتى ورجعتي امتى، وخناق في كل تفصيلة مع اتهام مستمر إنك مش بتحترميه كراجل وما لكيش كبير.
طبعًا كل ده بيبدأ من مرحلة الخطوبة، ولو عاوزة تشوفي الشخصية دي بوضوح ممكن تتفرجي على مسلسل “إلا أنا”، تحديدًا شخصية خالد خطيب رضوى، واللي كان بيتحكم في كل تفاصيل حياتها بما فيها هتعزم مين ومش هتعزم مين في فرحهم، وحكم عليها إنها تتصل بصاحبة عمرها تقول لها ماتجيش الفرح لإنه مش بيحبها، الحياة مع الشخصيات اللي زي دي بتكون جحيم وغالبًا بتختم بالطلاق أو بأمراض نفسية كتير جدًا.
الضعيف
مسلسل إلا أنا حدوتة أمر شخصي
الشخص الضعيف ده بقى مأساة، في الأول هتتخيلي إنك محظوظة بيه لإنك بتحركيه وتوجهيه بسهولة، بتتخيلي إنك مش هتتعبي معاه أبدًا، لكن مع الوقت هتكتشفي الكارثة اللي وقعتي فيها، لإنه حقيقي شخصية ما تتعاشرش، لإن الضعيف مش ضعيف معاكي بس، هو ضعيف مع الناس كلها، وضعيف قدام حاجات كتير ممكن تدمر حياتكم منهم الإدمان، والصحاب، وغيرها من الحاجات اللي ما يقدرش يقاومها أو يحط لها حدود.
أوضح نموذج لشخصية الراجل الضعيف هو دكتور عمرو في مسلسل إلا أنا، حدوتة أمر شخصي، لما اتجوز من ميس هاجر – شيري عادل – وخلف منها، لكنه كان ضعيف جدًا، قدام مامته وقدام الإدمان وقدام هاجر نفسها، ضعيف لدرجة إنه مش قادر يصلب طوله، ويقف على حيله.
السهتان
شخصية أحمد في مسلسل إلا أنا
السهتان شخص بياخد كل حاجة بالراحة وما عندهوش انفعالات تذكر، بيعرف ياكلك في الكلام وما تقدريش تاخدي معاه حق ولا باطل وفي النهاية بيعمل اللي هو عاوزة لإنك مش في الحسابات، إنسان ما تقدريش تتوقعي التصرف الجاي بتاعه عامل ازاي. أبرز نموذج من الشخصيات دي هو أحمد في مسلسل إلا أنا، حدوتة ربع قيراط، اللي مصر كلها عيطت بسببه على حال منى واللي حصل فيها من جوزها وعشرة عمرها وأبو عيالها أحمد، وازاي كسر فرحتها وباع العشرة في ثواني.
5 دروس حياتية نتعلمهم من مسلسل ربع قيراط
الخاين
شخصية هشام في مسلسل لأعلى سعر
الخذلان مش سهل، خاصةً لو كان مرتبط بالتقليل من الست وأنوثتها، كل ده بيحصل مع أول لحظة خيانة بتعيشها الست مع شريك حياتها، بس الفكرة إن الشخص الخاين غالبًا بيعمل ده أكتر من مرة، مش مرة ولا اتنين. أكتر نموذج باشوفه مثال للراجل الخاين هو شخصية هشام أو الممثل أحمد فهمي في مسلسل لأعلى سعر، لما قرر يسيب مراته نيللي كريم، بعد ما عملت كل حاجة هو بيبحها وعاوزها وغيرت من نفسها بالطريقة اللي ترضيه، عشان يتجوز صاحبتها الأنتيم، وفي المقابل هي بتسترجعه بنفس الطريقة، وبيرجع يخون صاحبتها معاها بنفس الطريقة، طبعًا مش هانتكلم عن غباء التصرف الخاص باسترداد شخص خاين، لكن الفكرة إنه ده هو مفتاحه.
المستهتر
شخصية حمادة في مسلسل يتربى في عزو
الشخصية دي بقى ما تبطليش ضحك طول ما انتي معاه، تحسي إنك جوا أرض الأحلام، شخصية مبهجة ورائعة ومعاها تنسي كل الهموم اللي في الدنيا، لكن ده في بداية المعرفة فقط، وبمجرد ما تدخلي جوا العلاقة هتبدأي تكتشفي المآسي، لإن الحياة بالكامل عبارة عن أرض للأحلام ما فيهاش حقيقية.
الشخص المستهتر شخص فايق ورايق لإنه مش بيشيل هموم حرفيًا، بيضحك من قلبه بجد لأنه ما عندهوش إحساس بالمسؤولية، أقرب شخصيتين ممكن تشوفيهم هو حمادة عزو – يحيى الفخراني – في مسلسل يتربى في عزو، شخص جميل ولطيف وشيك ومقبل على الحياة لكن وراه جيش من الضحايا، ونفس الفكرة مع عاصم فلانتينو – حمدي الميرغني – في مسلسل فلانتينو، الشاب المتدلع اللي رغم عدم وجود مسؤولية وراه كان السبب في ضياع مبلغ تأميني بالملايين.
البخيل
شخصية حميدة في مسلسل مأمون وشركاه
البخيل بيكون بخيل في مشاعره مش في فلوسه بس، صحيح الجملة دي صحيحة، لكن بخل المشاعر مش هو أقسى حاجة ممكن الست توصل لها مع الشخص البخيل، البخيل بيصيب شريكة حياته بالتوتر، وبيخليها دايمًا حاسة بالنقص والبؤس والضيق، والبحل ده بيؤثر عليها صحيًا مع الوقت لأنه بيخفض من جودة الحياة تدريجيًا، أكل منخفض الجودة، ورعاية طبية معدومة تقريبًا، وعناية كمان معدومة والنتيجة شبح ست ما بتكونش مستنية كلمة حلوة قد ما هي مستنية أكلة حلوة أو لفتة طيبة وسط حياة رمادية ما فيهاش ألوان.
أقرب مثال لشخصية البخيل هو مأمون –عادل إمام- في مسلسل مأمون وشركاه، واللي قرر إنه ينشفها على كل اللي حوليه بما فيهم مراته حميدة، اللي ملامحها بقت شبه حياتها، من معاشرتها لراجل بخيل، كإن الزمن أكلها، هدوم بائسة ومكياج وشعر ونظارة وحتى طريقة مشي لست غلبانة مش مرات مليونير.
المصلحنجي
شخصية بودة في مسلسل لؤلؤ
هتاخدي منه أحلى كلام، وأجمل مواقف ولفتات، هتحسي إنك ملكتي الدنيا معاه وإنك أخيرًا لاقيتي حد مش طمعان فيكي – لو كنتي غنية – لكن فجأة وبمجرد ما تقربي هتكتشفي شوية شوية إن كل الود واللطف والجمال اللي كنتي بتشوفيه في المعاملة هدفه ما كانش انتي نهائيًا.
الشخص المصلحنجي بيعجب بيكي لأول مرة عشان شغلك وفلوسك مش عشان شخصيتك وجمالك الداخلي، هتلاقيه عامل حسابه على مرتبك، وعلى الهدايا اللي هتجيبيها عشانه، منشّن على الجانب المادي تمامًا وما لهوش أي علاقة بالجانب المعنوي. في الأول، مستحيل تعرفي ده لأنه هيقنعك ويحسسك إن آخر حاجة تهمه الفلوس، لكن مع الوقت النية بتبان وبتتعرف سواء بشكل مباشر أو غير مباشر.
أقرب مثال على الشخصية دي هو بودة في مسلسل لؤلؤ، واللي قرر يقرب من لؤلؤ ويخليها تحبه، مش عشان هي جميلة أو إنسانة بسيطة أو عشان شخصيتها ولا حتى عشان مطربة ناجحة، لكن عشان فلوسها وبس.
الطماع
شخصية نبيل في مسلسل لن أعيش في جلباب أبي
إيه الفرق كبير بين الطماح والمصلحنجي؟ الطماع بيبان من أول لحظة، لكن المصلحنجي بيتزوق وبيخدعك قبلها، الطماع هتعرفيه من أول خروجة ليكم مع بعض، لما يسيبك تحاسبي، ولما يبدأ يكلمك من أول مقابلة عن مرتبك والجوانب المادية اللي ممكن تساعدي بيها، الطماع شخص باصص على كل حاجة تخصك، فلوسك، ورثك، أملاكك، حتى قدراتك، عاوز كل حاجة ليه تخدم على حياته هو كأنه بيستولي عليكي.
أقرب مثال للشخص الطماع هو نبيل في مسلسل لن أعيش في جلباب أبي، نبيل كان واضح جدًا من أول لحظة، عاوز فرح بتكاليف معينة وشقة بمواصفات معينة، بيفاصل في الجهاز والعفش وما عندهوش مشكلة يفض الجوازة بالكامل لو طلباته ما اتنفذتش.
القلاب
مسلسل إلا أنا قصة لازم أعيش
تعرف فلان، آه، عاشرته، لأ، يبقى ما تعرفوش. هو ده بالظبط اللي بيحصل لما ترتبطي بشخص وتشوفيه ملاك بدون اختبارات حقيقية، الشخص القلّاب هيظهر مع أول موقف تتحطوا فيه مع بعض في ظرف قاسي شوية ويكون مطلوب منه يستجدع معاكي، لكن تتفاجئي بردود فعل مرعبة منه.
ده اللي حصل بالظبط مع نور في مسلسل “إلا أنا” حدوتة لازم أعيش، لما أحمد خالد صالح قرر يتخلى عن نور لما اكتشف مرضها، رغم إنه كان ملاك معاها وكل تفاصيل حياتهم مع بعض كانت بتقول إن الحياة هتكون وردي، لكن مع أول اختبار لحبهم، اتكشف وما صعبش عليه حبيبته ولو ثانية، وما كانش عنده أي مشكلة يجرح فيها ويوجعها على شيء مش ذنبها.
التعليق باستخدام حساب فيس بوك