فيه شكوى كده منتشرة بين معظم الأمهات، وهي إن مهما خرّجنا ولادنا وفسحناهم وحاولنا نبسطهم، برضه آخر الخروجة بتبقى نكد وعياط. وده طبعًا بيحسس الأم بالإحباط الشديد، يعني بعد ما خرجتك كل ده، برضه زعلان وبتعيط ومش عاجبك؟ وبيحسسها كمان إن ولادها أكيد عندهم مشكلة أو ناكرين للجميل أو أطفال نكدية!
طيب خلونا الأول نتفق إن الأطفال دايمًا بيبقوا متنكدين وزعلانين في آخر كل حاجة هم بيحبوها، بيروّحوا معيطين أو معترضين لإنهم مبسوطين ومستمتعين وبالنسبة لهم دلوقتي انتي جاية تقطعي المتعة دي وتوقفيها. فيبدؤوا يعبروا عن مشاعرهم دي بالعياط ونوبات الغضب لو هم لسه مش متدربين كفاية على طرق التعبير عن مشاعرهم.
اعرفي هنا تتصرفي ازاي لما ابنك يدخل في نوبة غضب؟
نعمل إيه في آخر الخروجة؟
طيب ممكن نعمل إيه عشان نعدي الخروجة بسلام وما يروحوش زعلانين واحنا محبطين؟
- قبل ما نخرج، نكون مهيئين ولادنا اليوم هيمشي ازاي وهنعمل إيه وهنخلص يومنا ازاي وفين ولو حصل أي تغيير في الخطط بتاعتنا لأي سبب، اشرح له.
- نتفق مع ولادنا إننا هنخرج المكان الفلاني وهنقعد قد كده عشان ورانا مشاوير تانية بعد كده، أو عشان بابا عنده شغل أو أيًا كان السبب. ولو مثلًا هيشتري لعبة، تبقى واحدة بس وباحدد له التمن.
- طيب ممكن ابدأ أعمل كده من امتى؟ الطفل هيستوعب من سن ٣ سنين بس أنا باحب ابدأ مع ولادي من سن سنتين تقريبًا لو حسيت إنهم مستجيبين باكمل، لإن ده بيخليهم أهدا وبيريحهم وبيخليهم متوقعين دايمًا اللي هيحصل
- وطبعًا الاتفاق لازم يمشي أيا كان الطفل عمل إيه (عيّط، صرخ، رمى نفسه على الأرض)
- قبل بقى ما نمشي بوقت كافي، أقول له فاضل نص ساعة مثلًا، بعدها بشوية أفكره إن فاضل ربع ساعة لإن الاطفال ما عندهمش إحساس بالوقت، فالأحسن إني أنبهه أكتر من مرة وعشان ما يوقفش اللي بيعمله ومندمج فيه مرة واحدة لإن ده بيزعلهم جدًا يا حبايبي.
- وممكن كمان تديله اختيارات لو متاح يعني: تحب نقعد ربع ساعة ولّا نص؟ وممكن تظبطي له الـTimer جنبه وتطلبي منه لما الوقت يخلص يجي لك لوحده. الطريقة دي بتحسس الأطفال إنها مهمة ورأيهم مسموع وكمان بتحسسه بالمسؤولية.
- وطبعًا لازم قبل ما نخرج، نتأكد إن ده وقت مناسب لولادنا، يعني مش وقت وجبة أساسية أو ما يكونش نايم كويس أو محتاج ياخد القيلولة بتاعته أو هيتأخر عن ميعاد نومه بالليل. لإن الأطفال ممكن تدخل في نوبة غضب بسهولة بسبب إنهم عايزين يناموا فلازم أراعي ده وانا باخطط للخروجة.
- لو عملتي كل حاجة وبرضه مش عايزين يمشوا وعياط ودخول في نوبة غضب، فما تحبطيش لإن زي ما قلنا ده طبيعي ولهم أسبابهم وحطي في اعتبارك إن الموضوع بيبقى أصعب في السن الصغير وكل لما هيكبر الموضوع هيتحسن وهيحتاجوا وقت لحد ما يتعودوا على طريقة الاتفاقات ويتأكدوا إن مش بترجعي في اتفاقك معاهم.
- المهم: مهما حصل، ما ترجعيش في كلامك ولو الطفل بدأ في العياط، وانتم ماشيين ما تهاجميهوش ولا تأنبيه. حسسيه إنك فاهمة ومقدرة إنه عايز يكمّل لعب بس لازم نمشي وهنحاول نيجي مرة تانية.
لو حسيتي إن النصايح ده مفيدة بالنسبة لك أو لو عندك نصايح تانية تقدري تساعدي بيها الأمهات شاركينا في التعليقات.
اعرفي من هنا 6 أسباب ليه لازم تودي ولادك كيدزانيا بكارت راحة بالي.
التعليق باستخدام حساب فيس بوك